1 Samuel 3 - Uwumbɔr aagbaŋ

Uwumbɔr aah di ubaa mɔk Samuel pu na

¹ N‑yoonn ngbaan na, buyoonn unachipɔnbo Samuel nan bi tun Uwumbɔr aatuln Eli chee na, Uwumbɔr aa nan ki joo waabɔr naŋni binib sakpen, kaa ki joo ubaa mɔk binib yɔl yɔl.

² Kinyeek kibaa le Eli, u kaa nan ki waa mbamɔm na, nan dɔ geen waadɔdoo chee,

³ le Samuel mu dɔ nin chee Uwumbɔr Aakaal Aadakaa nan bi na. Waahr aan ni nin woln na, buyoonn karyaa aa nan kee junn na,

⁴ le Uwumbɔr yin Samuel. Samuel nan kii ke, “Maaninkpel, m sɔ,”

⁵ le ki san buen Eli chee ki ti bui ke, “Saah yin mi na, le m dan.” Le Eli bui u ke, “Maa yin sin, gir ti doon.” Le Samuel gir buen ti doon.

^6-7 Le Uwumbɔr ki yin Samuel lelee. Ubo ngbaan aa nan nyi ke ni ye Uwumbɔr la, ba pu? Uwumbɔr aa nan kee len u chee tibɔr daalbaadaal kina. Le u fii, ki ki buen Eli chee, ki ti bui u ke, “Saah yin mi na, le m dan.” Le Eli ki bui u ke, “Maabo, maa yin sin, li cha ti doon.”

⁸ Le Uwumbɔr ki yin Samuel taataa, le u fii, ki ki buen Eli chee, ki ti ki bui u ke, “Saah yin mi na, le m dan.” N‑yoonn ngbaan le Eli bee ke ni ye Uwumbɔr le yin ubo ngbaan,

⁹ le u ki bui u ke, “Gir ti doon; u yaa ki yin si kan, bui ke ‘Uwumbɔr, li len, saatutunn pel la.’” Le Samuel ki gir ti doon.

¹⁰ Le Uwumbɔr dan nan sil nima, ki yin ke waah ti yin pu na ke, “Samuel, Samuel.” Le Samuel kii ke, “Li len; saatutunn pel la.”

¹¹ Le Uwumbɔr bui u ke, “Nwiin mubaa daal m ga ŋa Israel aanib tiwan nibaa, ni ga li kpa ijawaan, le unii umɔk ŋun ni pu na ga bir, kaan ŋmaa len tibaa.

¹² Nwiin ngbaan daal le m ga ŋa Eli aadichal tiwan nimɔk m bui ke m ga ŋa li na.

¹³ M puen tuk u ke m ga daa waadichal aatafal ki ti saa n‑yoonn mu kaa kpa ndoon na; ba pu? ujapɔtiib len mi tibɔr ti kaa ŋan na. Eli nyi ke bi ŋani kina, le kaa sur bi.

¹⁴ Kina pu na, min le bui Eli ni waadichal ke kitork bee ipiin ibaa aa bi ki ga ŋmaa nyan titunwanbir timina aatafadaan.”

¹⁵ Samuel nan gaar dɔ le kitaak ti woln; le u fii ki piir Uwumbɔr Aadichal aabisamɔi. Waa nan kaa ke u bui Eli tibɔr ti Uwumbɔr kpiir tuk u na.

¹⁶ Eli nan yin u ke, “Maabo Samuel.” Le Samuel kii ke, “Maaninkpel, m sɔ.”

¹⁷ Le Eli baa u ke, “Uwumbɔr tuk si ke ba? Taa di tibaa bɔr mi. Aa yaa kaa bui mi waah tuk si pu na mɔmɔk kan, Uwumbɔr ga daa aatafal pam.”

¹⁸ Kina pu le Samuel bui u ti mɔmɔk; waa nan di tibaa bɔr u. Le Eli bui ke, “Uma le ye Uwumbɔr. Cha u ŋa waah ban pu na.”

¹⁹ Samuel aah chikr cha na, le Uwumbɔr nan bi u chee ki cha Samuel aah len pu na mɔmɔk gbiini kina.

²⁰ Kina pu le Israel aanib mɔmɔk, bi bi Israel aatiŋ ŋipepel mɔmɔk ni na bee ke Samuel nan sil ye Uwumbɔr aabɔnabr la.

²¹ Uwumbɔr nan beenin joo ubaa mɔk Samuel, Silo aatiŋ ni, ki kpiir waabɔr tuk u nima chee. Samuel yaa len pu na kan, Israel aanib mɔmɔk pel la.