1 Samuel 10 - Uwumbɔr aagbaŋ

¹ Le Samuel yoor likpasambil ki di mu kpir Sɔɔl aayil pu, ki moor utakpiln, le ki bui u ke, “Uwumbɔr le toor si ke aa li ye Israel aanib aajojoor. Sin le ga li joo waanib ki kii bi, baadim taa pii bi. Nimina le ga li ye seeraa u ga mɔk ke Uwumbɔr lee si ke aa li ye waanib aajojoor na:

² aa yaa nyan m chee do din ki cha kan, aa ga ti kan bijab bilee bibaa Rachel aakaakul chee, Selsa aatiŋ ni, ki bi Benjaminn aatiŋ ni na. Bi ga bui si ke saah nan bi ban ibon i na, bi kan i a, le aate aa ki dak i pu, ki gur dak sin pu la, le ki baa n‑yoonn mɔmɔk ke, ‘M ga ŋa maabo aabɔr tee kinye?’

³ Aa yaa nyan nima chee kan, aa ga di ti saa Tabor aasusakpem bubaa chee, le ki ki kan bijab bitaa bibaa bi cha Betel ke bi ti toor kitork tii Uwumbɔr. Bi ponn ni ubaa ga li dar iŋoob i laa diin na itaa, le uken mu ga li tu ŋiboroboro kpin ŋitaa, le utatar na tu ŋisubil aadaan aadabuul.

⁴ Bi ga doon si, le ki nyan ŋiboroboro kpin ŋilee tii si, le aa gaa.

⁵ Aa yoor ti fuu Uwumbɔr Aagongoln li bi Gibea ni na, aa ga kan Filistia yaab kuun ki bi nima. Kitiŋ ngbaan aabisamɔb chee, aa ga kan Uwumbɔr aabɔnabtiib bibaa nyan ligongoln paab, Uwumbɔr aatork aabimbiln chee, ki sunn choo ki gbaa tibar ni ŋigangan, ki pii ŋiwul mam. Bi ga li bi pak Uwumbɔr, Waafuur Nyaan aapɔɔn pu.

⁶ Libuul ngbaan ni le Uwumbɔr Aafuur Nyaan ga gbiin si, le aa ga kpaan bi chee, baah bi pak Uwumbɔr, Waafuur Nyaan aapɔɔn pu pu na, le ki ga kpaln uniyayan.

⁷ Tiwan nee mɔmɔk yaa bi ŋani kan, ŋa Uwumbɔr aah mɔk si pu na mɔmɔk, uma le bi aa chee.

⁸ Aa ga loln m pu nsan ki buen Gilgal, nin chee m ga nan pii si aan ki toor kitork ki ti ga di see mmii ni na, ni kimɔbaan aatork mu. Li kii mi nima ki ti saa iwiin ilole aan m nin dan ki nan mɔk si saah ga ŋa pu na.”

⁹ Sɔɔl aah fenn ke u siir Samuel chee na, le Uwumbɔr tii u mbimbipɔm. Samuel aah nan bui u tibɔr ti mɔmɔk na nan ŋa kina liyaadaal ngbaan.

¹⁰ Sɔɔl ni waatutunn aah nan ti fuu Gibea na, Uwumbɔr aabɔnabtiib bibaa nan tooh u nsan ni. Libuul ngbaan ni le Uwumbɔr Aafuur Nyaan nan gbiin u, le u buen ti kpaan bi chee ki bi pak Uwumbɔr, Waafuur Nyaan aapɔɔn pu.

¹¹ Binib bi nan puun nyi u na kan waah bi ŋani pu na, le ki baa tɔb ke, “Ba ŋa Kis aajapɔɔn wee? Sɔɔl mu kpaln Uwumbɔr aabɔnabr la aa?”

¹² Uja ubaa u koo nima na le ki baa ke, “Tɔ, ni dak ke bibɔnabr biken na aate ye ŋma?” Nimina pu le tibɔr timina nan piin ke, “Hali Sɔɔl mu kpaln Uwumbɔr aabɔnabr la aa?”

¹³ Sɔɔl aah pak Uwumbɔr kina ki ti doo na, le u buen kitork aabimbiln chee, ligongoln paab.

¹⁴ Sɔɔl aatewaa aah kan u ni ututunn ngbaan na, le u baa bi ke, “Ni buen la chee?” Le Sɔɔl bui u ke, “Ti bi ban ibon ngbaan la. Taah kaa kan i na, le ti buen Samuel chee.”

¹⁵ Le Sɔɔl aatewaa ki baa bi ke, “U ti bui nimi ke ba?”

¹⁶ Le Sɔɔl ki bui u ke, “U ti bui timi ke bi kan i a,” le kaa bui utewaa Samuel aah bui u ke u ga ŋa ubɔr pu na ma.

Sɔɔl aah jin nnaan pu na

¹⁷ Samuel nan kuun Israel yaab Uwumbɔr aanimbiin ni, Mispa aatiŋ ni,

¹⁸ le ki bui bi ke, “Uwumbɔr u ye timi Israel yaab Aawumbɔr na bui ke, ‘M nyan ni nimi Ijipt ponn ni, ki gaa nimi lii Ijipt yaab, ni binib bi mɔmɔk nan muk nimi na chee.

¹⁹ Min le ye nimi Aawumbɔr, u nyan ni nimi tibɔr, ni ŋimuk mɔmɔk ponn ni na, le din wee ni yii mi, le ki bui mi ke m tii nimi ubɔr. Ni ŋan, kina pu na, kuun tɔb man, ki kal ŋinibol ŋinibol, ni imaal imaal, Uwumbɔr aanimbiin ni.’”

²⁰ Le Samuel cha linibol mɔmɔk nyan ni libaabaa, le Uwumbɔr nyan Benjaminn aanibol.

²¹ Le Samuel cha laamaal nyan ni mubaabaa, le Uwumbɔr nyan Matri aamaal. Le Matri aajab nyan ni, le Uwumbɔr nyan Kis aajapɔɔn Sɔɔl. Le bi lik ban u, le kaa kan u,

²² le bi baa Uwumbɔr ke, “Waa kee fuu ni ii?” Le Uwumbɔr bui bi ke, “Sɔɔl le ti bi do wɔb na; u bɔr ŋitun aapuwɔb.”

²³ Le bi san ti nyan ni Sɔɔl, ki di dan binib ngbaan ponn ni; le bi kan ke u fɔk ki paa unii mɔmɔk pu liyil.

²⁴ Le Samuel bui binib ngbaan ke, “Uja u Uwumbɔr lee u na sɔ. Ubaa aa ki bi ti ponn ni ke uma na.” Le binib ngbaan mɔmɔk teen ke, “Uwumbɔr tii ubɔr na limɔfal li fɔk na.”

²⁵ Samuel nan kpiir tuk binib ngbaan ubɔr aasan, ni waatun aah ye pu na, le ki ŋmee ni ŋa kigbaŋ ponn ni, ki di bil Uwumbɔr aadiik ni, le ki cha binib ngbaan mɔmɔk gir kun.

²⁶ Sɔɔl mu nan gir kun Gibea. Le bijab bi pɔɔ aan Uwumbɔr meeh bisui na dii u buen.

²⁷ Le nifam bibaa bui ke, “Umina ga ŋmaa ŋa ba tii timi?” Bi nan lik seen Sɔɔl, le kaa tii ni u ipiin ibaa. Le Sɔɔl aa len tibaa.