1 Samuel 27 - Uwumbɔr aagbaŋ

David aah koo Filistia yaab ponn ni pu na

¹ Le David nan bui ubaa ke, “Daalbaadaal kan, Sɔɔl ga nan ku mi. Tiwan ni ŋan ke m ŋa na le ye ke m san buen Filistia yaab aatiŋ ni. Nima kan, Sɔɔl aan ki ban mi Israel aatiŋ ni, le m ga fuur.”

² Kina pu le David ni waajab ikui iloob na fii buen Maok aajapɔɔn Akis, u ye Gaf aabɔr na chee.

³ David, ni waajab, ni baadichal nan ti koo Gaf ni la. David nan joo upuutiib bilee na u chee, Ahinoam, u nyan ni Jesreel na, ni Abigail, Nabal aakpopii u nyan ni Kamel na.

⁴ Sɔɔl aah ŋun ke David fii buen Gaf aatiŋ ni na, le u di cha, kaa ki ban u.

⁵ David nan bui Akis ke, “Aa yaa ye njɔ kan, tii mi kitiwaatiir kibaa ni, m kal. Maaninkpel, naa ŋan ke min ni si li kpaan koo litiyil ponn ni do.”

⁶ Le Akis di Siklag aatiŋ tii u. Ki nyan n‑yoonn ngbaan le Siklag kpaln Juda yaab aabɔrb aatiŋ.

⁷ David nan kal Filistia yaab aatiŋ pu ki ti saa iŋmal kipiik ni iloob la.

⁸ N‑yoonn ngbaan le David ni waajab nan chaa ti tak Gesur, ni Girsi, ni Amalek aanib, bima le nan puen bi lipepel ngbaan n‑yoonn mu jer na. U nan binn baatiŋ ki ti saa Sur, ni Ijipt,

⁹ ki ku bijab ni bipiib mɔmɔk, ki chur ipiih, ni inaa, ni ibon, ni laakumii tiib, ki yoor tiwanpeenkaan mu, le ki ti gir buen Akis chee.

¹⁰ Akis ga ti baa u ke, “Aa buen ti binn la chee din wee?” Le David ga ŋmann u ki bui u ke u buen Juda aaŋangii wɔb la, bee Jerameel yaab aapepel, bee Kenn yaab aapepel la.

¹¹ David nan ku bi mɔmɔk, bijab, ni bipiib, le ubaa aan ŋmaa gir buen Akis chee, Gaf aatiŋ ni, ki ti len u ni waajab aah ŋa pu na. Kina le David nan ŋani n‑yoonn mumɔk u nan bi Filistia yaab aatiŋ ni na.

¹² Akis nan tii David naadii sakpen, le ki bui ubaa ke, “David aanib Israel yaab aah nan u sakpen pu na, u ga li ye maatutunn ki ti saa waakun daal.”