1 Samuel 19 - Uwumbɔr aagbaŋ

Sɔɔl aah siin ke u ku David pu na

¹ Sɔɔl nan bui ujapɔɔn Jonatann, ni waaninkpiib bi gur na, ke u ga ku David. Jonatann mu nan tee gee David aabɔr sakpen,

² le ki bui u ke, “Nte ban u ku si la. Fe li kii aabaa kichakpiik ni. Buen ti bɔr mbɔbɔr mubaa ni, ki li bi nima.

³ M ga fe dan nan sil gbaŋ nte, nkpaakon mu ni aa bɔr na, ki bui u saabɔr. M yaa kan tibaa kan, m ga cha aa ŋun.”

⁴ Jonatann nan pak David ute Sɔɔl chee, ki bui u ke, “Maaninkpel, taa ŋa saatutunn David taani ubaa. Waa kee ŋa si taani ubaa; waah tee ŋa ni na le ye ke n‑yoonn mɔmɔk u ter si la.

⁵ U nan di waamɔfal ŋa uŋaal ni, le ki ti ku Goliaf, le Uwumbɔr tii Israel yaab mɔmɔk linyaŋ sakpeln. Saah nan kan kina na, ni nan mɔ si la. Ba tee ki ŋa, aa ki ban aa tun titunwanbir unii u kaa kpa taani ubaa na pu, ki ku David, tibɔr ti kaa kpa tataa na pu?”

⁶ Sɔɔl nan ŋun tii Jonatann aah len pu na, le ki puu Uwumbɔr aayimbil pu ke waan ku David.

⁷ Kina pu le Jonatann nan yin David ki nan bui u ti mɔmɔk; ki di u buen Sɔɔl chee. Le David ti ki tun tii ubɔr, ke waah nan ti ŋani pu na.

⁸ Le Filistia yaab ni Israel yaab aajaak na nan ki fii. David nan ti tak bi, ki nyaŋ bi, le bi san.

⁹ Daalbaadaal, le tiyayaar ti nyan ni Uwumbɔr chee na fii Sɔɔl pu. U nan ka waadichal ni, ki joo kikpaatuŋ uŋaal ponn ni. Le David mu bi nima, ki gbaa kibeek.

¹⁰ Sɔɔl nan pɔɔn ubaa ke u too David kikpaatuŋ tam lidigbimal, le David miln. Le kikpaatuŋ ngbaan ti yun baan lidigbimal. Le David nan san le ki ŋmar.

¹¹ Kinyeebaan ngbaan le Sɔɔl tun bijab bibaa, ke bi ti li kii David aadichal, aan ni yaa woln kan, bi ku u. Le David aapuu Mikal bui u ke, “Aa yaa kaa san kinyeek kee kan, bi ga fe ku si fen.”

¹² U nan ter David le u dii takolu nyan, ki san ŋmar.

¹³ Le Mikal yoor baadichal ni aawaal ki di paan tiwandookaan pu, ki di liyikukur li bi di uŋoob aagban ŋal li na kur liyil, ki di likekeln biin li pu.

¹⁴ Sɔɔl aajab aah dan nan ban David na, le Mikal bui bi ke u bun la.

¹⁵ Le Sɔɔl ki giin ni bi, ke bi nan kan David bibaa. U nan bui bi ke, “Ti li joo ni u tiwandookaan ngbaan pu man, aan m nan ku u.”

¹⁶ Bi nan ti koo le ki kan ke liwaal le dɔ tiwandookaan pu ki kur uŋoob aagban aayikukur.

¹⁷ Sɔɔl nan baa Mikal ke, “Ba ŋa aa ŋmann mi kina, ki cha maadin ŋmar mi?” Le u bui u ke, “U bui mi ke m yaa kaa cha u san kan, u ga ku mi.”

¹⁸ David nan san ŋmar, le ki buen Samuel chee, Rama aatiŋ ni, ki ti bui u Sɔɔl aah ŋa u pu na mɔmɔk. Le u ni Samuel buen Nayof, ki ti bi nima.

¹⁹ Bi nan bui Sɔɔl ke David bi Nayof ni, Rama aatiŋ ni.

²⁰ Le u tun ke bi ti chuu ni u. Bi nan ti fuu nima, ki kan Uwumbɔr aabɔnabtiib bi Samuel nan ye baayidaan na bi pak Uwumbɔr, Waafuur Nyaan aapɔɔn pu. Le Uwumbɔr Aafuur Nyaan gbiin Sɔɔl aajab ngbaan, le bi mu piin ki pak Uwumbɔr, Waafuur Nyaan aapɔɔn pu.

²¹ Sɔɔl aah ŋun kina na, le u ki tun biken. Le bi mu ti piin ki pak Uwumbɔr kina. Le u ki tun biken taataa. Le tiwanbaan ngbaan ki ŋa bi mu.

²² Nee aapuwɔb, le u fii ubaa, ki cha Rama ni. Waah nan ti fuu Seku aanyunbun sakpiin na chee na, le u baa binib, Samuel ni David aah bi nin chee na. Le bi bui u ke bi bi Nayof,

²³ le u cha nima chee. Waah cha na, le Uwumbɔr Aafuur Nyaan gbiin u mu, le u pak Uwumbɔr, Waafuur Nyaan aapɔɔn pu, ki ti saa Nayof.

²⁴ U nan chuu peer waawanpeenkaan ki pak Uwumbɔr, Waafuur Nyaan aapɔɔn pu, Samuel aanimbiin ni. Nwiin ngbaan pu ki ti woln kitaak, u nan dɔ u ŋmeen la. Nima chee le tibɔr tee nan nyan ni ke, “Sɔɔl mu kpaln Uwumbɔr aabɔnabr la aa?”