1 Bibɔrb 5 - Uwumbɔr aagbaŋ

Solomonn aah gor ke u maa Uwumbɔr Aadichal pu na

¹ Taya aatiŋ Aabɔr Hiram aajɔ le nan ye David. Waah nan ŋun ke Solomonn le nab ute David aanaan pu na, u nan tun bininkpiib u chee.

² Le Solomonn nan di inaŋ imina giin tun Hiram chee ke:

³ “Aa nyi ke butɔb aah nan bi n‑yoonn mɔmɔk pu, aan nte David jaa ŋitimbol ŋi mann gob u na pu na, waa nan ŋmaa maa Lidichal tii Uwumbɔr aadoon pu, ki ti saa buyoonn Uwumbɔr nan tii u linyaŋ waadim pu na.

⁴ Tɔ, dandana, Ndindaan Uwumbɔr tii mi nsuudoon, maatinaanmɔk ni. Maa ki kpa bidim, le kaa ki san ijawaan ke ubaa ga tak mi.

⁵ Uwumbɔr nan puu tipuur tii nte David ke, ‘Aajapɔɔn u m ga ŋa u ubɔr saajal pu na, le ga maa Lidichal tii mi.’ Kina pu na, m ŋa nlandak ke m maa Lidichal tii Ndindaan Uwumbɔr.

⁶ Kina pu na, tun saatutum Lebanonn aachook ni, aan bi ti gaa santina aadɔ tii mi. Bi ni maatutum le ga li tun, le m ga pa saah ga siin kidaak ki na. Aa nyi ke maatutum aa nyi idɔ aagaam ke saatutum aah nyi pu na.”

⁷ Hiram aah ŋun tibɔr ngbaan na, le usui nan piir ki ti nyaŋ, le u bui ke, “Pak Uwumbɔr din wee, waah tii David ubolandaan u ke u nab waanaan pu, litimbol kpaan lee ni na.”

⁸ Le Hiram di inaŋ imina tun Solomonn chee ke: “M kan saah di inaŋ i tii ni mi na, ki ga ŋa tiwan ni aa ban na. M ga tii ni si santina, ni idɔ iken na.

⁹ Maatutum ga joo ŋidɔgen, ki nya ni Lebanonn, ki di dan nnyusakpem chee, ki nan buu ŋi ŋipapan, ki di deen nnyun pu, aan ŋi nan saa saah gee nin chee na. Nima chee le maatutum ga buur ŋi, le saatutum gaa ŋi. Maah ga li ban ke aa ŋa pu na le ye ke aa yeh maatutum ngbaan aapuul.”

¹⁰ Kina pu na, Hiram nan tii Solomonn santina aadɔgen, ni isui iken aadɔgen, waah ban pu na mɔmɔk,

¹¹ le Solomonn mu tii Hiram njikaabim bɔtɔ ŋichur imonko ilee, ni olif aakpan mu ikinja ikui iŋmu, libiln mɔmɔk ni, ke u li joo kpiini waanib.

¹² Uwumbɔr nan joo waah puu tipuur ti na, le ki tii Solomonn nlan. Nsuudoon nan bi Solomonn ni Hiram aasisik ni, le bi ŋa kimɔbaan.

¹³ Ubɔr Solomonn nan ban bitutum ŋichur piitaa le ke bi li tun binaagbiib aatuln. U nan nyan bi Israel aanib mɔmɔk ni la.

¹⁴ U nan di Adoniram le ŋa baaninkpel. U nan yakr bi ŋigetek ŋitaa pu la. Bitutum ŋichur kipiik le nan bi ligetekr mɔk ni, le ki cha ligetekr mɔk tun lituln, Lebanonn aatiŋ ni, uŋmal ubaa, le ki ti gir kun ni linampal, ki nan kal iŋmal ilee.

¹⁵ Solomonn nan ki kpa bitutum ŋichur imonko inaa, le bi bi ŋijoo ni ki kpii ŋitakpal, le bitutum ŋichur imonko itaa ni kipiik bi tui ŋitakpal ngbaan,

¹⁶ le ki di bijab ŋichur ŋitaa ni ikui itaa ŋa bininkpiib bi lik baatuln na.

¹⁷ Solomonn aamɔboln pu, le bi nan kpii ŋitakpal ŋi filk ki ŋan na, ke bi di maa Uwumbɔr Aadichal aadinyikl.

¹⁸ Solomonn aatutum, ni Hiram aatutum, ni bitutum bi nan nyan ni Biblos aatiŋ ni na, le nan toor ŋitakpal ni idɔ i bi ga di maa Uwumbɔr Aadichal na.