1 Samuel 28 - Uwumbɔr aagbaŋ

¹ Nee aapuwɔb, le Filistia yaab kuun baajab bi ti tak Israel yaab, le Akis bui David ke, “Aa bee ke aa ni saajab ga kpee m pu la.”

² Le David kii u ke, “Mbamɔn, m ye saatutunn la. Aa ga kan maah ga ŋa pu na.” Akis nan bui u ke, “Ni ŋan. M ga di si ŋa mbaa aakikiir n‑yoonn mɔmɔk la.”

Sɔɔl aah ti buu ubɔɔ pu na

³ Le Samuel nan kpo, le Israel yaab mɔmɔk nan wii waakpuul ki ti sub u udo aatiŋ Rama ni. Sɔɔl nan jenn nyan bibɔɔb, ni binib bimɔk joo inyɔk tun lituln na Israel ni.

⁴ Filistia aajab nan ti kuun kal Sunem aatiŋ chee; le Sɔɔl ni Israel aajab mu kuun Gilboa Aajool pu.

⁵ Sɔɔl aah nan kan Filistia aajab na, le ijawaan chuu u sakpen.

⁶ Kina pu le u nan baa Uwumbɔr waah ga ŋa pu na. Le Uwumbɔr aa gar u kpala. Waa gar u tidaŋ ni, bee baah joo tiwan ni beer waageehn na mu ni, bee bibɔnabr chee.

⁷ Le Sɔɔl bui waaninkpiib ke, “Ban kan man upii u joo inyɔk buu tibɔɔr na, aan m buen u chee ti baa lik.” Bi nan bui u ke, “Ubaa bi Endor ni.”

⁸ Le Sɔɔl kpeln waawanpeenkaan, ki di ni kaa ye ubɔr aawanpeenkaan na peen, le ki di waajab bilee buen bi ti kan upii ngbaan kinyeek. U nan ti bui upii ngbaan ke, “Baa bitekpiib tii mi aan ki bui mi tiwan ni ban ni ŋa na. Yin utekpiir u aayimbil m ga yin na.”

⁹ Le upii ngbaan bui u ke, “Aa nyi gbingbin Ubɔr Sɔɔl aah ŋa pu na, waah jenn nyan bibɔɔb, ni binib bi joo inyɔk tun lituln na mɔmɔk Israel pu na. Ba ŋa aa ban aa ŋmann mi ke bi ku mi?”

¹⁰ Le Sɔɔl puu tipuukpaan, ki bui u ke, “M puu Uwumbɔr u bi n‑yoonn mɔmɔk na ke ubaa aan daa aatafal nee pu.”

¹¹ Le upii ngbaan baa u ke, “Ŋma aan aa ban ke m yin u tii si?” Le u bui u ke, “Samuel.”

¹² Upii ngbaan aah kan Samuel na, le u faa nkuun ki baa Sɔɔl ke, “Ba ŋa aa ŋmann mi? Sin Ubɔr Sɔɔl ye.”

¹³ Le ubɔr ngbaan bui u ke, “Taa san ijawaan. Aa kan ba?” Le u bui u ke, “M waa utekpiir aawiin nyan ni kitiŋ ki choo.”

¹⁴ Le u baa ke, “Mu bi kinye?” Le u bui u ke, “Ni naahn ujaninkpel le ki choo nyan ni. U pee libɔkul li fɔk na la.” Le Sɔɔl bee ke Samuel ye, le ki gbaan kitiŋ ki tii u kipak.

¹⁵ Le Samuel baa Sɔɔl ke, “Ba ŋa aa muk mi kina? Ba ŋa aa cha m gir ni?” Le Sɔɔl kii u ke, “M bi limukl sakpeln ni la. Filistia yaab bi to mi butɔb la, le Uwumbɔr siir cha mi. Waa ki gar mi tidaŋ ponn ni, bee waabɔnabtiib chee. Kina pu le m yin si ke aa nan bui mi maah ga ŋa pu na.”

¹⁶ Le Samuel nan bui u ke, “Uwumbɔr yaa yii si ki kpaln saadin kan, ba ŋa aa baa mi saah ga ŋa pu na?

¹⁷ Uwumbɔr ŋa si waah nan cha m tuk si pu na la: u gaa aa chee Israel yaab aanaan ki di tii David a.

¹⁸ Aa yii Uwumbɔr aamɔb, kaa ku doo Amalek yaab mɔmɔk, ni baah kpa pu na. Nima pu le Uwumbɔr bi ŋani si kina dandana wee.

¹⁹ U ga di sin ni Israel yaab mɔmɔk tii Filistia yaab. Fen kan, sin ni aajapɔtiib ga fe kpee ni m pu do, le Uwumbɔr mu ga di Israel aajab tii Filistia yaab.”

²⁰ Libuul ngbaan ni le ijawaan chuu Sɔɔl sakpen, Samuel aah tuk u pu na pu, le u lir kitiŋ ki taln ubaa ki dɔ. Uwon nan yɔl; ba pu? waa nan jin nibaa nwiin ngbaan pu, ni kinyeek.

²¹ Upii ngbaan nan buen u chee le ki ti kan ke ijawaan le nan chuu u sakpen; le u bui u ke, “Maaninkpel, m ba di maamɔfal ŋa ŋŋaal ni, le ki ŋa saah ban pu na. Tɔ, m gaŋ si, aa mu pɔɔk aabaa ki ŋa maah ban pu na.

²² Cha m ŋa tijikaar tii si, aa ji. Ni ŋan ke aa ji aan ki kan mpɔɔn ki di chuun.”

²³ Le Sɔɔl nan yii ki bui ke waan ji nibaa. Le waaninkpiib mu gaŋ u, le u ti nin kii, le ki fii kitiŋ ki kal lijal pu.

²⁴ Le upii ngbaan ŋa mala ki kɔr waah bi kpiini unaabo u na, le ki ban n‑yon, le ki toor mu, ki ŋa boroboro u kaa kpa boroboro aanyɔk na.

²⁵ U nan di tijikaar ngbaan siin Sɔɔl ni waaninkpiib, le bi jin. Kinyeek ngbaan le bi fii buen.