1 Samuel 1 - Uwumbɔr aagbaŋ

Elkana ni waamaal aabɔr

¹ Uja ubaa nan bi, bi nan yin u ke Elkana, u nyan ni Efraim aamaal ponn ni la, le ki koo Rama aatiŋ ki bi Efraim aatiŋ ki ŋigongon wiir nima na ponn ni. Ute le nan ye Jeroham, le uyaaja mu nan ye Elihu, u nyan ni Tohu aamaal mu ye Suf aataŋaal na.

² Elkana nan kpa bipiib bilee la, bi nan yin ubaa ke Hana, ki yin uken ke Penina. Penina nan kpa bibilb, le Hana ma aa nan kpa ubaa.

³ Libiln mɔmɔk ponn ni kan, Elkana nan nya Rama ki chaa Silo ti toor kitork, ki dooni Uwumbɔr u yeh mpɔɔn mɔmɔk na. Nima chee le Eli aajapɔtiib Hofni ni Fineas nan ye Uwumbɔr aatotoorb.

⁴ N‑yoonn mumɔk Elkana yaa nan ti toor kitork na kan, u nan yakr tinann ngbaan tibaa tii upuu Penina, ki di tiken mu tii waabim mu.

⁵ U nan gee upuu uken Hana na sakpen; tɔ, u nan tii u mu linankpiln libaa la, ba pu? Uwumbɔr aa nan tii u ubo.

⁶ Uyɔnn Penina nan ŋani u mbiin ni mbɔnyun, ba pu? Uwumbɔr aa nan tii u ubo.

⁷ Ni nan bi kina le ŋibin mɔmɔk; n‑yoonn mumɔk bi nan ti buen Uwumbɔr Aadichal ponn ni na kan, Penina nan bii Hana aasui sakpen le u ti piin ki wii, ki yii kaan ji nibaa.

⁸ Le uchal Elkana ga ti baa u ke, “Hana, ba ŋa si aa wii? Ba ŋa saan ji tijikaar? Ba ŋa aasui bii kina? Maa jer mbim kipiik aa chee ee?”

Utotoor Eli aah nan ŋa tinyoor ŋa Hana pu pu na

^9-10 Nwiin mubaa daal, baah jin baajikaar doo Uwumbɔr Aadichal ponn ni, Silo aatiŋ ni na, le Hana fii. Usui nan bii sakpen, le u bi mee Uwumbɔr ki wii mpombiin pu. N‑yoonn ngbaan, utotoor Eli nan ka waakakaa chee mbisamɔb.

¹¹ Le Hana nan puu tipuur tii Uwumbɔr ke: “Uwumbɔr u yeh mpɔɔn mɔmɔk na, lik mi, saanaagbiipii. Lik ki kan maabɔr, ki teer mbɔr. Taa suln mbɔr. Aa yaa tii mi ubijabo kan, m puu ke m ga di u tii si u tun saatuln waamɔfal mɔmɔk ponn ni, ki taa kuu uyikpir.”

¹² Hana nan bi mee Uwumbɔr ni ti yunn pam, le Eli nan ka lik umɔgban.

¹³ U nan bi mee suuna, le umɔgban deŋni, le tibɔr ma aa tee nyan ni. Kina pu le Eli nan dak ke u nyun ndaan gbii la,

¹⁴ le ki bui u ke, “Di cha saadanyuwan ngbaan. Di cha lidanyul ki chuu aabaa suuna.”

¹⁵ Le u gar u ke, “Aayii, maa gbii ndaan, maaninkpel. Maa nyun ndaan. Ni ye mi limukl la, le m bi mee limeel, ki kpiir maabɔr tuk Uwumbɔr.

¹⁶ Taa dak ke m ye piifam ubaa la. Nsui le bii sakpen, le m bi mee kina pu.”

¹⁷ Le Eli bui u ke, “Li cha ni nsuudoon, aan Israel yaab Aawumbɔr tii si saah mee u tiwan ni na.”

¹⁸ Le Hana bui u ke, “Uwumbɔr cha aa li dak mbɔr tiwan ni ŋan na pu.” Le u siir buen, ki ti jin tijikaar, le usui piir.

Hana aah ma Samuel ki di u tii Uwumbɔr pu na

¹⁹ Naah woln kichakpiik ni na, le Elkana ni waadichal fii mala, ki ki doon Uwumbɔr, le ki gir kun Rama aatiŋ ni. Tɔ, Elkana nan doon upuu Hana chee, le Uwumbɔr kii waameel.

²⁰ Kina pu na, ni nan ye le ke u di dek, ki maa ubijabo. U nan yin u ke Samuel, le ki kpiir len ke, “M mee u Uwumbɔr chee la.”

²¹ N‑yoonn nan ki fuu ni ke Elkana ni waadichal buen Silo ki ti toor libiln libiln aatork tii Uwumbɔr, ni waah nan ki puu ubaa aapuur ti na.

²² N‑yoonn mue na, le Hana aa nan buen. U nan bui uchal ke, “M yaa nan giin ubo libiil n‑yoonn mu na kan, le m ga kpaan di u buen Uwumbɔr Aadichal ponn ni, nin chee u ga ti li bi ki ti saa waakun daal na.”

²³ Le Elkana kii ke, “Tɔ, ŋa nimɔk aa dak ke ni ŋan na; li bi linampal aan ki ti saa buyoonn aa ga giin u libiil na, ki cha Uwumbɔr sil aa pu aan saah puu tipuur ti na gbiin.” Nima pu le Hana nan gaar linampal ki lik waabo.

²⁴ Waah nan giin u libiil na, le u di u buen Silo, ki joo ŋibin ŋitaa aanaaja, ni n‑yon kuruwaa kipiik, ni ŋisubil aadaan lidabuul libaa. Samuel nan laa par, le u di u buen Silo, Uwumbɔr Aadichal ponn ni.

²⁵ Baah kɔr unaaja ngbaan doo na, le bi di ubo ngbaan buen Eli chee.

²⁶ Le Hana bui u ke, “Gafara, maaninkpel. Aa bee mi ii? Min le ye upii u aa nan kan u si do ki bi mee Uwumbɔr na.

²⁷ M nan mee u ubo wee la, le u tii mi maah ban pu na.

²⁸ Kina pu le m joo ni u m nan di tii Uwumbɔr. N‑yoonn mumɔk u bi limɔfal ponn ni na, u ga li ye Uwumbɔr yoo la.” Le bi doon Uwumbɔr nima chee.