1 Samuel 20 - Uwumbɔr aagbaŋ

Jonatann aah ter David pu na

¹ Le David san nyan Nayof ni, Rama aatiŋ ni, ki buen Jonatann chee, le ki ti baa u ke, “M ŋa ba? M bii ba aabiil? Ba aataani aan m ŋa aate, le u ban mi, u ku mi?”

² Jonatann nan kii u ke, “Uwumbɔr aan kii ke aa kpo. Nte yaa ban u ŋa nimɔk, ni ye tibɔkpaan bee bɔfam kan, see u bui mi. Waa joo tibaa bɔrni mi. Naa ye mbamɔn.”

³ Le David kii u ke, “Aate nyi mbamɔm saah gee mi pu na, le ki yii kaan cha aa bee waalandak; ba pu? ni ga bii aasui sakpen. M puu Uwumbɔr u bi n‑yoonn mɔmɔk na ke ntaal libaa bi mbuu ni, le liken mu bi lipaal.”

⁴ Le Jonatann bui ke, “M ga ŋa saah ban pu na mɔmɔk.”

⁵ Le David bui u ke, “Fen le fe ye Uŋmapɔɔn Aajim, le ni ŋan ke m ji mu ubɔr chee. Ni yaa ga li ŋan aa chee kan, m ga buen ti bɔr ikpaakon ponn ni, ki ti saa daalpu aajook.

⁶ Aate yaa bee ke maa bi njim ngbaan aayoonn kan, bui u ke m mee aa chee nsan ke m san mala kun Betlehem, ke ni ŋeer timi aadichal aabiln aatork nima chee.

⁷ U yaa bui si ke, ‘Tɔ, ni ŋan’ kan, m ga li kpa limɔfal. U yaa gee liŋuul kan, aa ga bee ke u sil ban u ku mi la.

⁸ M gaŋ si la, ŋa mi tiŋann timina, ki li joo tipuukpaan ti aa nan puu tii mi na. Tɔ, min le yaa galn kan, ku mi aabaa. Taa ki di mi buen aate chee.”

⁹ Jonatann nan bui u ke, “Taa dak kina aawan pu. M yaa ba sil nyi ke nte sil ban u ku si kan, m ba ga bui si.”

¹⁰ Le David ki baa u ke, “Ŋma ga cha m bee ke aate aasui fii buyoonn aa len u chee na?”

¹¹ Jonatann nan bui u ke, “Cha ti buen ikpaakon ponn ni.” Le bi buen,

¹² le Jonatann bui David ke, “Israel yaab Aadindaan Uwumbɔr li ye timi aaseeraadaan. Kinakokoona daalpu, m ga baa nte. Waah ga kii mi pu na yaa ŋan kan, m ga cha aa ŋun.

¹³ U yaa sil dak ke u ku si kan, aan maa cha aa ŋun ki san ŋmar kan, Uwumbɔr faa ku mi. Uwumbɔr li bi aa chee ke waah nan bi nte chee pu na.

¹⁴ M yaa kaa kpo ki bi kan, m gaŋ si ke aa li joo tipuukpaan ti aa nan puu na, ki kii tii mi n‑yoonn mɔmɔk. M yaa ti ki kpo kan,

¹⁵ li bi maadichal chee ke saah nan bi m chee pu na, ki ti saa n‑yoonn mu kaa kpa ndoon na, aan Uwumbɔr yaa nan ku doo saadim kan,

¹⁶ u cha taah puu tipuur ti na li beenin bi. Aa yaa bii ti kan, Uwumbɔr ga daa aatafal.”

¹⁷ Jonatann nan ki cha David puu ke u gee u; ba pu? Jonatann nan gee David ke waah gee ubaa pu na.

¹⁸ Le Jonatann bui u ke, “Fen aah fe ye Uŋmapɔɔn aajim na, aa yaa kaa fe bi kan, bi ga bee.

¹⁹ Le daalpu kan, ni ga moo nyaŋ. Kina pu na, li cha saah nan bɔr nin chee na, ki bɔr ŋitakpakpuk na aapuwɔb.

²⁰ Le m ga nan too ipiin itaa, ke maah waa tiwan le na.

²¹ Le m ga bui maanaagbiija ke u ti pii ni i. M yaa bui u ke, ‘Lik, ipiin ngbaan bi lipepel lee wɔb, ti pii ni i’ kan, ni mɔk ke aa kpa limɔfal ki ga ŋmaa nyan ni. M puu Uwumbɔr u bi n‑yoonn mɔmɔk na ke saan li bi linimaln ponn ni.

²² Tɔ, m yaa bui u ke, ‘Ipiin ngbaan lakr aa pu’ kan, li san; ba pu? Uwumbɔr le bui si ke aa li cha.

²³ Tipuur ti ti puu tii tɔb na ma kan, Uwumbɔr le ga cha ti li joo ti n‑yoonn mɔmɔk.”

²⁴ Le David buen ti bɔr ikpaakon ngbaan ponn ni. Uŋmapɔɔn aajim aayoonn, le Ubɔr Sɔɔl buen ti kal tijikaar chee,

²⁵ waakakaa ni, ligoln chee. Abner mu nan kal paan u pu, le Jonatann kal lipepel liken na, aan u ni ute aanimbil lik tɔb. Ubaa aa nan ka David aakakaa chee.

²⁶ Sɔɔl mu aa nan len tibaa liyaadaal ngbaan; ba pu? u nan dak ke, “Nibaa le ga li ŋa u, le waa toor ubaa kiir njim ngbaan.”

²⁷ Kitaak aah woln na, nwiin mu paa Uŋmapɔɔn aajim aawiin pu na, ubaa aa nan ti ki ka David aakakaa ni. Le Sɔɔl baa Jonatann ke, “Ba ŋa David aa dan nan jin fen na, ni din wee mu?”

²⁸ Le Jonatann bui u ke, “U mee mi nsan ke m cha u buen Betlehem la.

²⁹ U bui ke, ‘M gaŋ si, cha m buen. Timi aadichal bi toor kitork aajim kitiŋ ponn ni, le nkpel bui ke m li bi nima. Kina pu na, aa yaa ye njɔ kan, cha m buen ki ti kan ndo yaab.’ Nima pu le waa bi ti chee u ji tijikaar.”

³⁰ Sɔɔl aaŋuul nan fii Jonatann pu sakpen, le u bui u ke, “Ubɔnbo wee. Dandana wee m bee ke aa si David aapuwɔb la, le ki bi jinni aabaa ni aana ngbaan inimɔɔn.

³¹ Saa nyi ke David yaa kpa limɔfal kan, saan ŋmaa ji nnaan kitiŋ kee pu kpala aa? Ti li joo ni u do, aan m ku u.”

³² Le Jonatann baa u ke, “Ba ŋa aa ban aa ku u? U ŋa ba?”

³³ Sɔɔl aah ŋun kina na, le u too Jonatann kikpaatuŋ ke u ku u, le Jonatann bee ke ute sil ban u ku David la.

³⁴ Jonatann nan di liŋuul fii tijikaar ngbaan chee, kaa jin nibaa liyaadaal ngbaan; nwiin mu nan paa Uŋmapɔɔn aajim aawiin pu na le na. Ute aah nan seei David pu na, usui nan bii pam.

³⁵ Kitaak ki nan paa ki woln na, Jonatann nan buen ikpaakon ngbaan ni, u ti kan David, baah nan siin pu na. U nan joo unachipɔnbo,

³⁶ le ki bui u ke, “San ti pii ni ipiin i m ban m too na.” Le unachipɔnbo ngbaan san cha, le Jonatann too mpiin lii umɔb pu.

³⁷ Unachipɔnbo ngbaan aah ti fuu nin chee mpiin lir na, le Jonatann teen bui u ke, “Mpiin ngbaan bi aamɔb pu.

³⁸ Taa si nima. Ŋa mala.” Unachipɔnbo ngbaan nan pii mpiin ngbaan le ki gir ni waaninkpel chee,

³⁹ kaa nyi ni mɔmɔk aatataa. Jonatann ni David baanja le nan nyi.

⁴⁰ Jonatann nan di tijawan ngbaan tii ubo ngbaan, ki bui u ke u di ni kun kitiŋ ponn ni.

⁴¹ Unachipɔnbo ngbaan aah siir cha na, le David fii sil ki nyan ŋitakpakpuk ngbaan aapuwɔb, ki lir gbaan utaaŋaayil pu ki di unimbil chiŋ kitiŋ nfum mutaa. U ni Jonatann mɔmɔk nan bi wii le ki moor tɔb aatakpin. David aasui aah nan bii pu na nan jer Jonatann yaan.

⁴² Le Jonatann bui David ke, “Uwumbɔr li bi aa chee. Uwumbɔr ga cha m ni sin, ni timi aayaabitiib li joo tipuukpaan ti ti puu tii tɔb na.” Le David siir, le Jonatann mu gir buen kitiŋ ponn ni.