1 Samuel 21 - Uwumbɔr aagbaŋ

David aah san Sɔɔl chee pu na

¹ David nan san buen utotoor Ahimelek chee, Nob aatiŋ ni. Ahimelek aawon nan gbaa, le u nan ton u nsan ni ki baa u ke, “Ni ŋa kinye aan aa nan bi do aabaa baanja?”

² Le David bui u ke, “M bi do ubɔr aatuln pu la. U bui mi ke m taa cha ubaa li nyi waah tun mi ke m ti ŋa pu na. Maajab ma kan, m bui bi ke bi keln mi nibaa chee.

³ Tɔ, dandana wee na, aa kpa ba? Tiin mi ŋiboroboro kpin ŋiŋmu, bee saah ti ki kpa tiwan nimɔk na.”

⁴ Le utotoor ngbaan bui u ke, “Maah kpa tijikaar ti na le ye boroboro u bi di tii Uwumbɔr na. Saajab yaa kaa doon bipiib chee iwiin ilee yee kan, aa ga ŋmaa yoor ŋi.”

⁵ David nan bui u ke, “Mbamɔn, baa doon. N‑yoonn mɔmɔk kan, maajab joo bibaa chain la, hali ti yaa cha timi aatuln pu kan baa ŋani tijɔŋ, ŋmaninkabaa litukpaan li pu ti bi na.”

⁶ Kina pu le utotoor ngbaan nan di boroboro ngbaan tii David. Ŋiboroboro kpin ŋi bi nan di tii Uwumbɔr, aan ki nan nyan ŋi bil, ki ki ban ŋibaa teen na le na.

⁷ Sɔɔl aanaakpaaninkpel, u bi yin u ke Doeg na, aan u nyan Edom aatiŋ ni na, nan bi nima liyaadaal ngbaan; ba pu? u nan bi nima u toor ubaa nsan mu u dii na pu la.

⁸ Le David baa utotoor na Ahimelek ke, “Saa kpa kikpaatuŋ, bee kijaak aajuk kibaa do ki tii mi ii? Ubɔr aatun ngbaan aah bir sakpen pu na, m nan gee woween, le kaa ŋmaa yoor maajawan nibaa.”

⁹ Ahimelek nan kii u ke, “M kpa Filistia aanii Goliaf, u aa nan ku u Ela Aafataŋ ni na le aajaak aajuk do. Ki poo likekeln ni, ki tii tab utotoor aabɔkul na aapuwɔb. Aa yaa gee ki kan, yoor ki, kima baanja le bi do.” Le David bui u ke, “Di ki tii mi. Kibaa aa ki bi nibaa chee ki jer ki.”

¹⁰ Le David nan siir, ki san ke u ŋmar Sɔɔl chee, ki ti fuu Gaf aatiŋ Aabɔr Akis chee.

¹¹ Ubɔr ngbaan aaninkpiib nan baa u ke, “Naa ye David, u ye waatiŋ aabɔr na sɔ ɔɔ? Uja wee pu le bipiib nan gaa ilahn ki waa liwaal ke, ‘Sɔɔl ku ŋichur la, le David ma ku ŋichur kipiik kipiik.’”

¹² Baaliin ngbaan nan koo David aasui ni pam, le u gur san Ubɔr Akis ijawaan.

¹³ Kina pu na, n‑yoonn mu bi ti bi u chee na kan, u ŋmanni le ke uyil le aah bii na. Le bi yaa ban bi ŋmin u kan, u ŋani ke waah ye uwaar le na, le ki ŋmee tiwan yɔl yɔl jaaleŋ mam pu, le timɔɔtan puu dii ulangbaln ki lir kitiŋ.

¹⁴ Kina pu le Akis bui waaninkpiib ke, “Lik man, uja ngbaan ye uwaar la. Ba ŋa ni joo ni u m chee?

¹⁵ Maah kpa biwaarb bi na aa ŋeer mi la aa? Ba ŋa ni ki joo ni uwaar uken ke u nan di waawaawan nee ŋa nnimbil ni, ndo do kina?”