1 Samuel 16 - Uwumbɔr aagbaŋ

Uwumbɔr aah lee David u li ye Israel yaab aabɔr pu na

¹ Uwumbɔr nan bui Samuel ke, “Aa ga li wii Sɔɔl pu ni ti yunn kinye? M yii u ke u taa ki li ye Israel yaab aabɔr. Tɔ, ban olif aakpan ki buen Betlehem ni, uja u bi yin u ke Jese na chee; ba pu? m lee ujapɔɔn ubaa ke u li ye ubɔr.”

² Le Samuel baa u ke, “M ga ŋa kinye ki ŋa kina? Sɔɔl yaa ŋun kan, u ga ku mi.” Le Uwumbɔr bui u ke, “Chuu unaabo ki li joo, ki bui ke aa cha aa ti toor kitork tii min Uwumbɔr la.

³ Yin Jese u dan kitork ngbaan ni. M ga nan bui si saah ga ŋa pu na. Uja u m ga mɔk si na, le aa ga lee u, u nan li ye ubɔr.”

⁴ Samuel nan ŋa Uwumbɔr aah bui u ke u ŋa pu na, le ki buen Betlehem ni. Nima chee aayidam aawon nan gbaa, le bi too u nsan ni, ki baa u ke, “Saamann mue ye nsuudoon aamann la aa?”

⁵ Le Samuel bui bi ke, “Een, m dan m nan toor kitork tii Uwumbɔr la. Toor nibaa man, aan ti buen.” U nan toor Jese ni ujapɔtiib ke bi dan kitork ngbaan ni.

⁶ Baah ti fuu na, le Samuel kan Jese aajapɔɔn u bi yin u ke Eliab na, le ki bui ubaa ke, “Uja u si do Uwumbɔr aanimbiin ni na sil ye unii u u lee na.”

⁷ Le Uwumbɔr bui u ke, “Taa lik waah fɔk ki ŋan pu na pu. M yii u; ba pu? maa dak ke unibɔn aah dak pu na. Unibɔn lik tiwon la, le m ma lik unii aasui ni.”

⁸ Le Jese yin ni ujapɔɔn Abinadab di dan Samuel chee. Le Samuel bui u ke, “Aayii, Uwumbɔr aa lee wee mu.”

⁹ Le Jese ki yin ni Sama mu. Le Samuel ki bui u ke, “Aayii, Uwumbɔr aa lee u mu.”

¹⁰ Jese nan yin ni ujapɔtiib kina ki ti saa bilole, Samuel chee. Samuel nan bui u ke, “Aayii, Uwumbɔr aa lee bi ponn ni ubaa,”

¹¹ le ki baa u ke, “Aa ki kpa japɔtiib bibaa aa?” Le Jese nan kii u ke, “Uwaatiir ubaa gur, u mu le kpaa ipiih.” Le Samuel bui u ke, “Bui u ke u dan do. Taan toor kitork kee, see u fuu ni waahr.”

¹² Kina pu le Jese nan tun ke bi yin ni u. U nan ye unachipɔɔn u ŋan ki pɔɔ na, le unimbil wiin chain. Uwumbɔr nan bui Samuel ke, “Uma le na. Kaan u.”

¹³ Samuel nan yoor olif aakpan ki di kpir David aayil pu, ki kaan u nnaan, ukpetiib aanimbil ni. Libuul ngbaan ni le Uwumbɔr Aafuur nyaan gbiin David, ki cha u pɔɔk nyib, ki bi u chee ki joo cha. Le Samuel gir buen Rama ni.

David aah kun Sɔɔl aabɔrdichal ni pu na

¹⁴ Uwumbɔr Aafuur Nyaan nan nyan Sɔɔl ni, le Uwumbɔr di tiyayaar tun ni Sɔɔl pu, le ti joo u muk.

¹⁵ Le waatutum bui u ke, “Ti nyi ke Uwumbɔr le tun ni tiyayaar le ti nan joo si muk kina.

¹⁶ Timi aaninkpel, tiin timi nsan aan ti ban unii u ŋmaa gbaa kibeek na, aan tiyayaar ngbaan yaa ti ki fii aa pu kan, udaan li gbaa kibeek aan aalan ki sɔŋ.”

¹⁷ Le Sɔɔl nan tii bi nsan ke, “Ban kan man unii u ŋmaa gbaa mbamɔm na, ki li joo ni u m chee do.”

¹⁸ Bitutum ngbaan ubaa nan len ke, “Jese, u nyan ni Betlehem na kpa japɔɔn ubaa, u ye ubeegbaar la. U ki ye unii u kaar ki ŋan na la, ki ye u ŋmaa to butɔb mbamɔm, ki ye u ŋmaa len na la, le Uwumbɔr bi u chee.”

¹⁹ Kina pu le Sɔɔl tun ti bui Jese ke, “Di aajapɔɔn David u kpaa ipiih na tii ni mi do.”

²⁰ Jese nan cha David di uŋoob u laa diin na, ni ubon u tu boroboro ni ŋisubil aadaan lidabuul na, ki di buen.

²¹ David nan buen Sɔɔl chee ki ti tun waatuln. Sɔɔl nan gee u sakpen, le ki lee u ke u li joo waajawan.

²² Le Sɔɔl ki tun Jese chee ke, “M gee David. Cha u li bi m chee do ki tun maatuln.”

²³ Ki nyan n‑yoonn ngbaan ki joo cha, tiyayaar ti Uwumbɔr di tun ni u pu na yaa ti fii u pu kan, le David yoor waabeek ki gbaa, le tiyayaar ngbaan ti di cha u, le u ki kpaln unii.