1 Samuel 26 - Uwumbɔr aagbaŋ

David ki san Sɔɔl kinimbaak lelee kaa ki ku u

¹ Bijab bibaa nan nyan ni Sif, ki buen Sɔɔl chee Gibea ni, ki ti bui u ke David bɔr Hakila Aajool pu, Juda yaab aateersakpiin aagbaan.

² Libuul ngbaan ni, le Sɔɔl di Israel aajab bi nyi butɔb aabɔr mbamɔm na ŋichur ŋitaa buen Sif aateersakpiin ni, u ti ban David.

³ Bi nan kuun kal Hakila Aajool aasan chee la. David nan beenin bi nteersakpiin ngbaan ni, le waah ŋun ke Sɔɔl dan ke u nan ban u na,

⁴ le u tun bipepekb aan bi ti lik ke Sɔɔl sil bi nima aan waa bi.

⁵ Libuul ngbaan ni le u buen ki ti kan nin chee chob Sɔɔl ni Ner aajapɔɔn Abner, u ye Sɔɔl aajab aaninkpel na dɔ geen na. Sɔɔl nan dɔ waajab aakaasisik ni, le bi mann goln u.

⁶ Le David baa Ahimelek, u ye Hef aanii na, ni Abisai u ye Joab aanaal aan bina ye Seruya na ke, “Ni ponn ni bilee bee, ŋma ga dii mi buen Sɔɔl ni waajab chee?” Le Abisai bui ke, “Min le ga buen.”

⁷ Le David ni Abisai koo Sɔɔl ni waajab aah dɔ nin chee na kinyeek ngbaan, ki ti kan Sɔɔl dɔ geen waajab aakaasisik ni, le waakpaatuŋ choo kitiŋ uyil chee. Abner ni bijab bi gur na nan dɔ goln u ki geen.

⁸ Le Abisai bui David ke, “Uwumbɔr di saadin ŋa aaŋaal ni kinyeek kee. Cha m di ubaa aakpaatuŋ saa u tam kitiŋ nfum mubaa, maan ban muleler.”

⁹ Le David bui u ke, “Taa ŋa u nibaa. Uwumbɔr ga sil daa unii u ŋa waabɔr u u lee u na taani na aatafal.”

¹⁰ David nan ki len ke, “Uwumbɔr u bi n‑yoonn mu kaa kpa ndoon na pu, m nyi ke Uwumbɔr ubaa le ga ku Sɔɔl. Nibaakan ni ga nan li ye waakun la, bee u ga nan kpo butɔb ponn ni la.

¹¹ Uwumbɔr aan kii ke m tun unii u uma Uwumbɔr ubaa ŋa u ubɔr na titunwanbir. Cha ti yoor waakpaatuŋ, ni waanyun aatuun, ki li cha.”

¹² David nan yoor Sɔɔl aakpaatuŋ, ni waanyun aatuun uyil chee, le u ni Abisai siir. Ubaa aa nan kan, kaa nyi baah ŋa pu na, ki mu aa finn ki kan bi; bi mɔmɔk nan geen gbar; ba pu? Uwumbɔr nan di ngeen sakpem lii ni bi pu.

¹³ David nan puur buen kifataŋ ngbaan aapepel liken, ki ti toŋ ligongoln paab, ki daak bi chee,

¹⁴ le ki teen bui Sɔɔl aajab ni Abner ke, “Abner, aa ŋun maah len pu na aa?” Le Abner baa ke, “Ŋma bi tar ki finni ubɔr?”

¹⁵ Le David baa u ke, “Abner, sin le aa ye Israel yaab aanikpaan aa? Kina kan, ba ŋa saa kii saaninkpel, ubɔr? Dandana wee le unii ubaa koo ni naah dɔ nin chee na ke u nan ku saaninkpel.

¹⁶ Abner, aa yenn saatuln ni. M puu Uwumbɔr u bi n‑yoonn mɔmɔk na ke ni mɔmɔk ŋeer nkun; ba pu? naa kii nimi aaninkpel, u Uwumbɔr ŋa u ubɔr na. Lik. Ubɔr aakpaatuŋ bi la chee? Nnyun aatuun mu ba si uyil chee na bi la?”

¹⁷ Sɔɔl nan bee David aaneel le ki baa ke, “Maabo David, sin ye ee?” Le David kii u ke, “Een, Mpɔɔndaan,”

¹⁸ le ki ki len ke, “Maaninkpel, ba ŋa aa beenin san dii mi saatutunn? M ŋa ba? Ba aatunwanbir m tun?

¹⁹ Mpɔɔndaan, li pel maah kpa pu m tuk si na. Ni yaa ye Uwumbɔr le cha aa ban mi kan, kitork le ga cha u kpeln waalandak; tɔ, ni yaa ye binib kan, Uwumbɔr aapuun li dii bi; ba pu? bi jenn nyan mi Uwumbɔr aatiŋ ni, ki bui mi ke m li cha ki ti li dooni ŋiwaa.

²⁰ Taa cha bi ku mi kitiyayaŋ pu, ni daa Uwumbɔr chee na. Ba ŋa Israel yaab aabɔr dan ke u nan ku kibabr ke min na? Ba ŋa u tee mban ban mi ke maah ye timoor ni aanyoon le na?”

²¹ Sɔɔl nan kii u ke, “M tun taani. Maabo David, gir ni. Maan ki tun si taani ubaa; ba pu? aa gaa maamɔfal lii kinyeek kee. M ŋa mbaa ujɔr la. M tun titunwanbir sakpen.”

²² David nan kii u ke, “Mpɔɔndaan, saakpaatuŋ sɔ. Cha saajab ponn ni ubaa dan nan gaa ki.

²³ Uwumbɔr le tii binib bi kpa gaakii ki dii u mbamɔn na ipiin. Din wee u di si ŋa ŋŋaal ni, le maa ŋa si nibaa; ba pu? Uma Uwumbɔr le lee si ki ŋa si ubɔr.

²⁴ Maah di cha si, kaa ku si din wee pu na, Uwumbɔr ŋa mi tiwanbaan ngbaan, ki nyan mi ŋimuk mɔmɔk ni.”

²⁵ Sɔɔl nan bui David ke, “Maabo, Uwumbɔr biin aa pu. Aa ga kan tinyoor saatuln mɔmɔk ni.” Le David siir ki kal waasan pu, le Sɔɔl mu gir kun.