1 Samuel 13 - Uwumbɔr aagbaŋ

Sɔɔl aah to Filistia yaab butɔb pu na

¹ Buyoonn Sɔɔl nan ji nnaan na, u nan ye ŋibin piitaa la, le ki nan joo Israel yaab ki ti saa ŋibin imonko ilee ni ŋilee.

² Le Sɔɔl nan kuun bijab ŋichur ŋitaa, ki cha ŋichur ŋilee bi u chee Mikmas aatiŋ, ni Betel aatiŋ, ŋigongon aah wiir nin chee na, ki di lichur libaa na tii ujapɔɔn Jonatann ke u di buen Gibea ni, Benjaminn aamaal aapepel ni. Sɔɔl nan cha bijab bi gur na gir kun linampal.

³ Jonatann nan ku Filistia yaab aajab aaninkpel Geba aatiŋ ni, le Filistia yaab mɔmɔk ŋun ti. Le Sɔɔl cha bi pii ukpiin Hiibru yaab aatiŋ mɔmɔk ponn ni, ke bi nyan ni ki nan buen butɔb.

⁴ Israel yaab mɔmɔk nan ŋun ke Sɔɔl ku Filistia yaab aaninkpel, le Filistia yaab mɔmɔk nan gur nan bi. Kina pu le binib nan kii Sɔɔl aayim ngbaan, ki buen u chee Gilgal ni.

⁵ Filistia yaab nan kuun ke bi ni Israel yaab jan kijaak. Bi nan kpa butɔb aataan aatɔroku mam ŋichur piitaa la, ki kpa bijab bi dik itaan pu na ŋichur ŋiloob, ki kpee bijab bi wiir ke limɔɔgbaln aatambol na. Bi nan buen Mikmas, kitiŋ ki bi Bef Afenn aawipuul wɔb na, le ki ti kuun kal nima,

⁶ le ki fii mpɔɔn ŋmeen ti tak Israel yaab, le Israel yaab aa nan ki nyi baah ga ŋa pu na. Bibaa nan bɔr titakpalunn ponn ni, ni ibuu ponn ni, ni ŋitakpal taab, ni ŋibugen, ni inyunbun ponn ni.

⁷ Bibaa mu nan san puur Jɔɔdann Aamɔɔl, ki koo Gad ni Gilead aapepel ponn ni. Sɔɔl nan beenin bi Gilgal ni, le binib bi nan bi u chee na aawon gbaa ijawaan pu.

⁸ U nan kiir Samuel iwiin ilole, ke Samuel aah nan bui u ke u ŋa pu na. Le Samuel aa nan kee fuu ni Gilgal ni. Le binib ngbaan piin ki bi san cha Sɔɔl,

⁹ le u bui ke, “Li joo ni man kitork ki ti ga di see mmii ni na, ni kimɔbaan aatork na.” U nan toor kitork ki bi ga di see mmii ni na.

¹⁰ Waah ti ban u doo na, le Samuel fuu ni. Le Sɔɔl tooh u nsan ni ke u ti doon u.

¹¹ Le Samuel baa u ke, “Aa ŋa ba?” Sɔɔl nan kii u ke, “Binib ngbaan bi san cha mi la, le aa mu aa fuu ni n‑yoonn mu aa bui ke aa ga fuu ni na. Ki ki kpee na, Filistia yaab bi kuuni Mikmas ni la.

¹² Le m dak ke Filistia yaab ngbaan ga dan nan tak mi Gilgal ni do, buyoonn maa kee toor kitork ki mee Uwumbɔr ke u ter mi na. Le m ŋa nlandak ke ni ŋan m toor kitork.”

¹³ Samuel nan gar u ke, “Kijɔrk aatuln le aa tun na. Saa dii nkaal mu Aadindaan Uwumbɔr tii si na. Aa yaa ba dii mu kan, u ba ga cha sin ni aayaabitiib li joo Israel yaab ki ti saa n‑yoonn mu kaa kpa ndoon na.

¹⁴ Tɔ, n‑yoonn mue na, saanaan aan buen mɔb; ba pu? aa yii Uwumbɔr, le u ga ban uja u u gee na, ki di u ŋa waanib aajojoor.”

¹⁵ Samuel nan nyan Gilgal ni, le ki siir buen. Binib bi nan gur na nan dii Sɔɔl, waah gir cha waajab chee pu na. Bi nan nyan Gilgal ni, le ki buen Gibea aatiŋ ki bi Benjaminn aapepel ni na. Sɔɔl nan kahn waajab, le ki kan ke bi ye ikui iloob la.

¹⁶ Sɔɔl ni ujapɔɔn Jonatann ni baajab nan kuun kal Geba aatiŋ ki bi Benjaminn aapepel na ni; le Filistia aajab mu kuun kal Mikmas ni.

¹⁷ Filistia aajab nan yakr ŋigetek ŋitaa, le ki chaa ti looni Israel yaab; ligetekr libaa nan buen Ofra aatiŋ ki bi Sual aapepel ni na wɔb la,

¹⁸ le liken mu buen Bef Horonn wɔb, le liken na mu buen kitiŋ aanaanmɔk, ni bi Seboyim Aafataŋ, ni nteersakpiin wɔb na.

¹⁹ Bichaab aa nan bi Israel aatiŋ ni, ba pu? Filistia yaab aa nan kii ke Hiibru yaab mɔɔ kijaak aajum ni tikpaatunn.

²⁰ Israel yaab nan chaa Filistia yaab chee, le ki ti luuni baanaaja aakuu, ni ŋikuu, ni nchɔkm, ni gɔrk mam.

²¹ Bi yaa nan luun kichɔk kan, bi nan pa tikur aamombil waatiir libaa la. Kina le bi yaa nan toor inaa aapukpaa kan, bi pa. Bi yaa nan luun inaaja aakuu ni ŋikuu kan, bi pa kina aamombil ŋilee la.

²² Kina pu na, Sɔɔl ni ujapɔɔn Jonatann baanja le nan kpa kijaak aajum ni tikpaatunn, butɔb ngbaan daal.

²³ Filistia yaab nan nyan bijab bibaa le bi ti kiir baah puur nkpen mu bi ŋijoo aakaasisik ni na chee, Mikmas aatiŋ chee.