1 Samuel 4 - Uwumbɔr aagbaŋ

Bidim aah gaa Uwumbɔr Aakaal Aadakaa pu na

¹ N‑yoonn ngbaan le Filistia yaab kuun ke bi tak Israel yaab, le Israel yaab mu gor ki kii bi. Israel yaab nan ti tiŋ kal Ebeneser ni la, le Filistia yaab mu tiŋ kal Afek ni.

² Filistia yaab le nan puen buen ti tak Israel yaab, le bi too butɔb sakpem nima, le bi nyaŋ Israel yaab ki ku binib ŋichur ŋinaa butɔb ngbaan ponn ni.

³ Bijab bi nan ŋmar na aah nan fuu ni baah nan tiŋ ka nin chee na, le Israel aayidam bui ke, “Ni ŋa kinye aan Uwumbɔr cha Filistia yaab ngbaan nyaŋ timi din wee? Cha ti buen Silo man, ki ti yoor ni Uwumbɔr Aakaal Aadakaa, aan u dii timi buen ki ti gaa timi lii timi aadim chee.”

⁴ Le bi tun binib Silo aatiŋ ni, ke bi ti yoor ni Uwumbɔr Mpɔɔnsakpiindaan u bi tiwan ni kpa ifeen na aapaacham na Aakaal Aadakaa. Le Eli aajapɔtiib bilee na, Hofni ni Fineas, mu dii buen.

⁵ Uwumbɔr Aakaal Aadakaa ngbaan aah fuu ni na, le Israel yaab faa kifuuk le kitiŋ ti dam.

⁶ Filistia yaab ŋun kifuuk ngbaan pu le ki bui ke, “Li pel man Hiibru yaab ngbaan aakakaa chee aah kpa kifuuk pu na. Naatataa ye kinye?” Baah bee ke Uwumbɔr Aakaal Aadakaa le fuu ni Hiibru yaab chee na,

⁷ le ijawaan chuu bi, le bi bui ke, “Liwaal libaa le dan bi chee. Ti bi tibɔr ni. Tiwan nee aaboln aa kee ŋa kina.

⁸ Ŋma ga gaa timi ŋiwaapɔɔndam ŋee chee lii? Ŋiwaa ŋi nan ku doo Ijipt yaab nteer ponn ni na le bi na.

⁹ Filistia yaab, moo boon man. Boon man ke bijab na, naa ye kina kan, ti ga kpaln Hiibru yaab aanaagbiib, ke baah nan ye timi aanaagbiib pu na. Kina pu na, boon man ke bijab na.”

¹⁰ Filistia yaab nan nyal baan le ki nyaŋ Israel yaab, le bi san kun. Bi nan ku bi pam, bi nan ku Israel aajab ŋichur piitaa la,

¹¹ le ki gaa Uwumbɔr Aakaal Aadakaa, ki ku Eli aajapɔtiib, Hofni ni Fineas.

Eli aah kpo pu na

¹² Benjaminn aamaal ponn ni aaja ubaa nan nyan ni butɔb ngbaan ni, ki san nan fuu Silo liyaadaal ngbaan. U nan daa kar waawanpeenkaan, ki di titan mu puŋ uyil ke ni mɔk usui aah bii pu na.

¹³ Eli, u nan ka lijal pu nsan chee, aan Uwumbɔr Aakaal Aadakaa aabɔr muk u sakpen na, nan ka lik nsan pu. Uja ngbaan nan di tibɔr ngbaan moon kitiŋ ponn ni, le ijawaan chuu binib mɔmɔk, le bi wii.

¹⁴ Eli nan ŋun kifuuk ngbaan pu le ki baa ke, “Ba aafuuk bi na?” Le uja ngbaan san mala buen Eli chee ki ti bui u tibɔr ngbaan.

¹⁵ Eli nan ye ŋibin imonko inaa ni kipiik ni ŋiniin aanii le n‑yoonn ngbaan, kaa ki waa mbamɔm.

¹⁶ Uja ngbaan nan bui u ke, “M san ŋmar butɔb ni la, le ki san nyan ni nima, ki nan fuu ni do din.” Le Eli baa u ke, “Maabo, ba ŋa?”

¹⁷ Le u ki bui u ke, “Israel yaab san Filistia yaab chee; bi nyaŋ Israel yaab kookoo a. Ki ki kpee na, aajapɔtiib Hofni ni Fineas bee butɔb ni; le bi gaa ti chee Uwumbɔr Aakaal Aadakaa mu a.”

¹⁸ Uja ngbaan aah pur Uwumbɔr Aakaal Aadakaa aabɔr na, le Eli nyan lijal pu ki lir upuwɔb, mbisamɔb chee. U nan por pam, ki filk mu, le waah lir kina na usil koo, le u kpo. U nan ye Israel aayidaan ki ti saa ŋibin imonko ilee la.

Fineas aakpopii mu aah kpo pu na

¹⁹ Eli aabipuu, Fineas aapuu, nan dek, ki nan yak timar. Waah ŋun ke bi gaa Uwumbɔr Aakaal Aadakaa, ni uchooja ni uchal aakun aabɔr na, le imalween kpaan chuu u, le u ma.

²⁰ Waah ban u kpo na, le bipiib bi nan bi ter u na bui u ke, “Chuu aabaa. Aa kan ubijabo la.” Le u ŋmin, kaa gaar bi.

²¹ U nan yin ubo ngbaan ke Ikabod, ki kpiir len laatataa ke, “Uwumbɔr aapɔɔn siir cha Israel yaab a;” ki joo mɔk baah gaa Uwumbɔr Aakaal Aadakaa na, ni uchooja ni uchal aah kpo pu na.

²² Le u bui ke, “Uwumbɔr aapɔɔn siir cha Israel yaab; ba pu? bi gaa Uwumbɔr Aakaal Aadakaa a.”