1 Samuel 5 - Uwumbɔr aagbaŋ

Uwumbɔr Aakaal Aadakaa aah nan bi Filistia yaab chee pu na

¹ Filistia yaab aah jan ki gaa Uwumbɔr Aakaal Aadakaa na, bi nan yoor u nyan Ebeneser aatiŋ ponn ni, ki di buen baatiŋ Asdod ni,

² ki di u buen baawaal Dagonn aadiik ponn ni, ki di u siin gbaŋ liwaal ngbaan.

³ Naah woln kichakpinaanyeek ni na, le Asdod aanib kan ke liwaal Dagonn li nan si na lir chiŋ, ki dɔ kitiŋ, Uwumbɔr Aakaal Aadakaa aanimbiin ni. Le bi fiin li siin laabuul ni.

⁴ Naah ki woln kichakpinaanyeek ni na, bi ki kan ke liwaal ngbaan ki lir dɔ Uwumbɔr Aakaal Aadakaa aanimbiin ni. N‑yoonn mumina ma liyil ni laaŋaal ilee mɔmɔk wii wii ki ti dɔ mbisamɔb chee; ni nan gur liwon baanja la.

⁵ Nima pu le Asdod aawaal Dagonn aawaadam, ni binib bi dii li na aa taar mbisamɔb nima chee. Bi lakr ni pu le ki jer, ki nan saa din wee.

⁶ Uwumbɔr nan daa Asdod yaab aatafal sakpen, le ni ŋa bi ijawaan. U nan cha iween i naahn ŋichakpelar ki ku bi na lir bi pu; le ŋisayik mu gbiin Asdod aatiŋ ni, ni ntim mu bi ki mann goln ki na.

⁷ Baah kan tiwan ni bi ŋani bi na, le bi bui ke, “Israel yaab Aawumbɔr le bi dar timi ni timi aawaal Dagonn aatafal. Taan ki cha Waakaal Aadakaa ngbaan li bi do.”

⁸ Kina pu le bi nan tun yin ni Filistia aabɔrb biŋmu ngbaan nan kpaan, ki baa bi ke, “Ti ga ŋa Uwumbɔr Aakaal Aadakaa wee kinye?” Le bi bui ke, “Di u buen Gaf aatiŋ ni man;” le bi di u buen Gaf aatiŋ ponn ni, ki mu ki ye Filistia yaab aatiŋ kiken la.

⁹ Dakaa ngbaan aah fuu nima chee na, le Uwumbɔr ki daa nima yaab mu aatafal ki cha bipobil yuk. U nan cha iween i naahn ŋichakpelar na ki ku bi mu, mbim ni bininkpiib mɔmɔk.

¹⁰ Le bi yoor Uwumbɔr Aakaal Aadakaa ngbaan buen Filistia yaab aatiŋ ki bi yin ki ke Ekronn na ponn ni; le nima aanib teen ke, “Bi joo ni Israel yaab Aawumbɔr Aadakaa do, ke bi nan ku ti mɔmɔk la.”

¹¹ Le bi ki gir yin Filistia aabɔrb biŋmu na ki nan bui bi ke, “Giin man Israel yaab Aakaal Aadakaa buen waabuul ni, aan u taa ku timi ni timi aadichal ni yaab.” Ijawaan nan bi kitiŋ ngbaan mɔmɔk ponn ni; ba pu? Uwumbɔr nan bi dar bitafal sakpen.

¹² Binib bi kaa nan kpoi na, iween ngbaan nan duun duun bi, le binib ngbaan mee baawaa ke ŋi ter bi.