1 Bibɔrb 7 - Uwumbɔr aagbaŋ

Solomonn aabɔrdichal aabɔr

¹ Solomonn nan maa ubaa aabɔrdichal mu, u nan di ŋibin kipiik ni ŋitaa le maa li.

^2-3 Kinaakook ki bi nan yin ki ke Lebanonn Aachook na aafɔfɔk nan ye ŋitaa nkub ni piiŋmu la, le nwawaan ye ŋitaa imonko itaa ni kipiik ni ŋiŋmu, le kaah paa paacham pu na ye ŋitaa imonko ilee ni ŋiŋmu. Ki nan kpa santina aajaatɔlk ŋiker ŋitaa pu la. Liker libaa mɔk nan ye jaatɔlk tiib kipiik ni biŋmu la, le santina aadɔpuinkee paa bi pu. Bi nan di santina aapiln le ŋeeb paab, ki ti kpaan naa tiwan aah sii tidir ti ponn ni na, le jaatɔlk tiib tek ti.

⁴ Ŋigon ŋilee ŋi nan bi ŋipepel ŋilee pu na nan kpa takolu tiib bitataa la.

⁵ Ibisamɔi ni takolu tiib ngbaan aah nan bi nin chee na nan kpa idɔ i bi ŋum na, ni i bi di puin taab, ni paacham na, le lipepel libaa aatakolu tiib nan lik lipepel liken aatakolu tiib.

⁶ Kinaakook ki bi nan yin ki ke Jaatɔlk tiib Aanaakook na aafɔfɔk nan ye ŋitaa imonko itaa ni kipiik ni ŋiŋmu, le nwawaan mu nan ye ŋitaa imonko ilee ni ŋiŋmu. Ni nan kpa kpasakaa, le bi di jaatɔlk tiib teŋ u.

⁷ Libɔrjal aadiik ki bi nan yin ki ke Libɔjil Aanaakook, nin chee Solomonn nan len binib aabɔr na nan kpa santina aapiln ti bi di tam tam ŋigon, ki nyan kitiŋ ki ti tuu ilɔkdɔ na.

⁸ Solomonn ubaa aadir ti mu nan ki ye lichiln libaa, ki bi Libɔjil Aanaakook aapuwɔb na, nan bi ke tidir tiken na la. U nan ki maa kina aadichal tii upuu, u nan ye Ijipt aatiŋ ni aabɔr aabisal na.

⁹ Bi nan di ŋitakpal ŋi ŋan na le maa tidir ngbaan mɔmɔk, ni lichisakpeln, ki piin lidinyikl ki ti teer ti. Bi nan kpii ŋitakpal ngbaan baah kpii ŋitakpal nin chee na, le ki gii ŋi ŋaŋ baah ban pu na, le ki di kapenta tiib aajum ŋakr ŋimɔgben mɔmɔk.

¹⁰ Bi nan di ŋitakpal ŋibam ŋi aafɔfɔk ye ŋitaa kipiik ni ŋilelee, aan ŋiken mu ye ŋitaa kipiik ni ŋiŋmuŋmu na, maa ŋidinyik,

¹¹ le ki di baah ŋakr ŋitakpal ŋiken ŋi na, ni santina aadɔ tɔŋ ŋitakpal ngbaan pu.

¹² Baah nan maa libɔrdichal aachiln, ni Uwumbɔr Aadichal aachinbik, ni Laanaakook na, bi nan di santina aadɔ paan nkuul tatar pu la.

Huram aatuln

¹³ Ubɔr Solomonn nan tun ti yin uja u bi yin u ke Huram na. U nan ye uwanŋar, le ki koo Taya aatiŋ ni. U nan ye unii u ŋmaa joo tikumann naani tiwan na la.

¹⁴ Ute, u kaa nan ki bi na, nan koo Taya aatiŋ ni la. U mu nan ye tikumann aawanŋal kpaan la; Huram aana nan ye Naftali aanibol ni aanii la. Huram nan ye unii u bae ki nyi tiwan aaŋam sakpen na la. U nan kii Ubɔr Solomonn aayim ngbaan, ke u ga li yeh tikumann aatuln mɔmɔk.

Tikumann aajaatɔlk tiib bilee na aabɔr

¹⁵ Huram nan naan tikumann aajaatɔlk tiib bilee. Ubaa mɔk aafɔfɔk nan ye ŋitaa moninko ni ŋilole la, le waah filk pu na mu ye ŋitaa kipiik ni ŋiniin. U nan di bi ŋum Uwumbɔr Aadichal aabisamɔb chee la.

¹⁶ U nan ki di tikumann ŋa tiwanaankaan nilee. Nibaa mɔk aafɔfɔk nan ye ŋitaa ŋilole ni ligeln, ke u di tɔŋ jaatɔlk tiib ngbaan pu.

¹⁷ U nan naan tiwan ni naahn tikululn na tɔŋ bi mɔmɔk bilee aapaacham,

¹⁸ le ki ŋa tikumann aanyɔla nyɔla ni bi ke ŋisubil na ikuul ilelee ni pu.

¹⁹ Bi nan naan tiwanaankaan ngbaan ke nsupuun na la, naah fɔk pu na le nan ye ŋitaa ŋiloob,

²⁰ le ki tɔk liwakokoln libaa pu, tiwanaankaan ni bi ke tikululn na pu. U nan naan ŋisubinaankee ngbaan ikui ilee, le ki bi ikuul ilee pu, ki mann goln tiwanaankaan ngbaan.

²¹ Huram nan di tikumann aajaatɔlk tiib bilee ngbaan di ŋum Uwumbɔr Aadichal aabisamɔb chee la: u nan yin jaatɔlk u ŋub ŋŋangii wɔb na ke Jakinn, le ki yin u ŋub ŋŋangan wɔb na ke Boas.

²² Nsupuunaankee ngbaan nan bi tikumann aajaatɔlk tiib ngbaan pu la. Kina le jaatɔlk tiib ngbaan aatuln nan doo.

Tikumann aakin na aabɔr

²³ Huram nan naan nkinja mu bi likokoln na, mu aanyonyoon nan ye ŋitaa ŋilole ni ligeln, le nwawaan ye ŋitaa kipiik ni ŋiŋmu, le mu aah mann goln pu na ye ŋitaa imonko ilee ni ŋiŋmu.

²⁴ U nan ŋa nyɔla nyɔla nfum mulee pu, ki mann goln nkinja ngbaan aamɔgbaln. Nyɔla nyɔla ngbaan nan naahn ntuunbim la, le mu ni nkinja ngbaan aakur mɔmɔk nan ye nfum mubaa.

²⁵ Nkinja ngbaan nan si tɔk tikumann aanaaja kipiik ni ilee pu la. I nan si le imunjal lik tɔb, itata lik lipepel libaabaa.

²⁶ Nkinja ngbaan aah nan filk pu na ga li ye lisangeln la. Mu aamɔgbaln nan mir lii yan yan, le ki naahn nsupuun aah poor pu na. Nkinja ngbaan aanyun ga ŋmaa gbiin ankɔra tiib ikui ilee.

Tikumann aatɔroku tiib

²⁷ Huram nan ki ŋa tikumann aatɔroku tiib kipiik; ubaa mɔk aafɔfɔk nan ye ŋitaa ŋiloob, le nwawaan mu ye ŋitaa ŋiloob, le ki paa paacham mu ŋitaa ŋinaa ni ligeln.

²⁸ U nan di tipiln ti bi likpakpaln na le saŋ idɔ ni, ki ŋa bi,

²⁹ le ki naan ichinn, ni inaaja, ni ifeen aawanaankaan ŋa tipiln ngbaan pu, ni idɔ i ŋub kaakaa na pu, le ki ŋa gɔlngɔln aawanaankaan nibaa ŋa idɔ ngbaan pu, ichinn ni inaaja ngbaan aapaacham, ni taab mu.

³⁰ Tɔroku mɔk nan kpa tikumann aataa ŋinana, le ki kpa tikumann aakujal li joo ŋitaa ngbaan na. Tilɔlɔnn tinaa mɔmɔk ni, nan kpa nin chee kisapeek ga tɔŋ na. U nan ŋa gɔlngɔln aanyɔla nyɔla tiwan ngbaan pu.

³¹ U nan ŋa kitɔk ki pu kisapeek ngbaan ga li tɔŋni na. Ntɔk ngbaan aamɔgben aah fɔk paacham pu na nan ye ŋisaŋ ŋitaa ki tɔk tɔroku ngbaan pu, le ki ye lisaŋ libaa ki koo tɔroku ngbaan aakur ni. U nan kpii mann kitɔk ngbaan ki ti to.

³² Tɔroku aataa aah nan paa pu na nan ye ŋisaŋ ŋinaa la; ŋi nan bi tipiln na aataab la, le ŋaakujal ni tɔroku ngbaan aakur nan ye likumuln libaa.

³³ Ŋitaa ngbaan nan bi ke itaan aatɔroku aataa na la, ŋikujal, ni tifambann, ni ipinbi, ni ŋikumbuu nan ye tikumann aakur la.

³⁴ Tɔroku mɔk nan kpa tiwan ninana, le ni tek tilɔlɔnn mɔmɔk aataab, le ni ni tɔroku aakur ye likumuln libaa.

³⁵ U nan ŋa nkuul tɔroku ngbaan aapaacham, le mu aah fɔk pu na ye lisaŋ ni ligeln. Nkuul ngbaan, ni tiwan ni tek mu na, ni tipiln na aakur nan ye likumuln, le ki dii tɔroku ngbaan aakur.

³⁶ U nan ŋa ifeen aawanaankaan, ni ichinn, ni libɔkpal aasui aanyɔla nyɔla ŋa tipiln, ni tiwan ni tek ti na pu, ni nin chee mɔmɔk mpaan bi ke u ŋa nyɔla nyɔla na, le ki ŋa gɔlngɔln gonn nyɔla nyɔla tiib ngbaan.

³⁷ Kina le u nan ŋa tɔroku tiib ngbaan; bi mɔmɔk nan naahn, le baawiwiir ni baawan mɔmɔk ŋak tɔb.

³⁸ Huram nan ki ŋa tisapar kipiik mu. Tɔroku mɔk nan kpa kisapeek. Kisapeek kibaa mɔk aawawaan nan ye ŋitaa ŋiloob la, le ki ga ŋmaa joo ikinja inaa aanyun.

³⁹ U nan di tɔroku tiib biŋmu le siin Uwumbɔr Aadichal ni aaŋangii wɔb, le ki di biŋmu biken na siin ŋŋangan wɔb; le ki di nkinja na siin ŋŋangii ni liwipuul aasisik ni.

Uwumbɔr Aadichal ni aawan aah ti kpaan pu na

^40-45 Huram nan ki ŋa ŋibuu, ni soobol tiib, ni ŋisambil. U nan ŋa Uwumbɔr Aameen Aadichal ni aawan mɔmɔk tii Ubɔr Solomonn. Waah nan ŋa tiwan ni na sɔ: Jaatɔlk tiib bilee na; ni tiwanaankaan ni nan bi ke lisambil ki tɔk jaatɔlk tiib ngbaan pu na; ni tikululn aanyɔla nyɔla tiib bi nan bi tiwanaankaan ngbaan pu na; ni tikumann aasubinaankee ŋi nan ye ikui inaa, ki bi ikuul ilelee pu, aan nkuul mubaa mɔk ye ŋisubil nkub, ki mann goln tiwanaankaan ngbaan na; ni tɔroku tiib kipiik na; ni tisapar kipiik na; ni nkin sakpiin na; ni nkin ngbaan aah tɔk inaaja kipiik ni ilee i pu na; ni ŋibuu, ni soobol tiib, ni ŋisambil na. Huram aah nan ŋa Uwumbɔr Aadichal ponn ni aawan ni mɔmɔk tii Ubɔr Solomonn na, nan ye tikumann ti joon kpal kpal na la.

⁴⁶ Ubɔr nan cha bi ŋa tiwan nee mɔmɔk baah donni tikur nin chee, aan ni bi Sukof ni Saretann aatim aasisik ni, ki bi Jɔɔdann Aafataŋ ni na la.

⁴⁷ Solomonn aa nan cha bi ŋaŋ tikumann ngbaan aanyunyuun, ba pu? ni ye ke tiwan ngbaan nan wiir sakpen, kina pu na, ubaa aa nan nyi taanyunyuun aah ye pu na.

⁴⁸ Solomonn nan ki cha bi di salmaa mu naan Uwumbɔr Aadichal ni aawan nibam. Nima le ye kitork aabimbiln, ni teebul u pu bi joo boroboro u bi di tii Uwumbɔr na paani na,

⁴⁹ ni karyaa tiib aah tɔŋni tiwan ni pu, aan ni ye kipiik, ki si Chain Chain Aapepel ni na, niŋmu le nan si ŋŋangii wɔb, le niŋmu mu si ŋŋangan wɔb; ni nsupuun aanyɔla nyɔla, ni karyaa tiib, ni tichaabar;

⁵⁰ ni n‑yikum, ni baah joo tiwan ni toor ŋikaryapal na, ni ŋisambil, ni tulalee aayon aasambim, ni nsambim mu bi joo moi mmii na; ni Chain Chain Aapepel aajaaleŋ, ni Uwumbɔr Aadichal aadir tiken aajaaleŋ tiib aakur. Bi nan di salmaa le naan tiwan nimina mɔmɔk.

⁵¹ Ubɔr Solomonn aah nan doo Uwumbɔr Aadichal ni aatuln mɔmɔk na, le u di tiwan ni mɔmɔk ute David nan di tii Uwumbɔr na ŋa Lidichal ngbaan aawan aadir ponn ni. Nima le ye tikunabr, ni salmaa, ni tiwan niken na.