1 Samuel 30 - Uwumbɔr aagbaŋ

David ni Amalek yaab aatɔb

¹ Iwiin ilee aah jer na, le David ni waajab fuu Siklag ni. Amalek yaab nan dan nan binn Juda aawipuul aaŋangii wɔb ki ti tak Siklag. Bi nan see kitiŋ ngbaan mmii,

² le ki chur bipiib mɔmɔk. Baa nan ku ubaa, bi tee chur bi mɔmɔk di buen.

³ David ni waajab nan fuu ni, le ki kan ke bi see kitiŋ ngbaan mmii, ki chur bipuutiib, ni bijapɔtiib, ni bibisatiib di buen.

⁴ David ni waajab nan piin ki bi wii kaa ŋmin, le bi mɔmɔk nan ti bak.

⁵ Bi nan kpaan yoor David aapuutiib bilee, Ahinoam ni Abigail mu, ki di buen.

⁶ David nan gur bi tibɔsakpenn ni la; ba pu? waajab aasui nan bii baah kaa ki kpa mbim pu na pu, le bi nan ban bi mae u ŋitakpal; Uwumbɔr mu nan tee tii u ntaakpapɔɔn.

⁷ Le u bui utotoor Abiatar, u ye Ahimelek aajapɔɔn na ke, “Ti li joo ni tiwan ni bi joo beer Uwumbɔr aageehn na,” Le Abiatar ti joo ni ni.

⁸ David nan baa Uwumbɔr ke, “M paan binib bi nan binn kitiŋ kee na pu uu? M ga chuu bi ii?” Uwumbɔr nan kii u ke, “Paan bi pu; aa ga chuu bi ki gaa baah chur bi na.”

⁹ Kina pu le David ni waajab ikui iloob na nan fii; le baah ti fuu Besor aabunbik ni na, bibaa nan gaar nima chee.

¹⁰ David ni bijab ikui inaa le nan beenin cha; bijab ikui ilee bi gur na nan bak sakpen, kaa ŋmaa puur kibunbik ngbaan, le ki gaar nima.

¹¹ Bijab bi nan dii David na nan kan Ijipt yaab aanachipɔɔn ubaa, ki joo ni u David chee. Bi nan tii u tijikaar, ni nnyun,

¹² ni ŋikakan, ni ndaan aasubil ibon ilee. Waah jin doo na, le u ki kan mpɔɔn; waa nan jin nibaa, kaa nyun nnyun mu, ki ti saa iwiin itaa ni tinyer titaa.

¹³ David nan baa u ke, “Saaninkpel ye ŋma? Aa nyan ni la chee?” Le unachipɔɔn ngbaan bui u ke, “M ye Ijipt aanii la, ki ye Amalek aaninkpel ubaa aanaagbiija. Iwiin itaa i jer na le maaninkpel nan buen cha mi; ba pu? m nan bun la.

¹⁴ Ti nan binn Keref yaab aapepel li bi Juda yaab aapepel aaŋangii wɔb na, ni Kaleb aamaal aapepel, le ki see Siklag aatiŋ.”

¹⁵ David nan ki baa u ke, “Aa ga mɔk mi baah bi nin chee na aa?” Le u kii ke, “Aa yaa puu Uwumbɔr aayimbil pu ke saan ku mi, kaan di mi tii maaninkpel kan, m ga mɔk si bi chee,”

¹⁶ le ki di David buen bi chee. Binib bi nan binn Siklag na nan yaa ki ka ka ni kookoo, ki ji, ki nyu ndaan, baah nan yoor liwangol sakpeln li Filistia ni Juda aatim ni na pu.

¹⁷ Kitaak ki ga woln na aachakpitaawoln le David nan ti tak bi, le bi jan ki ti joor kijook. Binachipɔm ikui inaa baanja bi nan diŋ laakumii tiib pu ki san na le nan ŋmar, bi gur na mɔmɔk nan bee butɔb ngbaan ni.

¹⁸ David nan ki gaa binib mɔmɔk, ni tiwan nimɔk Amalek yaab ngbaan nan yoor na. U nan gaa upuutiib bilee na mu;

¹⁹ nibaa aa nan wɔŋ. David nan gaa waajab aajapɔtiib, ni bibisatiib, ni tiwan nimɔk Amalek yaab ngbaan nan yoor na.

²⁰ U nan ki kan ipiih ni inaa na mɔmɔk; le waajab nan peer tiwakor ngbaan loln nsan ki bui ke, “David yeh nee mɔmɔk.”

²¹ Le David gir buen bijab ikui ilee bi nan bak sakpen ki gaar puwɔb na chee, Besor aabunbik na ni. Bi nan tooh David ni waajab nsan ni, le David buen bi chee ki ti doon bi mbamɔm.

²² Le nifam bibaa ni maa‑kpa‑laasaab‑dam bibaa bi nan dii David buen na bui ke, “Baa dii timi ki buen, kina pu na, taan tii bi taah gaa tiwan ni na nibaa. Bi ga ŋmaa yoor bipuutiib ni baabim ki li cha.”

²³ Le David bui bi ke, “Nnaabitiib, naan ŋmaa ŋa Uwumbɔr aah tii nimi ni na kina. U nan kii timi, le ki cha ti nyaŋ binib bi nan binn timi na.

²⁴ Ubaa aan kii tii nimi, naah len pu na. Ti mɔmɔk ga yakr ni deedee la: unii u kaa buen, ki gaar tiwan chee na ga kan ke unii u buen ti jan butɔb ni na aah ga kan pu na la.”

²⁵ David nan ŋa nimina nkaal, le Israel yaab mɔmɔk dii mu ki nan saa din.

²⁶ David aah ti fuu Siklag ni na, u nan yakr tiwan ngbaan tii Juda yaab aayidam bi ye ujɔtiib na, ki bui ke, “Taah gaa tiwan ni Uwumbɔr aadim chee na nibaa le ti joo tii ni nimi.”

²⁷ U nan di ni tun tii Betel aanib, ni Rama aanib bi bi Juda yaab aapepel aaŋangii wɔb na, ni Jatir,

²⁸ ni Aroer, ni Sifmof, ni Estemoa,

²⁹ ni Rakal aatim aanib, ni Jerameel aamaal, ni Kenn yaab,

³⁰ ni binib bi bi Homa, ni Borasann, ni Atak,

³¹ ni Hebronn aatim ni na. U nan lee ni tun tii ntim mumɔk u ni waajab nan kpak mu ponn ni na.