1 Samuel 15 - Uwumbɔr aagbaŋ

Israel yaab ni Amalek yaab aatɔb

¹ Samuel nan bui Sɔɔl ke, “Min le Uwumbɔr tun ni ke m nan kaan si nnaan, aa li ye waanib Israel yaab aabɔr. Tɔ, li pel Uwumbɔr u yeh mpɔɔn mɔmɔk na aah kpa pu u bui si na.

² Amalek yaab aah kaa nan kii ke Israel yaab jer buyoonn bi nan nyan ni Ijipt ki choo pu na, u bui ke u ga daa bitafal.

³ Buen ti tak Amalek yaab ki doo baah kpa tiwan ni mɔmɔk na. Taa di cha nibaa; ku baajab mɔmɔk, ni bipiib, ni bibilb, ni mbipɔm, ni inaa, ni ipiih, ni laakumii tiib, ni ibon.”

⁴ Sɔɔl nan kuun ni waajab ki nan kahn bi Telem ni: Israel aajab nan ye ŋichur ikui ilee la, le Juda yaab ye ŋichur kipiik.

⁵ Le u ni waajab buen Amalek aatiŋ ni, ki ti dɔ nkpen mubaa aabufan ni ki kii.

⁶ U nan tun ti bui Kenn aanib, bi aayaajatiib nan ŋa Israel yaab tiŋann buyoonn bi nan nyan ni Ijipt ni na ke, “Nyan cha man Amalek yaab, aan m taa nan ku nimi kpee bi pu.” Le Kenn yaab ngbaan nyan cha bi.

⁷ Sɔɔl nan nyaŋ Amalek yaab, ki dii bi nyan Hafila aatiŋ ni, ki ti saa Sur aatiŋ ni, ki bi Ijipt aawipuul wɔb na.

⁸ U nan chuu Amalek aabɔr Agag kaa ku u, ki ku waanib ma mɔmɔk.

⁹ Tɔ, Sɔɔl ni waajab aa nan ku ubɔr Agag, kaa ku ipiih ni inaa i ŋan na, ni inaabi, ni ipihbi, bee tiwan nimɔk ŋan na. Bi nan bii tiwan ni kaa ŋan kaa bi tibaa ni na baanja la.

Uwumbɔr yii Sɔɔl ke waan ki li ye ubɔr

¹⁰ Le Uwumbɔr bui Samuel ke,

¹¹ “Nsui bii, maah ŋa Sɔɔl ubɔr pu na. U fenn upuwɔb tii mi, le ki yii maah tuk u pu na.” Liŋuul nan chuu Samuel, le kinyeek ngbaan ki ti woln u nan bi gaŋni Uwumbɔr.

¹² Kitaak aah woln na, le u buen u ti ban kan Sɔɔl. U nan ti ŋun ke Sɔɔl buen Kamel aatiŋ ni, nin chee u maa tiwan siin waayimbil pu na, le ki nyan nima buen Gilgal ni.

¹³ Samuel aah ti pii Sɔɔl na, le Sɔɔl nan doon u ki len ke, “Uwumbɔr ŋa tinyoor ŋa aa pu. M dii Uwumbɔr aah bui mi pu na.”

¹⁴ Le Samuel baa u ke, “Kina kan, ni ŋa kinye aan m ŋun inaa wooni aan ipiih mu wii?”

¹⁵ Sɔɔl nan kii u ke, “Maajab le gaa i Amalek yaab chee. Bi joo ipiih ni inaa i ŋan na ke bi di toor kitork tii Aadindaan Uwumbɔr la, le ki ku doo i gur na pel pel.”

¹⁶ Le Samuel teen ke, “Sil nima, aan m bui si Uwumbɔr aah fe tuk mi pu kinyeek na.” Le Sɔɔl bui u ke, “Tuk mi.”

¹⁷ Samuel nan bui u ke, “Hali saah nan lik seen aabaa pu na, aa ye Israel aanibol ngbaan aayidaan la. Uwumbɔr le di si ŋa Israel yaab aabɔr,

¹⁸ le ki di si tun, ki mɔk si ke aa ku doo Amalek aabiindam ngbaan. U bui si ke aa jan ki ti ku doo bi mɔmɔk.

¹⁹ Ni ki ŋa kinye aan saa kii waamɔb? Ba ŋa aa ber ti gaa baawan, ki ŋa tiwan ni kaa piir Uwumbɔr aasui na?”

²⁰ Le Sɔɔl bui u ke, “M kii Uwumbɔr aamɔb la. Waah bui mi ke m buen pu na, m buen ki ti joo ni Ubɔr Agag, le ki ku Amalek aanib mɔmɔk.

²¹ Maajab le yii, kaa ku ipiih ni inaa i ŋan na, ki tee joo ni i Gilgal ni do, ke bi nan di toor kitork tii Aadindaan Uwumbɔr.”

²² Le Samuel bui u ke, “Uwumbɔr tee gee nilani: aa kii waamɔb, bee aa toor kitork tii u? Ni ŋan ke aa kii waamɔb ki jer ke aa di ipiih i ŋan na toor kitork tii u.

²³ Aa yaa yii waamɔb kan, ni ye titunwanbir ke kisook na la. Kigaak mu bir ke ŋiwaa aadoon na la. Saah yii Uwumbɔr aamɔb pu na, kina le u mu yii si, ke saan ki li ye ubɔr.”

²⁴ Le Sɔɔl kii ke, “Een, m tun titunwanbir. M yii Uwumbɔr aamɔb, ni saah mɔk pu na. M san maajab le ijawaan, ki ŋa baah ban pu na.

²⁵ Tɔ, dandana wee m gaŋ si, di maatunwanbir cha pinn mi, ki gir dii mi buen Gilgal ni, aan m ti doon Uwumbɔr.”

²⁶ Le Samuel bui u ke, “Maan gir dii si buen. Aa yii Uwumbɔr aamɔb, le u mu yii si, ke saan ki li ye Israel yaab aabɔr.”

²⁷ Le Samuel fenn ke u siir, le Sɔɔl chuu waabɔkul, le li kar.

²⁸ Le Samuel bui u ke, “Uwumbɔr daa gaa Israel aanaan aa chee, ki di tii unii u jer si na.

²⁹ Israel yaab Aawumbɔr u ye Ubɔrkpaan na aa mɔnn inyamɔn, kaa kpeln waalandak. Waa ye unibɔn, waan kpeln waalandak.”

³⁰ Sɔɔl nan ki bui u ke, “M tun titunwanbir. Tɔ, tee tii mi kipak, maayidam ni Israel aanib bee mɔmɔk aanimbiin ni. Gir dii mi buen aan m ti doon Aadindaan Uwumbɔr.”

³¹ Nima pu le Samuel gir dii u buen Gilgal ni, le Sɔɔl ti doon Uwumbɔr.

³² Le Samuel bui u ke, “Li joo ni man Ubɔr Agag m chee do.” Le Agag u bi nan buu u tikululn na dan u chee, ki nan bi dakl usui ni ke, “Bi ga ku mi dandana wee ee?”

³³ Le Samuel bui u ke, “Saajaak aajuk aah cha natiib kpaln bipiib kaa kpa mbim pu na, kina le aana mu ga kpaln upii u kaa kpa ubo na,” le ki chɔi chɔi Agag, kitork aabimbiln chee, Gilgal aatiŋ ni.

³⁴ Samuel nan buen Rama aatiŋ ni, le ubɔr Sɔɔl mu kun Gibea aatiŋ ni.

³⁵ Ki nyan nima ki ti saa Samuel aakundaal, waa nan ki kan ubɔr Sɔɔl, le ki tee wii u pu. Uwumbɔr aasui nan bii ke u ŋa Sɔɔl Israel yaab aabɔr.