1 Samuel 29 - Uwumbɔr aagbaŋ

Filistia aajab aah yii David pu na

¹ Filistia aajab mɔmɔk nan kuun ki kpaan Afek ni la, le Israel yaab mu kuun uyayak aanyunbun mu bi Jesreel Aafataŋ ni na chee.

² Filistia aabɔrb biŋmu na nan di baajab ki nyan ni ŋigetek nkub nkub, ni ŋichur ŋichur la, le David, ni waajab, ni Ubɔr Akis ti paa puwɔb.

³ Le Filistia aajab aaninkpiib kan bi, le ki baa ke, “Hiibru yaab bee bi do ŋani ba?” Le Akis bui ke, “Israel yaab Aabɔr Sɔɔl aajab aaninkpel David sɔ. U bi ni chee do, ni yunn pam. Waah fuu ni do bundaln ki nan saa din wee na, waa ŋa taani ubaa m ga ŋmaa di galn u.”

⁴ Le Filistia aajab aaninkpiib ngbaan aaŋuul fii Akis pu, le bi bui u ke, “Giin u buen kitiŋ ki aa di tii u na ponn ni. Taa cha u dii timi buen butɔb ni. Nibaakan u ga ti fenn lir ti pu butɔb ni. Nibaakan timi aajab aakun pu le waaninkpel ga ki geehn u.

⁵ Ni ye uma David pu le bipiib nan waa liwaal ki gaa ilahn ke, ‘Sɔɔl ku ŋichur la, le David ma ku ŋichur kipiik kipiik na.’”

⁶ Nima pu na, Akis nan yin David le ki bui u ke, “M puu Israel yaab Aawumbɔr u bi n‑yoonn mɔmɔk na ke aa kii tii mi mbamɔm, le ni ba ga li mɔ mi ke ni dii mi buen ki ti jan butɔb bue ni. Saah fuu ni do bundaln ki nan saa din wee na, maa kan saataani ubaa m ga ŋmaa di galn si. Tɔ, bibɔrb biken na aa kii tii si.

⁷ Kina pu na, gir li chaa kun man, ki taa ŋa nibaa aan ni bii bisui.”

⁸ David nan baa u ke, “Maaninkpel, m ŋa ba naa ŋan? Maaninkpel, u ye maabɔr na, aa len ke saa kan maataani ubaa ki nyan bundaln m fuu ni do ki nan saa din wee na; ni yaa ye mbamɔn kan, ba ŋa maan ŋmaa dii si ki buen ki ti faa saadim butɔb?”

⁹ Akis nan bui u ke, “M kii kina. M lik si ke Uwumbɔr aatuun mu si chob na la. Bibɔrb biken na le bui ke saan ŋmaa dii timi buen butɔb ni.

¹⁰ Kina pu na, David, fen kichakpiik ni kan, nimi bi mɔmɔk san Sɔɔl chee ki dan m chee na ga fe fii mala ki gir, buyoonn ni laa bi wolni na.”

¹¹ Kina pu le David ni waajab nan fii mala kichakpiik ni, ki gir cha Filistia yaab aatiŋ ni, le Filistia yaab buen Jesreel butɔb.