1 Samuel 22 - Uwumbɔr aagbaŋ

Sɔɔl aah ku bitotoorb pu na

¹ David nan san nyan Gaf aatiŋ ni ki ti koo kitakpaluŋ ki bi duun Adulam aatiŋ ni na. Ukpetiib ni udo yaab bi gur na aah ŋun u pu nima chee na, le bi buen u chee.

² Binib bi nan bi limukl ni na, ni binib bi aasui nan bii aan bilan ŋmal na mu nan buen u chee. Binib bi nan buen u chee na ga nan li pii bijab ikui inaa, le u ŋa baayidaan.

³ David nan nyan nima ki buen Mispa aatiŋ ki bi Moab yaab aapepel ni na, le ki ti bui Moab aabɔr ke, “M gaŋ si ke aa cha nte ni nna dan nan li bi aa chee, ki ti saa n‑yoonn mu m ga bee Uwumbɔr aah ban u ŋa mi pu na.”

⁴ Le David cha ute ni una bi Moab aabɔr chee, le bi bi nima ki ti saa n‑yoonn mumɔk David nan bɔr kitakpaluŋ ngbaan ni na.

⁵ Le Uwumbɔr aabɔnabr Gad dan David chee ki nan bui u ke, “Taa li ka do. Li cha Juda aatiŋ ni mala.” Kina pu le David nyan nima ki buen Heref aachook ni.

⁶ Daalbaadaal le Sɔɔl nan bi Gibea aatiŋ ni, ki ka busub bubaa taab, ligongoln paab, ki joo waakpaatuŋ uŋaal ni. Waaninkpiib mɔmɔk nan si gob u. Unii ubaa nan bui u ke bi kan David ni waajab.

⁷ Le u bui waaninkpiib ke, “Li pel man, Benjaminn aajab. Ni dak ke David ga ŋmaa tii nimi ikpaakon, ni ŋisubil aasui aasar, ki ŋa nimi bininkpiib waajab ni ii?

⁸ Kina pu le ni bi kpokl m pu uu? Ni ponn ni ubaa aa bui mi ke maabo ni David kpaan bumɔb la. Ubaa aa dak m pu, kaa bui mi ke David, u ye maajab ponn ni ubaa na bi ban mi libuul lee ni, ke u ku mi, ki kpee ke njapɔɔn le pɔɔk utaakpab.”

⁹ Doeg nan si nima, Sɔɔl aaninkpiib chee, le ki bui ke, “M nan kan David, waah nan buen Ahitub aajapɔɔn Ahimelek chee, Nob aatiŋ ni pu na.

¹⁰ Ahimelek nan baa Uwumbɔr tii David, le ki tii u tijikaar, ni Filistia aanii Goliaf aajaak aajuk na.”

¹¹ Le Sɔɔl tun yin ni utotoor Ahimelek, ni waamaal mɔmɔk, bi nan ye bitotoorb ki bi Nob aatiŋ ponn ni na, le bi dan u chee.

¹² Sɔɔl nan bui Ahimelek ke, “Li pel, Ahimelek.” Le u bui ke, “Maaninkpel, m sɔ.”

¹³ Le Sɔɔl baa u ke, “Ba ŋa aa ni David bi kpokl ban mi? Ba ŋa aa nan tii u tijikaar, ni kijaak aajuk, ki baa Uwumbɔr tii u? U fenn ban mi la, ki kii nsan mu u ga di ku mi na la.”

¹⁴ Ahimelek nan kii u ke, “David le ye saatutunn u si aapuwɔb mbamɔm na. U ki ye aachool la, ki ye bijab bi kii si na aaninkpel la. Le unii mɔmɔk tii u kipak, saachiln ponn ni.

¹⁵ Een, m baa Uwumbɔr tii u. Nima le aa ye kina aabaan baanja mu m baa tii u na. Ki joo cha ni bukpokl ki ban si na ma kan, Mpɔɔndaan, taa galn mi, bee maadichal ponn ni ubaa. Maa nyi tibaa ki joo cha kina wɔb.”

¹⁶ Le ubɔr ngbaan bui u ke, “Ahimelek, sin ni saamaal mɔmɔk ga kpo la,”

¹⁷ le ki bui bijab bi si kii u na ke, “Ku Uwumbɔr aatotoorb ngbaan. Bi ni David le kpaan, le baa tuk mi ke u san, hali bi nan nyi n‑yoonn mu u san na.” Le bikikiib ngbaan yii, kaa di biŋaal mee Uwumbɔr aatotoorb ngbaan.

¹⁸ Le Sɔɔl bui Doeg ke, “Sin, ku bi.” Le Doeg ku bi mɔmɔk. Liyaadaal ngbaan u nan ku bitotoorb bi nan ŋeer ke bi peen utotoor aabɔkul na imonko inaa ni biŋmu la.

¹⁹ Sɔɔl nan ki cha bi ku bitotoorb aatiŋ Nob aanib mɔmɔk: bi nan ku bijab ni bipiib, ni bibilb ni mbipɔm, ni inaa, ni ibon, ni ipiih mɔmɔk.

²⁰ Ahimelek aajapɔɔn Abiatar ma nan san ŋmar, ki buen David chee,

²¹ ki nan bui u Sɔɔl aah ŋar Uwumbɔr aatotoorb ŋŋaan pu na.

²² Le David bui u ke, “Maah nan kan Doeg nima chee liyaadaal ngbaan na, m nan bee ke u ga ti bui Sɔɔl. Kina pu na, min pu le bi ku aado yaab mɔmɔk.

²³ Li bi m chee do, ki taa san ijawaan. Sɔɔl ban min ni sin mɔmɔk ke u ku timi la. Aa mu tee ga li kpa limɔfal m chee.”