1 Bibɔrb 9 - Uwumbɔr aagbaŋ

Uwumbɔr aah nan ki di ubaa mɔk Solomonn pu na

¹ Ubɔr Solomonn aah nan maa Uwumbɔr Aadichal, ni nnaan aadichal, ni tiwan ni mɔmɔk waalandak nan ban ke u ŋa na doo na aapuwɔb,

² le Uwumbɔr nan ki di ubaa mɔk Solomonn, ke waah nan ŋa pu Gibeonn aatiŋ ni na.

³ Uwumbɔr nan bui u ke, “M ŋun saameel. M gaa Lidichal limina, li li ye nin chee bi ga li dooni mi n‑yoonn mɔmɔk na, ki ŋa li chain.

⁴ Aa yaa di ibamɔn, ni mbimbinyaan dii mi, ke aate David na, ki joo maakaal, ki ŋani maah bui si pu na mɔmɔk kan,

⁵ m ga li joo tipuur ti m nan puu tii aate David, ki bui ke uyaabitiib le ga li joo Israel aanib n‑yoonn mɔmɔk na.

⁶ Tɔ, si, bee aayaabitiib, yaa yii, kaa dii mi, ki yii ikaal, ni maah bui nimi pu na mɔmɔk, ki dooni ŋiwaa kan,

⁷ m ga nyan maanib Israel yaab kitiŋ ki m di tii bi na ni. M ga nya cha Lidichal limina li m ŋa li chain ke li li ye nin chee bi ga li dooni mi na. Binib bi bi ni mɔmɔk na ga li ŋani Israel aanib yaansara, ki lik seeni bi.

⁸ Lidichal limina ga ber, le unii umɔk jer nima chee na, ni ga ŋa u iwaan ni lijinjiir. Le bi ga baa ke, ‘Ba ŋa Uwumbɔr ŋa kitiŋ kimina, ni Waadichal limina kina?’

⁹ Le binib ga gar ke, ‘Baah yii Bidindaan Uwumbɔr, u nan nyan ni biyaajatiib Ijipt aatiŋ ni na, le cha u ŋa kina. Bi di baapak tii ŋiwaa, le ki dooni ŋi. Nima pu le Uwumbɔr cha tibɔbir ngbaan dan bi pu.’”

Solomonn ni Hiram aamɔbaan aabɔr

¹⁰ Solomonn nan di ŋibin moninko le maa Uwumbɔr Aadichal, ni waabɔrdichal.

¹¹ Taya aabɔr Hiram le nan tii u santina, ni isui iken aadɔ, ni salmaa u mɔmɔk u nan ban ke u di tun lituln ngbaan na. Naah doo na aapuwɔb, le Ubɔr Solomonn nan tii Hiram ntim moninko, Galilee aapepel ni.

¹² Hiram nan buen ti kan mu, le kaa nan gee mu.

¹³ Kina pu le u nan bui Solomonn ke, “Nna aabo, ntim mumina le aa di tii mi.” Kina pu le bi beenin yin lipepel ngbaan ke Kabul.

¹⁴ Hiram aah nan tii ni Solomonn salmaa u na ga nan jer ndibim kuruwaa ŋichur ŋinaa aanyunyuun.

Solomonn aah nan ki tun ŋitun ŋi na

¹⁵ Ubɔr Solomonn nan cha binaagbiib maa Uwumbɔr Aadichal, ni nnaan aadichal, ki cha bi ŋeeb kitiŋ ngbaan aawipuul wɔb aafataŋ, ki maa kitiŋ ngbaan aagoln. U nan ki cha bi gir maa Hasor, ni Megido, ni Geser aatim.

¹⁶ Ijipt aabɔr nan tak Geser aatiŋ le ki gaa ki, ki ku kaanib, le ki see ki mmii. Ubisal aah nan mɔn Solomonn na, le u di kitiŋ ngbaan tii ubisal tibɔndinn aapiin,

¹⁷ le Solomonn ki gir maa ki. Solomonn nan ki cha binaagbiib ngbaan gir maa Bef Horonn aatiŋ ki bi taab na,

¹⁸ ni Baalaf ni Tamar aatim mu bi Juda aateersakpiin ni na,

¹⁹ ni ntim mu ponn ni waawanbankaan nan si si na, ni ntim mu waataan, ni yaatɔroku tiib nan bi na, ni waah nan ban ke u maa tiwan ni mɔmɔk Jerusalem aatiŋ ni, ni Lebanonn aatiŋ ni, ni waanaan ni, nimɔk u gee na.

^20-21 Solomonn nan chuu Kanaann aanib bi Israel yaab nan jenn bi, ki gaa baatiŋ, kaa ku bi na aayaabitiib mpɔɔn, ki ŋa bi binaagbiib, le bi tun waatuln. Bima le nan ye Amor yaab, ni Hef yaab, ni Peres yaab, ni Hif yaab, ni Jebus yaab. Biyaabitiib beenin ye binaagbiib, le ki nan saa n‑yoonn mumina.

²² Solomonn aa nan di Israel yaab ŋa binaagbiib; bima le nan ye waatɔb aajab, ni waatuln aaninkpiib, ni bijab bi ŋaal itaan aatɔroku tiib na aayidam, ni bitandam.

²³ Binaagbiib ngbaan aaninkpiib nan ti saa binib ikui iŋmu ni piiŋmu, le ki lik ntamaam aatuln ngbaan.

²⁴ Solomonn aapuu u aate nan ye Ijipt aabɔr na nan nyan lipepel li bi yin li ke David Aatiŋ na ni, ki kun Solomonn aah maa lidichal li tii u na ni, nee aapuwɔb, le Solomonn maa ŋeeb kitiŋ ngbaan, liwipuul wɔb aapepel.

²⁵ Libiln libaa ponn ni, Solomonn nan toor kitork ki bi joo seer mmii ni na, ni kimɔbaan aatork, nfum mutataa le kitork aabimbiln li u nan maa tii Uwumbɔr na pu. U nan ki seer tulalee aayon mu tii Uwumbɔr. Kina le u nan maa Uwumbɔr Aadichal doo.

²⁶ Solomonn nan ki ŋa kiŋɔpaak Esionn Geber aatiŋ ki bi gbɔk Elaf aatiŋ ki bi Limɔɔkal Aanyusakpem aagbaan na, ki bi Edom aatiŋ pu na.

²⁷ Ubɔr Hiram nan tun waajab bi nyi iŋɔi aabɔr mbamɔm na ke bi ti li tun Solomonn aajab chee lituln.

²⁸ Bi nan di iŋɔi ngbaan buen Ofir aatiŋ pu, le ki ti joo ni salmaa u aanyunyuun ga jer ndibim kuruwaa ŋichur kipiik ni ŋinaa aanyunyuun na nan tii Solomonn.