1 Bibɔrb 8 - Uwumbɔr aagbaŋ

Baah di Uwumbɔr Aakaal Aadakaa koon ni Waadichal ponn ni pu na

¹ Ubɔr Solomonn nan yin Israel aanibol, ni itaŋaal aasalolm mɔmɔk, ke bi kuun ni Jerusalem aatiŋ ni, ki nan yoor Uwumbɔr Aakaal Aadakaa nya David aatiŋ Sionn ni, ki di buen Uwumbɔr Aadichal ni.

² Bi mɔmɔk nan kuun Tikakar Aajim aayoonn la. Ni nan ye ŋmalole, u bi yin u ke Etanim na ni la.

³ Bisalolm ngbaan mɔmɔk aah nan kuun na, le bitotoorb yoor Nkaal Aadakaa na,

⁴ le ki tun u buen Uwumbɔr Aadichal ni. Liifai yaab, ni bitotoorb nan ki yoor Uwumbɔr Aabool, ni laawan mɔmɔk, di buen Uwumbɔr Aadichal ni.

⁵ Ubɔr Solomonn, ni Israel aanib ngbaan mɔmɔk nan kuun sil Uwumbɔr Aakaal Aadakaa ngbaan aanimbiin ni, ki di ipiih ni inaa i wiir ti nyaŋ na toor kitork.

⁶ Le bitotoorb nin yoor Nkaal Aadakaa ngbaan di koon Chain Chain Aapepel ni, ki ti di u siin tiwan ni kpa ifeen na aataab, Uwumbɔr Aadichal ni.

⁷ Naafeen nan taln biin Dakaa ngbaan, ni idɔ i bi joo tui u na pu.

⁸ Unii yaa nan si Chain Chain Aapepel ngbaan aanimbiin ni kan, le u ga li waa idɔ ngbaan aajuu aah kpii ni pu na, naa ye kina kan, saan li waa i. Idɔ ngbaan beenin bi nima din wee.

⁹ Moses aah nan di ŋitakpapapan ŋi ŋa u ponn ni, Sainai Aajool chee na baanja le bi Uwumbɔr Aakaal Aadakaa ngbaan ni, nibaa aa nan ki bi u ni ki kpee ŋi pu. Israel yaab aah nan nyan ni Ijipt aatiŋ ni, aan Uwumbɔr puu tipuur tii bi na, le Moses nan di ŋi ŋa u ponn ni.

¹⁰ Bitotoorb aah nan bi nya Uwumbɔr Aadichal ni na, libuul ngbaan ni, le ntaalangbam kpaan gbiin li ponn ni

¹¹ ki wiin, ki joo Uwumbɔr aawiihn mu moor lak lak na, le baa nan ki ŋmaa gir koo ki ti tun baatun.

¹² Le Solomonn mee limeel ke: “Uwumbɔr, si le di nwiin kaan kitaapaak, le ki tee gee ke aa li koo ntaalangbam ni, mbɔmbɔɔn ni.

¹³ Tɔ, m maa Saadichal li ŋan sakpen, ki wiir na tii si, nima le aa ga li koo n‑yoonn mɔmɔk.”

Solomonn aah di tibɔr ti tuk binib ngbaan na

¹⁴ Israel aanib aah nan si nima na, le Ubɔr Solomonn nan fenn toŋ bi, le ki mee Uwumbɔr aanyoor ŋa bi pu.

¹⁵ U nan bui ke, “Pak Israel yaab Aadindaan Uwumbɔr man. U joo tipuur ti u nan puu tii nte David ke,

¹⁶ ‘Ki nyan n‑yoonn mu m nyan ni maanib Ijipt aatiŋ ni ki nan saa din na, maa lee kitiŋ kibaa Israel yaab aatiŋ ni, ke nima chee le bi ga maa Lidichal li ponn ni bi ga li dooni mi na. M tee lee si David, ke aa li joo maanib Israel yaab.’”

¹⁷ Solomonn nan ki bui ke, “Nte David nan ŋa nlandak, ke u maa Uwumbɔr Aadichal li ponn ni bi ga li dooni Israel yaab Aadindaan Uwumbɔr na,

¹⁸ le Uwumbɔr nan bui u ke, ‘Ni ŋan ke aa ban aa maa Lidichal tii mi,

¹⁹ aa mu aan ŋmaa maa li. Ni ye aajapɔɔn la, aabaa aajapɔɔn le ga maa Lidichal tii mi.’

²⁰ “Tɔ, le Uwumbɔr sil joo waah puu tipuur ti na. Min le nab nte aanaan pu, ki ye Israel yaab aabɔr, le ki maa Lidichal li ponn ni bi ga li dooni timi Israel yaab Aadindaan Uwumbɔr na.

²¹ M ki di Waakaal Aadakaa u ŋitakpapapan ŋilee na bi u ni na di siin Waadichal ngbaan ni. Ŋitakpapapan ngbaan pu le bi nan ŋmee kimɔbaan ki Uwumbɔr ni tiyajaatiib nan ŋa buyoonn uma Uwumbɔr nyan ni bi Ijipt aatiŋ ni na.”

Solomonn aah nan mee limeel li na

²² Binib ngbaan aanimbiin ni nima, le Solomonn nan buen ti sil kitork aabimbiln chee, ki yoor uŋaal paacham,

²³ le ki mee limeel ke, “Israel yaab Aadindaan Uwumbɔr, ubaa aa bi paacham, ni kitiŋ mɔmɔk pu ke sin na. Saanib yaa di bisui mɔmɔk kii tii si kan, le aa joo saah nan puu tipuur ti tii bi na, le ki mɔk bi saageehm.

²⁴ Aa joo saah nan puu tipuur ti tii nte David na, ti mɔmɔk gbiin din wee.

²⁵ Tɔ, Israel yaab Aadindaan Uwumbɔr, m mee ke aa ga li joo tipuur tiken ti aa nan puu tii nte, ki bui u ke uyaabitiib yaa joo saakaal ke waah joo i pu na kan, bi ponn ni ubaa ga li bi n‑yoonn mɔmɔk ki ye Israel yaab aabɔr, ki joo bi.

²⁶ Israel yaab Aadindaan Uwumbɔr, kina pu na, cha saah nan puu pu tii saatutunn, nte David na mɔmɔk gbiin kina.

²⁷ “Tɔ, Uwumbɔr, m nyi ke saan ŋmaa koo taab do. Hali paacham mɔmɔk aa waa sakpen ki ga ŋeer si, kina pu na, Lidichal li m maa na par ke aa li koo li ponn ni.

²⁸ Ndindaan Uwumbɔr, m ye saatutunn la. Ŋun maameel, ki tii mi maah mee si ki ban pu na din wee.

²⁹ Li kii Lidichal limina nwiin pu, ni kinyeek mɔmɔk, nin chee aa lee ke bi li dooni si na le na do. M yaa di nnimbil toŋ Lidichal limina ki mee si kan, aa ŋun maameel.

³⁰ M ni saanib yaa di tinimbil toŋ ni Lidichal limina, ki mee si kan, aa ŋun timi aameel. Saah bi aado paacham na, ŋun, ki di cha pinn timi.

³¹ “Uwumbɔr, unii yaa tun uken taani, aan bi joo ni u kitork aabimbiln taab, Saadichal ni do, ke u nan puu tipuur ke waa nyi kan,

³² saah bi paacham na, pel ki ji saanaagbiib tibɔr. Daa unii u lir na aatafal ki ŋeer waah tun pu na, ki di unii u aabɔr ŋan na lii.

³³ “Saanib Israel yaab aadim yaa nyaŋ bi, baah tun si titunwanbir pu na pu, aan bi yaa fenn ki gir ni aa chee Saadichal ni do, ki sunn bibaa taab, ki mee si ke aa di cha pinn bi kan,

³⁴ saah bi paacham na, pel baameel. Di cha pinn saanib baatunwanbir, ki giin ni bi kitiŋ ki aa nan di tii bi ni biyaabitiib na pu.

³⁵ “Saanib yaa tun si titunwanbir, aan aa chuu utaal, waa ki nu, le bi yaa kpeln baabimbin, ki di binimbil toŋ ni Saadichal limina, ki sunn bibaa taab, ki mee si kan,

³⁶ saah bi paacham na, pel baameel. Di ubɔr ni Israel aanib aatunwanbir cha pinn bi. Uwumbɔr, mɔk bi ke bi tun tiwan ni ŋan na, ki cha utaal nu saatiŋ ki aa di tii saanib ke ki li ye biyaan n‑yoonn mɔmɔk na pu.

³⁷ “Nkon yaa lir kitiŋ kee pu, bee iweenlirkee yaa lir, bee libuln li ton na, bee itoon le yaa bii tijikaar, bee saanib aadim le yaa nan tak bi, bee iween le yaa bi bikaasisik ni kan,

³⁸ li pel baameel. Saanib Israel yaab ubaa aasui yaa bii, le u taln uŋaal limeel ponn ni, ki di toŋ ni Saadichal limina kan,

³⁹ pel waameel. Saah bi aado paacham na, pel, ki di cha pinn u, ki ter u. Sin baanja le nyi unibɔn aasui ponn ni aalandak. Unii aabimbin yaa ŋeer pu na kan, aa ŋa udaan kina,

⁴⁰ aan saanib li keei saamɔb, n‑yoonn mumɔk bi bi kitiŋ ki aa di tii tiyaajatiib na pu.

^41-42 “Uwɔwɔnja u bi kitiŋ ki daa na ni yaa ŋun saah kpa liyimbil pu na, ni saah tun ŋitukpaan ŋi tii saanib na, ki dan nan doon si, ki mee si Saadichal limina ponn ni kan,

⁴³ pel waameel. Saah bi aado paacham na, pel u chee, ki ŋa waah ban pu na tii u, aan dulnyaa aanib mɔmɔk bee si, ki li keei saamɔb, ke saanib Israel yaab aah ŋani pu na. Nima le bi ga bee ke maah maa Lidichal li na ponn ni, le bi ga li dooni si.

⁴⁴ “Aa yaa bui saanib ke bi faa baadim butɔb, aan bi si nin chee mɔk, ki lik ni kitiŋ ki aa lee na, ni Saadichal li m maa tii si na, ki yaa mee si kan,

⁴⁵ pel baameel. Saah bi paacham na, ŋun baameel ki tii bi linyaŋ.

⁴⁶ “Aa nyi ke unii ubaa aa bi kaa tun titunwanbir, kina pu na, saanib yaa tun si titunwanbir, le saaŋuul ponn ni aa cha baadim nyaŋ bi, ki chuu bi tinaagbiir, ki di bi buen kitiyayaŋ ni, hali kitiŋ ngbaan ni yaa daa kan,

⁴⁷ pel saanib aameel. Uwumbɔr, bi yaa bi kitiŋ ngbaan ni, ki yaa kpeln baabimbin ki mee si, ki kpiir baah ye titunwanbirdam, ni bibiindam sakpen pu na kan, ŋun baameel.

⁴⁸ Bi yaa bi kitiŋ ngbaan ni, ki yaa sil kpeln baabimbin, ki lik ni kitiŋ ki aa di tii biyaajatiib na, ki yaa lik ni Jerusalem aatiŋ ki aa lee na, ni Saadichal li m maa tii si na, ki mee si kan,

⁴⁹ kina kan, aa pel baameel. Saah bi aado paacham na, ŋun ki san bi kinimbaak.

⁵⁰ Di cha pinn bi baatunwanbir, ni baah yii saamɔb pu na mɔmɔk, ki cha baadim li joo bi tiŋann.

⁵¹ Bi ye aabaa aanib bi aa nyan ni bi mmii sakpiin mu ye Ijipt aatiŋ na ni la.

⁵² “Ndindaan Uwumbɔr, li kpa saanib Israel yaab ni baabɔr pu tiŋann n‑yoonn mɔmɔk, ki ŋun baameel n‑yoonn mu mɔmɔk bi yin si ki ban nterm na.

⁵³ Aa lee bi binib mɔmɔk ponn ni, ke bi li ye aabaa aanib, ke saah nan cha saatutunn Moses tuk bi pu, buyoonn aa nan nyan ni tiyaajatiib Ijipt aatiŋ ni na.”

Kookoo aameel

⁵⁴ Solomonn aah mee Uwumbɔr ti doo na, le u fii sil kitork aabimbiln taab, waah ba gbaa nin chee ki joo uŋaal paacham na.

⁵⁵ U nan teen mpɔɔn pu, le ki mee Uwumbɔr aanyoor ŋa binib bi mɔmɔk kuun si nima chee na pu. U nan bui ke,

⁵⁶ “Pak Uwumbɔr u tii waanib nsuudoon, waah nan puu ke u ga ŋa pu na. U joo tiŋann aapuur ti u nan puu tii waatutunn Moses timi pu na.

⁵⁷ Tidindaan Uwumbɔr li bi ti chee, ke waah nan bi tiyaajatiib chee pu na; u taa di timi lii kpala, bee u siir cha timi;

⁵⁸ u cha ti li keei waamɔb, aan ti li bi n‑yoonn mɔmɔk ke waah ban ti li bi pu na, ki li joo waakaal, ni waah tuk tiyaajatiib pu na mɔmɔk.

⁵⁹ Tidindaan Uwumbɔr li teer timi aameel, ni tiwan ni ti gaŋni u ki ban na bɔr n‑yoonn mɔmɔk. Cha u li san Israel aanib, ni baabɔr kinimbaak n‑yoonn mɔmɔk, ki joo cha baah ban pu iwiin mɔmɔk na wɔb,

⁶⁰ aan dulnyaa aatimbol mɔmɔk ga bee ke Uwumbɔr baanja le ye Uwumbɔr, ubaa aa ki bi.

⁶¹ Nimi, Tidindaan Uwumbɔr aanib, li ŋani waah ban pu na n‑yoonn mɔmɔk, ki li dii waakaal, ni waah len pu na mɔmɔk, ke naah dii din wee pu na.”

Baah di Uwumbɔr Aadichal tii u pu na

⁶² Le Ubɔr Solomonn ni binib ngbaan mɔmɔk toor kitork tii Uwumbɔr.

⁶³ U nan di ŋinaayil ŋichur moninko ni ŋilee, ni ipiih ŋichur nkub ni moninko le toor kimɔbaan aatork. Kina le ubɔr ni binib ngbaan mɔmɔk nan di Uwumbɔr Aadichal ŋum uma Uwumbɔr.

⁶⁴ Liyaadaal baan ngbaan le u nan toor lichiln aakaasisik ni, ni bi Uwumbɔr Aadichal aabisamɔb chee na, le ki toor kitork ki bi joo seer mmii ni na nima chee, ki kpee njikaabim aatork, ni tiwakor ti bi kɔr kimɔbaan aatork ni na aakpan. Tikumann aatork aabimbiln na nan par ke u di kitork ngbaan mɔmɔk aanann see mmii ni li pu, nima le cha u nan ŋa kina.

⁶⁵ Uwumbɔr Aadichal chee nima, le Solomonn ni binib ngbaan mɔmɔk nan jin Tikakar Aajim ki ti saa iwiin ilole. Kinipaak nan nyan ni dandar, ki yoor nya Hamaf aasan mu bi ŋŋangan wɔb na, ni Ijipt aatinaanmɔk, ŋŋangii wɔb.

⁶⁶ Winiin daal le Solomonn nan cha binib ngbaan kun. Bi mɔmɔk nan pak u, le ki kun, ki kpa mpopiin, Uwumbɔr aah nan di tinyoor ti mɔmɔk tii waatutunn David, ni waanib Israel yaab na pu.