1 Samuel 14 - Uwumbɔr aagbaŋ

Jonatann aah nan ŋa ijakaan pu na

¹ Nwiin mubaa daal, le Jonatann bui unachipɔɔn u joo waajawan na ke, “Cha ti puur buen Filistia yaab ngbaan aakakaa chee.” Jonatann aa nan bui ute Sɔɔl ke u ga buen nibaa chee.

² Sɔɔl nan bi ŋisubil aasub bubaa taab, Migronn aatiŋ ki bi gbɔk Gibea na ni. Bijab ikui iloob le nan bi u chee.

³ Tɔ, utotoor u nan joo tiwan ni bi joo beer Uwumbɔr aageehn na nan ye Ahija, u aate nan ye Ikabod aakpel Ahitub na. Ahitub aate le nan ye Fineas, le uyaaja ye Eli, Uwumbɔr aatotoor u nan bi Silo aatiŋ ni na. Unii ubaa aa nan nyi ke Jonatann siir.

⁴ Jonatann aah nan ga ti jer nin chee ki koo Filistia yaab ponn ni na, nan dii Mikmas aasan mu bi ŋijoo aakaasisik ni na, nin chee ŋitakpasakpiin ŋilee si gbɔk tɔb nsan ngbaan aaŋangii ni ŋŋangan wɔb na la. Bi nan yin ŋitakpal ngbaan libaa ke Boses, ki yin liken ke Sene.

⁵ Litakpal li nan si ŋŋangan wɔb na, nan lik Mikmas wɔb la, le litakpal li mu si ŋŋangii wɔb na, lik Geba wɔb.

⁶ Le Jonatann bui unachipɔɔn ngbaan ke, “Cha ti puur buen Filistia aanifam ngbaan chee. Nibaakan Uwumbɔr ga ter timi. U yaa ga ter timi kan, nibaa aan ŋmaa kiir u, u taa di linyaŋ ngbaan tii timi ki bui ke taa wiir.”

⁷ Le unachipɔɔn ngbaan bui u ke, “Saah ban pu na kan, m si aachaŋ ni.”

⁸ Le Jonatann bui u ke, “Tɔ, ti ga puur buen aan ki cha Filistia yaab ngbaan kan timi.

⁹ Bi yaa bui ke ti li si taah bi nin chee na aan bi dan kan, ti ga gaar nima.

¹⁰ Tɔ, bi yaa bui ke ti dan bi chee kan, ti ga buen; ba pu? nima le ga li ye limɔkl li Uwumbɔr ga di tii timi ki mɔk ke ti nyaŋ bi na.”

¹¹ Le bi cha Filistia yaab ngbaan kan bi; le bi bui ke, “Lik man, Hiibru yaab bibaa le bi nyan ni ibuu i ponn ni bi bɔr na,”

¹² le ki yin Jonatann ni unachipɔɔn na ke, “Dan do man. Ti kpa tibɔr tibaa ti tuk nimi.” Le Jonatann bui unachipɔɔn ngbaan ke, “Li dii mi. Uwumbɔr tii Israel yaab linyaŋ bi pu a.”

¹³ Le Jonatann jon ŋitakpal ngbaan pu ki baar utaa ni uŋaal pu, le unachipɔɔn ngbaan mu dii u. Jonatann nan ti tak Filistia yaab ngbaan le ki gbaa bi lir kitiŋ, le unachipɔɔn na ku bi.

¹⁴ Njan aanikul ngbaan ponn ni, Jonatann ni unachipɔɔn ngbaan nan ku bijab moninko la, kaa foor buen nibaa.

¹⁵ Filistia yaab bi mɔmɔk nan bi itingbaan ni na aapobil nan yuk. Ijawaan nan chuu bijab bi looni na, ni bijab bi nan bi baah kuun ka nin chee na, le biwon gbaa. Kitiŋ nan dam, le bilan ŋmal, le bi gur san yɔl yɔl.

Israel yaab aah nyaŋ Filistia yaab pu na

¹⁶ Sɔɔl aajab bi nan bi Benjaminn aanibol aatiŋ Gibea ni ki kii na, kan ke Filistia yaab aalan ŋmal, le bi bi san gonni.

¹⁷ Le Sɔɔl bui waajab ke, “Kahn man bijab ngbaan ki lik ke ŋma aa bi.” Bi nan ŋa kina ki kan ke Jonatann ni unachipɔɔn u joo waajawan na aa bi.

¹⁸ Sɔɔl nan bui Ahija u nan ye utotoor na ke, “Li joo ni tiwan ni bi joo beer Uwumbɔr aageehn na do.” Tɔ, liyaadaal ngbaan Ahija nan joo ni tiwan ngbaan ki loln Israel yaab aajab pu nsan.

¹⁹ Sɔɔl aah laa bi len utotoor ngbaan chee tibɔr na, le Filistia yaab aafuuk ngbaan moo nyaŋ. Le Sɔɔl bui u ke, “N‑yoonn aa ki bi ti ga baa Uwumbɔr aageehn.”

²⁰ Le u ni waajab buen ki ti lir Filistia yaab, bi nan bi jaa biŋmeen, bilan aah ŋmal pu na pu.

²¹ Hiibru yaab bibaa, bi nan ŋmal Filistia yaab ponn ni ki dii bi buen butɔb ngbaan ni na, nan fenn ki kpee Sɔɔl ni Jonatann pu.

²² Bijab bi mu nan bɔr Efraim aagongon pu na ŋun ke Filistia yaab bi san, le bi mu fii ki kpee kijaak ngbaan ni,

²³ ki dii Filistia yaab ki ti jer Bef Afenn ni. Uwumbɔr nan gaa Israel yaab lii liyaadaal ngbaan.

Tiwan ni nan ŋa butɔb ngbaan aapuwɔb na

²⁴ Nkon nan chuu Israel yaab, le biwon yɔl; ba pu? Sɔɔl nan puu ki siin nkaal ke, “Tibɔbir bi unii umɔk jin tijikaar tibaa din wee buyoonn maa kee lee maaŋuul maadim pu na.” Kina pu na, ubaa aa nan jin nibaa nwiin ngbaan daal.

²⁵ Bi mɔmɔk nan ti koo kichook kibaa ponn ni, ki kan tisiir bi ni kookoo.

²⁶ Isui ngbaan pu nan kpa tisiir, le ubaa mu aa jin ti; ba pu? bi nan san ijawaan Sɔɔl aapuur na pu la.

²⁷ Jonatann ma aa nan ŋun ute aapuur ngbaan pu, le ki di waajaangbeek saa chɔb ŋisiigban ŋibaa ki di moor. Libuul ngbaan ni le uwon pɔɔk.

²⁸ Le uja ubaa bui u ke, “Nkon le cha ti mɔmɔk aawon yɔl, le aate sak timi ki len ke, ‘Tibɔbir bi unii umɔk jin tijikaar tibaa din wee na.’”

²⁹ Jonatann nan bui ke, “Ba aatusakpeln nte ŋa timi aanib na. Lik nwon aah pɔɔk tisiir ti m jin na pu pu na.

³⁰ Ni ba ga li bi kinye din wee, timi aanib yaa ba jin tijikaar ti bi nyaŋ baadim ki gaa ti na. Dakl lik baah ba ga ku Filistia aanib bimɔk na.”

³¹ Liyaadaal ngbaan Israel yaab nan nyaŋ Filistia yaab, ki dii bi nyan Mikmas ni, ki ti saa Aijalonn ni. N‑yoonn mue na nkon nan chuu Israel yaab, le biwon yɔl.

³² Kina pu le bi buen ti lir baah gaa tiwan ni baadim chee na, ki chur baawakor, ki kɔr ti libuul ngbaan ni, ki ŋman tinann ti beenin kpa nsin na.

³³ Le unii ubaa bui Sɔɔl ke, “Lik, binib ngbaan bi tun Uwumbɔr titunwanbir ki ŋmɔ tinann ti beenin kpa nsin na la.” Le Sɔɔl bui bi, “Ni ye binibiib la. Biln man litakpasakpeln tii ni mi do.”

³⁴ Le u ki gir len ke, “Koo man binib ngbaan ponn ni, ki bui bi ke bi mɔmɔk li joo ni baawakor do. Bi nan kɔr ti ki ŋmɔ ti do, bi taa bi tun Uwumbɔr titunwanbir ki ŋmɔ tinann ti beenin kpa nsin na.” Kina pu le bi mɔmɔk nan joo ni baawakor, ki nan kɔr ti nima kinyeek ngbaan.

³⁵ Sɔɔl nan maa waajan aatork aabimbiln tii Uwumbɔr nima la.

³⁶ Sɔɔl nan ki bui waajab ke, “Cha ti buen ti tak Filistia yaab kinyeek kee, ki ku bi mɔmɔk, ki yoor baawan ti woln kitaak.” Le bi kii ke, “Ŋa saah dak ke nimɔk ŋan na.” Le utotoor na bui bi ke, “Cha ti puen baa Uwumbɔr waahr.”

³⁷ Le Sɔɔl baa Uwumbɔr ke, “M ti tak Filistia yaab aa? Aa ga di linyaŋ ngbaan tii timi ii?” Tɔ, Uwumbɔr aa nan kii u liyaadaal ngbaan.

³⁸ Le Sɔɔl bui binib ngbaan aayidam ke, “Dan do man, ki nan lik ke ba aatunwanbir ti tun din wee.

³⁹ M puu Uwumbɔr u bi n‑yoonn mɔmɔk ki tii timi Israel yaab linyaŋ na, ke unii u lir na ga kpo, hali ni yaa ye maabo Jonatann le yaa lir kan, u ga kpo.” Le ubaa aa gar tibaa.

⁴⁰ Le Sɔɔl ki bui bi ke, “Ni mɔmɔk li si nima man, aan m ni njapɔɔn Jonatann mu li si do chee na.” Le bi bui ke, “Ŋa saah dak ke nimɔk ŋan na.”

⁴¹ Sɔɔl nan bui Uwumbɔr u ye bima Israel yaab Aadindaan na ke, “Uwumbɔr, ba ŋa saa gar mi din wee? Uwumbɔr u ye Israel yaab Aadindaan na, di ŋitakpal ŋi bi joo beer saageehn na gar mi. Tibɔbir yaa bi Jonatann, bee min pu kan, di Urim aatakpal mɔk; tɔ, ni yaa ye saanib Israel yaab kan, di Tumim aatakpal mɔk.” Le ngarm ngbaan lir Jonatann ni Sɔɔl pu, le binib ngbaan nyan.

⁴² Le Sɔɔl ki bui ke, “Dakl lik min ni maabo Jonatann aakaasisik ni.” Le ni mɔk ke Jonatann.

⁴³ N‑yoonn ngbaan le Sɔɔl baa Jonatann ke, “Aa ŋa ba?” Jonatann nan gar u ke, “M di maajaangbeek le saa tisiir siib kina, le ki di moor. Min le na do; m gor kiir ke m kpo.”

⁴⁴ Le Sɔɔl bui u ke, “Bi yaa kaa ku si kan, Uwumbɔr faa ku mi.”

⁴⁵ Le bijab ngbaan bui Sɔɔl ke, “Jonatann u tii Israel linyaŋ limina na kpo oo? Aayii. Ti puu Uwumbɔr u bi n‑yoonn mɔmɔk na pu ke, hali waayikpir kibaa aan nya uyil pu. Waah ŋa pu din wee na ye Uwumbɔr aaterm pu la.” Le bijab ngbaan nan gaa Jonatann lii, le baa ku u.

⁴⁶ Nee aapuwɔb, le Sɔɔl di cha kaa ki san dii Filistia yaab, le bi gir buen baapepel.

Sɔɔl aadichal, ni waah nan bi nnaan ni pu na

⁴⁷ Sɔɔl aah nan jin Israel aanaan aapuwɔb na, u ni waadim ŋipepel mɔmɔk nan to tɔb butɔb la: u ni Moab yaab, ni Amonn yaab, ni Edom yaab, ni Soba aabɔrb, ni Filistia yaab nan to tɔb butɔb. Nimɔk u nan ti jan na kan, uma le nan nyaŋni bi.

⁴⁸ U nan di ijakaan jan, hali ki ti nyaŋ Amalek aanib. U nan gaa Israel yaab lii, binib bimɔk nan tak bi na chee.

⁴⁹ Sɔɔl aajapɔtiib le nan ye Jonatann, ni Isfi, ni Malkisua. Ubisapol le nan ye Merab, le uwaatiir ye Mikal.

⁵⁰ Upuu aayimbil le nan ye Ahinoam, le upuu aate ye Ahimaas. Waajab aaninkpel le nan ye utewaa Ner aajapɔɔn Abner.

⁵¹ Sɔɔl aate Kis ni Abner aate Ner nan ye Abiel aajapɔtiib la.

⁵² N‑yoonn mumɔk Sɔɔl nan bi limɔfal ni na, u ni Filistia yaab nan jaa kijapɔɔk la. Kina pu na, u yaa nan ti kan uja u pɔɔ, bee u kaar na kan, see u di udaan kpee waajab pu.