1 Samuel 18 - Uwumbɔr aagbaŋ

¹ Sɔɔl ni David aah nan gbaa baabɔr doo na, nee aapuwɔb le Sɔɔl aajapɔɔn Jonatann aasui koo David ni sakpen, le u gee u ke waah gee ubaa pu na.

² Ki nyan liyaadaal ngbaan, Sɔɔl nan cha David gaar u chee, kaa ki gir kun.

³ Jonatann nan puu limɔfal aajɔtiik aapuur tii David, waah gee u sakpen pu na.

⁴ U nan chuu peer waah pee libɔkul li paacham na di tii David, ki di waajaak aabɔkul, ni waajaak aajuk, ni waatɔm, ni waagbapapaln mu tii u.

⁵ Sɔɔl aah nan tun David lisachuln limɔk na, u nan kani linyaŋ li ponn ni la. Kina pu le Sɔɔl nan di u ŋa waajab aaninkpel ubaa. Nimina nan piir bijab ngbaan, ni baaninkpiib biken na mu aasui.

Sɔɔl aah gur kpa lipiipoln David pu pu na

⁶ David aah ku Goliaf aan u ni bijab gir choo kun ni na, bipiib nan nyan ni ntim mɔmɔk, Israel aatiŋ ni, ki dan bi nan tooh ubɔr Sɔɔl nsan ni. Bi nan gaa mpopiin aalahn, ki waa liwaal, ki yak ichayakrtuun ki gbaa tibar.

⁷ Baah nan bi ŋani kina na, le bi nan gaa ilahn ke, “Sɔɔl ku ŋichur la, le David ma ku ŋichur kipiik kipiik.”

⁸ Sɔɔl aa nan gee kina, le waaŋuul fii sakpen. Le u bui ke, “David ma kan, bi tii u ŋichur kipiik kipiik la, le ki tee tii m ma ŋichur baanja. Lelee kan, bi ga ban bi kaan u nnaan la.”

⁹ Kina pu le u nan piin ki ŋani David lipiipoln, ki dak u pu ti kaa ŋan na.

¹⁰ Kitaak aah woln na, le tiyayaar ti nyan ni Uwumbɔr chee na fii Sɔɔl pu libuul ni, le u ŋma tijar udo ke uwaar na. David nan bi gbaa kibeek, ke waah ti ŋani pu iwiin mɔmɔk na, le Sɔɔl ka joo kikpaatuŋ uŋaal ni, le ki bui ubaa ke,

¹¹ “M ga too u tam lidigbimal,” le ki too u nfum mulee, le David miln mu mɔmɔk.

¹² Sɔɔl nan gur san David ijawaan la; ba pu? Uwumbɔr nan siir cha uma Sɔɔl ki bi David chee.

¹³ Kina pu le u nan jenn nyan David u chee, ki di u ŋa bijab lichur aaninkpel. Le David nan lolni waajab pu nsan butɔb ni,

¹⁴ ki kani linyaŋ tiwan nimɔk u ŋa na ponn ni; ba pu? Uwumbɔr nan bi u chee.

¹⁵ Sɔɔl nan kan David aah kpae pu na, le ki moo san u ijawaan.

¹⁶ David aah nan moo kpae pu na, Israel ni Juda aanib mɔmɔk nan gee u la.

David aah yoor Sɔɔl aabisal pu na

¹⁷ Sɔɔl nan bui David ke, “Mbisal upol Merab sɔ. Aa yaa tun tii mi ki kaar ke uja u si udindaan aapuwɔb mbamɔm na, ki jaa Uwumbɔr aatɔb ponn ni kan, m ga cha aa di u ŋa aapuu.” Sɔɔl nan dak ke u yaa ŋa kina kan, Filistia yaab le ga ku David, naan li ye uma.

¹⁸ David nan kii u ke, “M ni nte aadichal ye ŋma aan m ga li ye ubɔr aachool?”

¹⁹ N‑yoonn aah nan tee fuu ni ke bi di Merab tii David na, bi nan labr di u tii Mehola aatiŋ ni aaja u bi yin u ke Adriel na.

²⁰ Tɔ, Sɔɔl aabisal Mikal aasui nan koo David ni, le Sɔɔl aah ŋun kina na, ni nan mɔɔr u.

²¹ Le u bui ubaa ke, “M ga di Mikal tii David la. M ga di Mikal pen u gaawɔb la, le Filistia yaab ku u.” Le Sɔɔl ki bui David ke, “Aa ga kpaln nchool la.”

²² U nan cha waaninkpiib loon bui David ke, “Ubɔr gee si la, le waaninkpiib mu gee si, kina pu na, n‑yoonn mue le ŋan ke aa yoor ubisal.”

²³ Le bi bui David kina, le u bui ke, “Ni ye litukpaan le ke unii li ye ubɔr aachool. M ye ugiin la, le ubaa aa lik waa mi kpala ke m li ye ubɔr aachool.”

²⁴ Sɔɔl aaninkpiib ngbaan nan ti bui u, David aah len pu na.

²⁵ Le Sɔɔl ki bui bi ke bi ti tuk David ke, “Ubɔr aah ban tichoowan ni aa chee na le ye Filistia aajab aanikpol aanimbiin ni aawan aagban nkub, ke u di teen waadim.” Sɔɔl aah nan kpokl pu ke Filistia yaab ku David na le bi na.

²⁶ Sɔɔl aaninkpiib nan ti tuk David, Sɔɔl aah len pu na, le ni piir usui ke u ga kpaln ubɔr aachool. Waahr aan nwiin mu bi siin tibɔndinn nin fuu ni na,

²⁷ David ni waajab nan buen ti ku Filistia aajab ikui ilee la. U nan joo ni, ki nan kahn binimbiin ni aawan aagban ngbaan ubɔr aanimbiin ni, ke u kpaln ubɔr aachool. Kina pu na, Sɔɔl nan di ubisal Mikal tii David.

²⁸ Sɔɔl nan bee ke Uwumbɔr bi David chee, le ubisal mu ki gee u.

²⁹ Kina pu le u nan moo san David ijawaan, ki kpaln waadin, ki ti saa waakundaal.

³⁰ Filistia aajab nan choo nan tak Israel yaab, le butɔb mɔk ponn ni kan, David le nan kani linyaŋ ki jer Sɔɔl aajab aaninkpiib biken na. Kina pu na, David nan kan liyimbil pam.