1 Bibɔrb 6 - Uwumbɔr aagbaŋ

Solomonn aah maa Uwumbɔr Aadichal pu na

¹ Israel aanib aah nan nyan Ijipt aatiŋ ni na, ŋibin ikui inaa ni imonko inaa le nan jer. Solomonn aah nan jin Israel aanaan na aabinanar aaŋmalee, u bi yin u ke Sif na ponn ni, le Solomonn nan piin Uwumbɔr Aadichal aamaam.

² Li ponn ni aafɔfɔk nan ye ŋitaa imonko inaa ni kipiik, le nwawaan ye ŋitaa piitaa, le paacham aapapaan ye ŋitaa imonko ilee ni piiŋmu.

³ Kinaakook aafɔfɔk nan ye ŋitaa kipiik ni ŋiŋmu, le kaawawaan ye ŋitaa piitaa; kaawawaan, ni chain aadiik aawawaan nan ye nwawaan baan la.

⁴ Uwumbɔr Aadichal ngbaan aagon nan kpa ŋibun, le ŋi ponn ni wɔb waa jer lipaal wɔb.

⁵ Bi nan maa tidiwaatiir titaa tɔŋ tɔb pu tam Uwumbɔr Aadichal ngbaan aagon. Ti nan bi lipuwɔb, ni isikakl ilee mɔk pu. Kibaa mɔk aah paa paacham pu na nan ye ŋitaa ŋilole ni ligeln la.

⁶ Taab aadiik mɔk aawawaan nan ye ŋitaa ŋilole ni ligeln la, le sisik ni yoo ye ŋitaa ŋiwae, le paacham yoo ye ŋitaa kipiik ni ligeln. Baah nan maa Uwumbɔr Aadichal ngbaan aagon na, taab aagoln mɔk nan filk jer li tok li pu na. Bi nan ŋa kina ke paacham aadir na taa ki li kpa nibaa taab ke ni li tek ti.

⁷ Bi nan kpii ŋitakpal ŋi mɔmɔk bi joo maa na ŋitakpajoo ni la, kina pu na, ugagaar, bee kichɔk, bee tikur tibaa aafuuk aa nan ki bi Uwumbɔr Aadichal ngbaan aamaam chee.

⁸ Baah nan maa tidiwaatiir ti tɔŋ tɔŋ tɔb pu na aataab aadiik aabisamɔb nan bi Uwumbɔr Aadichal aaŋangii wɔb la, le ki kpa ŋibimbin ŋi pu bi ga li taar joi chaa sisik ni, ni paacham aadir ni na.

⁹ Kina le Ubɔr Solomonn nan maa Uwumbɔr Aadichal doo. U nan di santina aadɔ, ni lipiln le ŋeeb paacham.

¹⁰ Tidiwaatiir ti bi nan maa tɔŋ tɔb pu nfum mutataa, aan kibaa mɔk aah paa paacham pu na ye ŋitaa ŋilole ni ligeln na, nan tab Uwumbɔr Aadichal aagon lipaal wɔb, le bi di santina aadɔ dab ti chuu ŋigon ngbaan.

¹¹ Uwumbɔr nan bui Solomonn ke,

¹² “Aa yaa kii maamɔb ki joo maamɔkm kan, maah nan puu tipuur ti tii aate David na, m ga ŋa kina tii si.

¹³ M ga li bi saah bi maa Lidichal li na ponn ni, ki bi maanib Israel yaab chee. Maan di bi lii daalbaadaal.”

¹⁴ Kina le Solomonn nan maa Uwumbɔr Aadichal doo.

Uwumbɔr Aadichal ponn ni aawan

¹⁵ Bi nan di santina aakpan le di tam tam ponn ni aagon pu, ki nyan kitiŋ ki ti tuu ilɔkdɔ, le ki di busub bu naahn bugbum na aadɔ, ki di nak kitiŋ ke ncheen na.

¹⁶ Ponn ni aadiik ki bi yin ki ke Chain Chain Aapepel ni na, nan bi Uwumbɔr Aadichal ngbaan aapuwɔb la. Kaafɔfɔk nan ye ŋitaa piitaa, le bi di santina aadɔ ki chol kiir ki, ki nyan kitiŋ ki ti tuu ilɔkdɔ.

¹⁷ Kidiik ki nan bi Chain Aapepel aabisamɔb chee na aafɔfɔk nan ye ŋitaa imonko itaa la.

¹⁸ Bi nan naan nchichibum, ni nsupuun aawan le ŋa santina aakpan ŋi bi di tam ki ponn ni na pu; bi nan di santina aakpan le tam ki ponn ni ki ti doo, le baa waa ŋitakpal ŋi bi di maa kidiik ngbaan na.

¹⁹ Uwumbɔr Aadichal ngbaan aapuwɔb na, bi nan maa ponn ni aadiik kibaa, le ki di Uwumbɔr Aakaal Aadakaa siin nima.

²⁰ Ponn ni aadiik kimina aafɔfɔk nan ye ŋitaa piitaa, le nwawaan mu ye ŋitaa piitaa, le ki paa paacham mu ŋitaa piitaa; le bi di salmaa boon ki ponn ni ti doo. Bi nan di santina aakpan le paan kitork aabimbiln pu.

²¹ Bi nan di salmaa le boon Uwumbɔr Aadichal ponn ni ti doo, le ki di salmaa aakululn kiir ponn ni aadiik aabisamɔb. Bi nan di salmaa le boon ponn ni aadiik ngbaan mu.

²² Bi nan di salmaa le boon Uwumbɔr Aadichal ngbaan aaponn ni mɔmɔk. Kina le bi nan ŋa kitork aabimbiln li nan bi Chain Chain Aapepel ni na mu.

²³ Bi nan di olif aasub naan tiwan ni kpa ifeen na nilee nibaa siin Chain Chain Aapepel ni, le nibaa mɔk aah paa paacham pu na ye ŋitaa kipiik ni ŋiŋmu.

^24-26 Ni mɔmɔk aawiwiir, ni mbimbin nan ye tiwanbaan la. Nibaa mɔk nan kpa ifeen ilelee la, le yaafɔfɔk ye ŋitaa ŋilole ni ligeln, le ifeen ngbaan aah ga taln ki ti tuu tɔb pu na ye ŋitaa kipiik ni ŋiŋmu.

²⁷ Ni nan si kpak tɔb Chain Chain Aapepel ni, le naah taln ifeen pu na ilee ti tuu tɔb kidiik ngbaan aasisik ni, le ilee i gur na nibaa aafeen ti tuu lidigbimal libaa, le nee mu yoo ti tuu liken.

²⁸ Bi nan di salmaa le boon tiwan ni kpa ifeen na nilee ngbaan ti doo.

²⁹ Bi nan naan naan ifeen aawan, ni libɔkpal aasui, ni nsupuun le ŋa kidisakpeŋ aagon, ni ponn ni aadiik na aagon pu.

³⁰ Hali kidiik ngbaan ponn ni kitiŋ nan ye salmaa la.

³¹ Bi nan di olif aadɔ le ŋa jaaleŋ u piir nfum mulee pu na piin Chain Chain Aapepel aabisamɔb; le mbisamɔb ngbaan aapaacham ti bi chɔk chɔk.

³² Bi nan naan naan ifeen aawan, ni libɔkpal aasui, ni nsupuun le tam tam jaaleŋ tiib ngbaan. Bi nan di salmaa le boon jaaleŋ tiib, ni ifeen aawanaankaan, ni libɔkpal aasui ngbaan.

³³ Bi nan di olif aadɔ le ŋa jaaleŋ kpakpaln aadɔ, ki di ŋum kidisakpeŋ na aabisamɔb.

³⁴ Bi nan di busub bu naahn bugbum na aadɔ le di ŋa jaaleŋ tiib bi kpai na bilee, le ki di piin,

³⁵ le ki naan naan ifeen aawanaankaan, ni libɔkpal aasui, ni nsupuun ŋa bi pu, le ki di salmaa boon ni kpal kpal.

³⁶ Bi nan ŋa kichinbik, Uwumbɔr Aadichal aanimbiin ni, le ki di santina aakpan tɔŋ ŋitakpal aakuul itaa mɔk pu, ki maa ŋigon gob kichinbik ngbaan.

³⁷ Libiln aaŋmalee, u bi yin u ke Sif na ni, le bi nan piin lidinyikl aamaam. Solomonn aanaan ni aabinanar ni, le nan bi na.

³⁸ Solomonn aanaan ni aabin kipiik ni libaa ni aaŋmaniin, u bi yin u ke Bul na ni, le bi nan toor Uwumbɔr Aadichal doo, baah nan siin ke bi ŋa li pu na. Solomonn nan di ŋibin ŋilole le maa li.