1 Samuel 25 - Uwumbɔr aagbaŋ

Samuel aakun aabɔr

¹ Samuel nan kpo, le Israel yaab mɔmɔk kuun dan nan wii waakpuul. Bi nan ti sub u udo aatiŋ Rama ni la. Nee aapuwɔb le David buen Parann aateersakpiin ni.

Abigail aah ter David pu na

^2-3 Uja ubaa nan bi nima wɔb, u nyan ni Kaleb aamaal ni, bi yin u ke Nabal. U nan nyan Maonn aatiŋ ni la, le ki kpa kitiŋ Kamel aatiŋ chee. U nan ye uwankpadaan la. U nan kpa ipiih ŋichur ŋitaa, ki kpa iŋoob mu lichur libaa. Upuu Abigail nan ŋan sakpen, le ki ye unii u nyi tiwan na. Nabal ma nan ye ukumɔndaan ni ubiindaan. Uma Nabal nan bi chee waapiih aakur Kamel ni,

⁴ le David, u nan bi nteersakpiin ni na ŋun u pu.

⁵ Kina pu le u nan tun waajab ponn ni kipiik ke bi buen Kamel, ki ti kan Nabal, ki di waadoon tii u.

⁶ U nan tuk bi ke bi ti bui Nabal ke: “Njɔ, David dooni si, ki mee Uwumbɔr tii si, ni saadichal, ni tiwan nimɔk aa kpa na.

⁷ U ŋun ke aa bi chee saapiih aakur, le u ban ke aa li nyi ke saapihkpaab nan bi ti chee, le taa nan ŋa bi taani ubaa. Ubaa aa nan sun baawan nibaa n‑yoonn mumɔk bi nan bi Kamel na.

⁸ Baa saapihkpaab, le bi ga bui si mbamɔn. Ti dan njim daal la, le David bui ke aa gaa timi mbamɔm. Ti gaŋ si ke aa tii timi saanaagbiib, ni aajɔnyaan David, saah ga ŋman pu na.”

⁹ David aajab nan di inaŋ yee ti tii Nabal, David aayimbil pu la, le ki si kii.

¹⁰ Le Nabal nan bui bi ke, “David aa? U ye ŋma? Maa kee ŋun u pu daalbaadaal. Kitiŋ kee gur gbii binaagbiib bi san na iwiin ilelee yee pam.

¹¹ Maan di maajikaar, ni nnyun, ni maah kɔr tiwakor ti ke m di tii binib bi chee maapiih aakor pu na tii bijab bi maa nyi baah nyan ni nin chee na.”

¹² David aajab nan gir ti bui u Nabal aah len pu na.

¹³ Le David bui bi ke, “Buu nimi aajaak aajum man.” Le bi mɔmɔk ŋa kina. David mu nan buu waajuk, le u ni bijab ikui inaa siir, ki cha ikui ilee, bi li kii baawan.

¹⁴ Nabal aanaagbiija ubaa nan ti bui Nabal aapuu Abigail ke, “Aa ŋun aa? David tun ni binib bi nyan nteersakpiin ni ke bi nan doon timi aaninkpel, le u seei bi.

¹⁵ Bi mu nan ŋa timi tiŋann pam. Baa nan muk timi, le n‑yoonn mumɔk ti nan bi bi chee timoor ni na, timi aawan nibaa aa nan wɔŋ.

¹⁶ Bi nan kii timi nwiin pu ni kinyeek, n‑yoonn mumɔk ti nan bi bi chee ki kpaa ipiih ngbaan na. M gaŋ si, dakl lik tibɔr ngbaan ki ŋa saah ban pu na.

¹⁷ Nimina ga ŋmaa tii timi aaninkpel ni waadichal tibɔbir. U kpa mbiin sakpen, kaa ban u ŋun tii ubaa.”

¹⁸ Abigail nan ŋa mala ki ban ŋiboroboro kpin ikui ilee, ni ŋisubil aadaan aadabuu ŋilee, ni baah pun ipiih i na iŋmu, ni njikaabim mu bi ken na kuruwaa kipiik ni bilole, ni ndaan aasubil ŋisab nkub, ni ŋisubimɔɔn ŋi dab tɔb na ikui ilee, ki di buu paan ibon pu,

¹⁹ le ki bui waanaagbiib ke, “Loln m pu nsan, aan m li paa ni pu.” Waa nan tee tuk uchal tibaa.

²⁰ U nan dik waabon pu cha, le ki ti ban u pɔr lisapɔl libaa ligongoln pu, le ki kpaan ton David ni waajab choo tok ni u.

²¹ David nan bi dak ke, “M nan tee ŋa kinye aan ki kii uja ngbaan aawan nteersakpiin ni? Waawan nibaa baanja aa nan wɔŋ, kina le u joo pa nterm mu m nan tii u na.

²² M yaa kaa ku bijab ngbaan mɔmɔk waahr aan kitaak nin woln kan, Uwumbɔr faa ku mi.”

²³ Abigail aah kan David na, le u sunn waabon pu mala, ki gbaan kitiŋ,

²⁴ David aanimbiin ni, ki bui u ke, “Maaninkpel, m gaŋ si, pel m chee. Cha tibɔbir ngbaan li ye min yaan.

²⁵ M gaŋ si, taa pel maabitibaani daan Nabal ngbaan. U sil ye waayimbil aatataa aah ye pu na la, ke ujɔr. Maaninkpel, maa ba bi nima le saanaagbiib dan.

²⁶ Uwumbɔr le cha saa gee liŋuul ki ku saadim. Le m puu Uwumbɔr aayimbil pu dandana wee, ke saadim ni binib bimɔk ban bi tun si titunwanbir na, ni Nabal aatafadaan ga li kpaan la.

²⁷ Maaninkpel, m gaŋ si, gaa maah joo ni si tiwan ni na, ki di tii saajab.

²⁸ Maaninkpel, m gaŋ si ke aa di cha pinn mi taani umɔk m ŋa na. Uwumbɔr ga ŋa si ubɔr, ki di kpee aayaabitiib mu; ba pu? aa bi to waatɔb la, kaan ŋa tibɔbir tibaa n‑yoonn mumɔk aa bi limɔfal ponn ni na.

²⁹ Unii yaa tak si ki ban u ku si kan, Aadindaan Uwumbɔr le ga li kii si, ke uja aah kii waawangol pu na. Saadim ma kan, u ga mee bi ke uja aah joo waataaya too pu na la.

³⁰ Maaninkpel, Uwumbɔr yaa ŋa tiwanyaan nimɔk u puu ke u ŋa tii si, ki ŋa si Israel yaab aabɔr na kan,

³¹ le saan ki bui ke ‘M yaa ba nyi kina kan,’ bee aasui bii buyoonn aa ku, kaa baa na, bee aa teen aabaa aapɔln. Maaninkpel, m gaŋ si, ke Uwumbɔr yaa nan ŋa tinyoor ŋa aa pu kan, aa taa suln mbɔr.”

³² David nan bui u ke, “Pak Uwumbɔr, u ye Israel yaab Aadindaan na, u tun ni si din wee ke aa nan ton mi nsan ni na.

³³ Doon Uwumbɔr, saalan nyaan mu pu aa tun din wee aatuln lee, ki cha maa tun titunwanbir ki ku unii ke m teen maapɔln na.

³⁴ Uwumbɔr le cha maa ŋa si nibaa. M tee puu Israel yaab Aawumbɔr u bi kaa kpa ndoon na pu, ke aa yaa kaa ba san mala ki ton mi nsan pu kan, Nabal aajab mɔmɔk ba ga kpo kitaak aa kee woln.”

³⁵ David nan gaa waah joo ni tiwan ni na ki bui u ke, “Gir kun, ki taa cha ni li muk si. M ga ŋa saah ban pu na.”

³⁶ Abigail nan gir kun Nabal u nan bi ji njim mu ŋeer ubɔr aajim na chee la. U nan nyun ndaan ki gbii, le ni mɔ u. Kina pu le waa nan bui u tibaa ki ti saa kichakpiik ni.

³⁷ Le ndaan aah nyan unimbil ni na, le u tuk u ti mɔmɔk. Usui nan fii sakpen, le u lir, kaa ki ŋmaa ŋa nibaa.

³⁸ Iwiin kipiik aah jer na, le Uwumbɔr faa ku u.

³⁹ David aah ŋun ke Nabal kpo na, le u bui ke, “Pak man Uwumbɔr. U teen Nabal waah seei mi pu, ki mu aa cha min waanaagbiija tun titunwanbir ti na pu. Uwumbɔr daa Nabal aatafal, waatunwanbir pu la.” Le David tun ti bui Abigail ke u mɔn u.

⁴⁰ Waatutum nan buen Abigail chee Kamel ni, ki ti bui u ke, “David le tun ni timi, ke ti nan yoor ni si, aan aa nan ŋa upuu.”

⁴¹ Abigail nan gbaan kitiŋ le ki bui bi ke, “M ye waanaagbiipii la, ki gor ke m ti finn waatutum aataa.”

⁴² U nan fii mala ki diŋ waabon pu. Waanaagbiipii biŋmu le nan dii u ni David aatutum buen u ti ŋa upuu.

⁴³ David nan yoor Ahinoam u nyan ni Jesreel na, le Abigail mu ki ŋa upuu.

⁴⁴ N‑yoonn mue na, Sɔɔl nan di ubisal Mikal, u nan ye David aapuu na tii Lais aajapɔɔn Palti, u nyan ni Galim aatiŋ ni na.