1 Samuel 2 - Uwumbɔr aagbaŋ

Hana aameel

¹ Le Hana mee Uwumbɔr ke: “Uwumbɔr di mpopiin gbiin nsui ni, waah ŋa pu tii mi na, nsui piir sakpen. M laa maadim; Uwumbɔr aah ter mi pu na tii mi mpopiin sakpen.

² Ubaa aa bi chain ke Uwumbɔr na; ubaa aa bi ke uma na, ukikiir ubaa aa bi ke timi Aawumbɔr na.

³ Di cha nimi aapupuk ngbaan man; ŋmin man nimi aagaak aamɔliin ngbaan; ba pu? Uwumbɔr ye Uwumbɔr u nyi na la, le ki nyi binib mɔmɔk aah ŋani pu na.

⁴ Bijab bi pɔɔ na aatɔi kool la, le bi kaa kpa mpɔɔn na moo pɔɔk.

⁵ Binib bi nan kpa ki ji babr na gur joo bibaa le kooh ki kpiini bibaa; nkon aah nan joo bi na gur ji gunni la. Upii u nan ye uŋoob na gur kpa mbim mulole la, le upii u nan kpa mbim pam na aa ki kpa ubaa gur.

⁶ Uwumbɔr ku la, le ki ki tii limɔfal; u cha binib chaa kitekpiitiŋ ni, le ki tii binib limɔfal.

⁷ U ŋani binib bibaa bigiim, le ki ŋani biken biwankpadam. U sunni bibaa taab, le ki ŋani biken binikpaam.

⁸ U nyan ni bigiim titan ponn ni, ki nyan ni binib bi kaa kpa na baanimbaak ponn ni. U ŋani bi mbɔrbim aajɔtiib, ki joo bi kaani binikpaam aakakaa chee. Uwumbɔr le naan kitiŋ kee aatinyikl, le ki pɔɔ, litinyikl lee pu le u naan dulnyaa.

⁹ Waanib bi dii u mbamɔm na, u kii baamɔfal, le bibiindam ma beer mbɔmbɔɔn ni. Uja aan ŋmaa di ubaa aapɔɔn kan linyaŋ.

¹⁰ Uwumbɔr aadim ga kuln; u bi paacham ki ga teen bi pu ke utaal na. Uwumbɔr le ga ji dulnyaa mɔmɔk tibɔr; u ga tii waabɔr mpɔɔn, u ga cha waah lee ubɔr u na kan linyaŋ.”

¹¹ Tɔ, Elkana gir kun Rama, le Samuel u laa ye ubo na gaar Silo, ki tun Uwumbɔr aatuln, utotoor Eli chee.

Eli aajapɔtiib aah bir pu na

¹² Eli aajapɔtiib nan ye bibiindam la. Bitafal aa nan bi Uwumbɔr ni,

¹³ kaa nan bi ikaal i nan mɔk utotoor aah ga ban tiwan ni binib chee na ni. Baah nan labr ŋani pu na sɔ: unii yaa nan bi toor waatork kan, le utotoor aatutunn ga dan, ki joo ni nnanmoon mu yakr ŋipan ŋitaa na, buyoonn tinann ngbaan beenin tɔk mmii pu na,

¹⁴ le u di nnanmoon ngbaan saa tinann ngbaan ponn ni, le nnanmoon ngbaan aah saa tuun tinann timɔk na ye utotoor aanann la. Israel yaab bimɔk choo Silo ki nan toor kitork na, bi nan ŋani bi mɔmɔk kina la;

¹⁵ ki ki kpee na, waahr aan bi nin di nkpan na pu mmii ni mu ti wu doo na, utotoor aatutunn ngbaan ga dan ki nan bui unii u bi toor kitork ngbaan na ke, “Tii mi tinann tibaa m ti tii utotoor aan u pu; waan gaa saah ŋaa ti na, u ban tinankaab baanja la.”

¹⁶ Udaan yaa bui ke, “Cha ti ŋa ikaal aah mɔk pu na waahr, ki pu nkpan aan aa nin lee saah ban pu na” kan, le utotoor aatutunn ngbaan ga bui ke, “Aayii. Di ti tii mi dandana wee. Aa yaa yii kan, m ga di mpɔɔn le lee ti.”

¹⁷ Baah nan lik seen Uwumbɔr aatork pu na, Eli aajapɔtiib aatunwanbir ngbaan nan bir Uwumbɔr chee pam.

Samuel aah nan bi Silo ni pu na

¹⁸ N‑yoonn mue na Samuel u nan laa ye ubo na nan beenin bi tun Uwumbɔr aatuln, ki pee libɔkul li bitotoorb peeni na.

¹⁹ Libiln mɔmɔk kan, una nan luu libɔkul waatiir, le ki joo ti tii u, buyoonn u cheeni uchal ke u ti toor libiln libiln aatork na.

²⁰ Le Eli ga ŋa Uwumbɔr aanyoor ŋa Elkana ni upuu pu, ki bui Elkana ke, “Uwumbɔr tii si mbim muken upii wee chee aan bi leŋ naah di ubo u tii u na aaleleŋ.” Nee aapuwɔb le bi gir kun.

²¹ Uwumbɔr mu nan sil ŋa waanyoor ŋa Hana pu, le u nan ki ma mbijabim mutaa, ni mpiibim mulee. Samuel nan fii ki chikr Uwumbɔr aatuln ponn ni la.

Eli ni ujapɔtiib aabɔr

²² N‑yoonn mue Eli nan por pam. U nan beenin ŋun ujapɔtiib aah nan ŋani Israel yaab mbiin pu na, ni baah kpaan doo bipiib bi tun lituln Uwumbɔr Aabool aabisamɔb na chee pu na.

²³ Le u bui bi ke, “Ba ŋa ni ŋani tiwan nimina mɔmɔk? Binib mɔmɔk tuk mi naah tun titunwanbir ti na la.

²⁴ Njapɔtiib, di cha man ni. Tiwan ni Uwumbɔr aanib len naabɔr na aa ŋan kpala.

²⁵ Unibɔn yaa tun uŋeen aatɔ taani kan, nibaakan Uwumbɔr ga san u kinimbaak, tɔ, ŋma ga ter unii u tun Uwumbɔr titunwanbir na?” Le baa pel bite aah len pu na, ba pu? Uwumbɔr nan siin ke u ku bi.

²⁶ Samuel nan beenin chikr cha, le ki kpa kipak binib ni Uwumbɔr mu chee.

Uwumbɔr kpiir Eli aadichal aabɔr len

²⁷ Uwumbɔr aabɔnabr ubaa nan dan Eli chee ki joo ni Uwumbɔr aanaŋ yee ke: “Aayaaja Aaronn ni waadichal aah nan ye binaagbiib Ijipt aatiŋ aabɔr Faro chee na, m nan di mbaa mɔk Aaronn.

²⁸ Israel aamaal mɔmɔk ponn ni, m nan lee waadichal le ke bi li ye maatotoorb, ki li toor kitork libimbiln paab, ki see tiwan ni nu mɔ na, ki li pee bitotoorb aawanpeenkaan, ki li bi maadiik ni. M mu nan tii bi nsan ke bi li yeh kitork aanann ti bi joo seer mmii ponn ni na tibaa.

²⁹ Ni ki ŋa kinye aan ni ki lik waa kitork ni ipiin i m ban maanib chee na? Eli, ni ŋa kinye aan aa pak aajapɔtiib ki jer mi, ki cha bi ji maanib aatork aanann ti ŋan sakpen aan bi ba ban bi di tii mi na, ki moo filk cha?

³⁰ Min, Israel yaab Aadindaan Uwumbɔr le nan puu n‑yoonn mu jer na ke saadichal ni saamaal le ga li tun maatuln ke bitotoorb na n‑yoonn mɔmɔk. Le dandana wee m len ke maan ŋa nimi kina. Maah ga ŋa pu na sɔ, m ga nyuŋ binib bi nyuŋni mi na la, le ki lik seen binib bi lik mi fam na.

³¹ Li pel, n‑yoonn choo le m ga ku binachipɔm bimɔk bi saadichal, ni saamaal ponn ni na, le uja ubaa taa ki li bi saadichal ni ki ti por.

³² Ni ga li muk si le aa lik ki neen tinyoor ti m ga di tii Israel yaab biken na, le ubaa aan ki li bi saadichal ponn ni ki ti por.

³³ Tɔ, m ga cha aayaabitiib ponn ni ubaa gur, ki li tun maatuln ke utotoor na, le u mu ga nan jɔb aan utaakpab yɔl, le aayaabitiib bi gur na ga kpo mpɔɔnkun.

³⁴ Tiwan ni ga mɔk si ke maah len pu na ga gbiin na le ye ke aajapɔtiib bilee na, Hofni ni Fineas, ga kpaan kpo liwinbaal la.

³⁵ Le m ga lee utotoor u ga dii mi mbamɔm, ki ŋani tiwan nimɔk m ban na. M ga tii u yaabitiib bi ga li tun maatuln, maabɔr u m lee u na chee n‑yoonn mɔmɔk.

³⁶ Aayaabitiib ponn ni u ŋmar na ga li chaa utotoor ngbaan chee le ki ti mee ŋimombil, ni tijikaar, le ki gaŋ u ke u cha u ter bitotoorb baatuln ni, aan ki kan nibaa ki ti kpiin ubaa.”