1 Samuel 24 - Uwumbɔr aagbaŋ

David aah san Sɔɔl kinimbaak kaa ku u pu na

¹ Sɔɔl aah nyan ni u ni Filistia yaab aatɔb ki gir ni na, le bi bui u ke, “David bi nteersakpiin mu bi Enn Gedi chee na ni.”

² Le Sɔɔl nyan Israel aajab ŋichur ŋitaa bi nyi butɔb aabɔr mbamɔm na, ki di toŋ Ipɔɔŋoob Aatakpal aawipuul wɔb, ki ban David ni waajab.

³ U nan ti fuu kitakpaluŋ kibaa chee, ki nan bi ipiih aabɔkpenn tibaa chee la, le ki koo ki ponn ni ke u ti sɔnn. Kitakpaluŋ baan ngbaan ponn ni, le David ni waajab mu nan bɔr ponn ponn ni.

⁴ Bi nan bui David ke, “Saayoonn le na. Uwumbɔr nan bui si ke u ga di saadin ŋa saapɔɔn ni, le aa ŋa u saah gee pu na.” David nan loon buen u chee, le ki ti chuu gii waabɔkul pu upuwɔb, aan Sɔɔl aa nyi ke u gii.

⁵ N‑yoonn ngbaan le naa ki piir David aasui.

⁶ Le u bui waajab ke, “Uwumbɔr taa cha m ŋa maaninkpel, u uma Uwumbɔr lee u ubɔr na taani ubaa. Maan ŋa u nibaa siib kina; ba pu? uma le Uwumbɔr ŋa u ubɔr.”

⁷ Le David aajab nan ŋun tii u, ke bi taa tak Sɔɔl. Sɔɔl nan fii, le ki nyan, ki ki kal nsan pu.

⁸ Le David paan u pu ki yin u ke, “Mpɔɔndaan.” Le Sɔɔl fenn, le David gbaan ki tii u kipak,

⁹ ki bui u ke, “Ba ŋa aa ŋun binib bi tuk si ke m ban si ke m ku si na aabɔr?

¹⁰ Aa kan ke dandana wee Uwumbɔr di si ŋa maapɔɔn ni kitakpaluŋ ngbaan ni. Maajab bibaa bui mi ke m ku si, le m san si kinimbaak, ki bui bi ke maan ŋa si taani siib kina; ba pu? Uwumbɔr le lee si ke aa li ye ubɔr.

¹¹ Lik, nte, lik saabɔkul aageln le m joo na. M ba ga ŋmaa ku si, le m tee gii nimina. Nima le ga ŋmaa mɔk si limɔkl ke maa si aa pu, kaa kpak si, ki mu aa ban m ku si. Aa bi tee mban ki ban mi ke aa ku mi, le maa kpaan ŋa si nibaa.

¹² Uwumbɔr ga ji timi aabɔr ki lik u aabɔr bii na. Saah ŋani mi pu na, uma le ga daa aatafal; ba pu? maa ban m ŋa si nibaa kpala.

¹³ Aa nyi liyataŋakl na ke, ‘Titunwanbirdam baanja le ŋani titunwanbir.’ Kina pu na, maan ŋa si nibaa.

¹⁴ Lik man Israel yaab aabɔr aah bi ban u ku tiwan ni na. Lik man waah bi san dii tiwan ni na. Libɔkpol aa? kibabr aa?

¹⁵ Uwumbɔr ga ji timi aabɔr, le ki bee u aabɔr bii na. Cha u lik tibɔr ngbaan ponn ni, ki sil mpuwɔb, ki gaa mi lii.”

¹⁶ David aah len doo na, le Sɔɔl bui ke, “Sin maabo David sil ye ee?” le ki piin ki bi wii.

¹⁷ Le u bui David ke, “Aa kpa mbamɔn, le m ma bii. Aa ŋa mi tiŋann sakpen, le m ma tun si taani.

¹⁸ Din wee, aa mɔk mi saah kpa m pu tiŋann pu na; ba pu? saa ku mi buyoonn Uwumbɔr di mi ŋa saapɔɔn ni na.

¹⁹ Nfum muŋa aan uja ga chuu waadin ki ki di cha pinn u ki cha u ŋmar? Uwumbɔr biin aa pu, saah ŋa pu tii mi din wee na pu.

²⁰ Dandana wee na, m bee ke aa ga ŋa Israel yaab aabɔr, le nnaan ngbaan li bi saajoom ni.

²¹ Tee puu Uwumbɔr aayimbil pu tii mi ke saan ku n‑yaabitiib, aan maadichal, ni maayimbil taa kuln kookoo.”

²² Le David puu tii u ke waan ku bi. Le Sɔɔl gir kun udo, le David ni waajab mu gir buen baah bɔr nin chee na.