1 Samuel 11 - Uwumbɔr aagbaŋ

Sɔɔl aah nyaŋ Amonn yaab pu na

¹ N‑yoonn ngbaan, le Amonn aabɔrkpaan Nahas di waajab buen bi ti gob ki tak Jabes aatiŋ ki bi Gilead aapepel ponn ni na. Le Jabes aajab bui Nahas ke, “Cha ti ŋa kimɔbaan, aan aa li ye timi aajojoor.”

² Nahas nan gar bi ke, “Ni yaa cha m lokr nyan ni mɔmɔk aanimbigii aan ki jinn Israel yaab mɔmɔk inimɔɔn kan, ti ga ŋmaa ŋa kimɔbaan.”

³ Le Jabes aajab aayidam bui ke, “Tiin timi iwiin ilole aan ti tun Israel aatim mɔmɔk ni. Ubaa yaa kaan ter timi kan, ti nin di tibaa tii si.”

⁴ Ntuuntiib ngbaan aah nan ti fuu Gibea, nin chee Sɔɔl koo na, aan binib ngbaan ŋun tibɔr ngbaan na, le bi piin ki bi wii mpombiin pu.

⁵ Sɔɔl nan laa nyan ni kisaak ki joo waanaa choo kun ni la, le ki baa ke, “Ba ŋa? Ba ŋa unii mɔmɔk wii?” Le bi bui u ntuuntiib bi nyan ni Jabes na aah len pu na.

⁶ Sɔɔl aah ŋun kina na, le Uwumbɔr Aafuur Nyaan gbiin u, le u pɔɔk nyib, le usui fii,

⁷ le u chuu inaa ilee ki ku i, ki chɔi chɔi yaanann, le ki di tun Israel aatim mɔmɔk ponn ni ki len ke, “Unii umɔk yii kaa dii Sɔɔl ni Samuel ki buen butɔb ni na kan, bi ga ŋa baanaa mu kina la.” Israel aanib nan san ijawaan Uwumbɔr pu, le bi mɔmɔk kuun tɔb chee, kaa gann ubaa lii.

⁸ Sɔɔl nan kuun bi mɔmɔk Besek ni la: Israel aanib nan ye ŋichur ikui itaa la, le Juda yaab ye ŋichur piitaa.

⁹ Le bi bui Jabes aatuuntiib na ke, “Ti bui man nimi aanib ke waahr aan nwiin fe nan kal kaasisik ni na, bi ga fe gaa bibaa lii.” Jabes aanib aah ŋun kina na, le bisui piir ki ti nyaŋ,

¹⁰ le bi bui Nahas ke, “Fen kan, ti ga fe di tibaa tii si, le aa ŋa timi saah gee pu na.”

¹¹ Kitaak aah ti bi wolni na, le Sɔɔl yakr waajab ŋigetek ŋitaa pu, le lichakpitaawoln bi buen baadim Amonn yaab aah kuun dɔ nin chee na, ki ti tak bi. Joo cha ni nwiin pu na, bi ku doo bi. Bijab bi ŋmar na nan san yaa tɔb chee, bimɔk san ban bibaa.

¹² Le Israel aanib bui Samuel ke, “Binib bi nan bui ke Sɔɔl taa li ye timi aabɔr na bi la chee? Di bi tii timi aan ti ku bi.”

¹³ Le Sɔɔl bui ke, “Ubaa aan kpo din wee; ba pu? din wee le Uwumbɔr gaa Israel yaab lii.”

¹⁴ Le Samuel mu bui bi ke, “Cha man ti mɔmɔk buen Gilgal ki ti ki gir kaan Sɔɔl nnaan.”

¹⁵ Kina pu le bi mɔmɔk buen Gilgal. Nima chee, Uwumbɔr aanimbiin ni, le bi ti ki kaan Sɔɔl nnaan. Bi nan toor kimɔbaan aatork tii Uwumbɔr, le Sɔɔl ni Israel aanib mɔmɔk kpaan jin kitork ngbaan nima chee.