1 Samuel 31 - Uwumbɔr aagbaŋ

Sɔɔl ni ujapɔtiib aah kpo pu na

¹ Filistia yaab nan ti faa Israel yaab butɔb, Gilboa Aajool paab la. Bi nan ku Israel yaab pam nima, le bijab bi gur na, ni Ubɔr Sɔɔl, ni ujapɔtiib san.

² Filistia yaab nan jenn chuu bi, ki ku Sɔɔl aajapɔtiib bitaa, Jonatann, ni Abinadab, ni Malkisua.

³ Butɔb ngbaan nan ti pɔɔ Sɔɔl aah bi nin chee na le pam, le bidim bibaa aapiin yun Sɔɔl ki tii u titotonn pam.

⁴ Le u bui unachipɔɔn u joo waajawan na ke, “Nyan saajaak aajuk ki ku mi, aan Filistia yaab bi kaa san Uwumbɔr na taa nan di kinanaŋ ku mi.” Le ijawaan nan chuu unachipɔɔn ngbaan sakpen, le waa kaa u ŋa kina. Kina pu le Sɔɔl nyan ubaa aajaak aajuk ki lir ki pu ki ku ubaa.

⁵ Unachipɔɔn ngbaan nan kan ke Sɔɔl kpo a, le u mu lir waajuk pu, ki kpo dii Sɔɔl.

⁶ Kina le Sɔɔl, ni ujapɔtiib bitaa, ni unachipɔɔn ngbaan nan kpo; Sɔɔl aajab mɔmɔk nan kpo liyaadaal ngbaan.

⁷ Israel yaab bi bi Jesreel Aafataŋ ni, ni bi bi Jɔɔdann Aamɔɔl aawipuul wɔb na ŋun ke Israel aajab san, aan bi ku Sɔɔl ni ujapɔtiib, le bi san cha baatim. Le Filistia yaab dan nan koo mu ni.

⁸ Butɔb ngbaan aataak aah jer aan Filistia yaab buen bi ti yoor ŋinikpol ngbaan aawan na, le bi kan Sɔɔl ni ujapɔtiib bitaa na aanikpol dɔ Gilboa Aajool paab.

⁹ Bi nan gii Sɔɔl aayil, ki peer waajaak aabɔkul, ki di tun Filistia yaab aatim mɔmɔk ni, ki tuk baawaa, ni baanib tibɔnyaan ngbaan.

¹⁰ Bi nan di waajawan bil baawaapii Astaate aawaadiik ni, le ki di uwon kpaa tam Bef Sann aatiŋ aagoln pu.

¹¹ Jabes aatiŋ ki bi Gilead ni na aanib aah ŋun ke Filistia yaab ŋa Sɔɔl kina na,

¹² le baapobidam fii kinyeek ki buen Bef Sann ni. Bi nan chuu kpaar Sɔɔl ni ujapɔtiib aawon ligoln ngbaan pu, ki di gir buen Jabes aatiŋ ni, ki ti see ti mmii nima,

¹³ le ki yoor baakpab ki ti sub busub bubaa taab, kitiŋ ngbaan ni, ki lul bumɔb ti saa iwiin ilole.