1 Bibɔrb 4 - Uwumbɔr aagbaŋ

Solomonn aaninkpiib aabɔr

¹ Solomonn nan ye Israel yaab mɔmɔk aabɔr la.

² Waaninkpikpaam sɔ: Utotoor: Sadok aajapɔɔn Asaria.

³ Nnaan aagbaŋmeeb: Sisa aajapɔtiib Elihoref, ni Ahija. Unii u nan joo tibɔr mɔmɔk aagbann na: Ahilud aajapɔɔn Jehosafat.

⁴ Butɔb aajab aaninkpel: Jehoyada aajapɔɔn Benaya. Bitotoorb: Sadok ni Abiatar.

⁵ Ŋipepel aaninkpiib aayidaan: Natann aajapɔɔn Asaria. Ubɔr aasusur: Natann aajapɔɔn Sabud u nan ye utotoor na.

⁶ Libɔrdichal ni aatutum aayidaan: Ahisar. Binaagbiib aayidaan: Abda aajapɔɔn Adoniram.

⁷ Solomonn nan nyan bijab kipiik ni bilee, le bi ye ŋipepel aayidam, Israel yaab aatiŋ ni. Bima le ga nan joo ni tijikaar nya ni baapepel ni, ki nan tii ubɔr, ni waadichal. Uja mɔk nan yeh uŋmal ubaa, libiln mɔk ni.

⁸ Bininkpiib kipiik ni bilee ngbaan, ni baah yeh ŋipepel ŋi na aayimbil sɔ: Ben‑Hur le nan yeh Efraim aagongon aatiŋ.

⁹ Ben‑Deker le nan yeh Makas, ni Saalbim, ni Bef Semes, ni Elonn, ni Bef Hanann aatim.

¹⁰ Ben‑Hesed mu le nan yeh Arubof, ni Soko aatim, ni Hefer aapepel mɔmɔk.

¹¹ Ben Abinadab, u nan yoor Solomonn aabisal, u bi nan yin u ke Tafaf na, le nan yeh Dor aapepel mɔmɔk.

¹² Ahilud aajapɔɔn Baana le nan yeh Taanak, ni Megido aatim, ni lipepel li nan bi duun Bef Sann aatiŋ, ki duun Saretann aatiŋ, ki bi Jesreel aaŋangii wɔb na, ki yoor kina ki ti saa Abel Mehola aatiŋ, ni Jokmeam aatiŋ mɔk.

¹³ Ben‑Geber le nan yeh Ramof aatiŋ ki bi Gilead ni na, ni ntimbim mu bi Gilead ni, ki ye Jair, u aayaaja ye Manase na aataŋaal pu aatim na, ni Agob aatiŋ ki bi Basann ni na aapepel, ki ti kpaan ntikpaam imonko itaa mu bi maa ŋigon gob mu, ki kpa tikumann aadɔ mu aabisamɔi aajaaleŋ ni na.

¹⁴ Ido aajapɔɔn Ahinadab le nan yeh Mahanaim aapepel.

¹⁵ Ahimaas, u nan yoor Solomonn aabisal uken, bi yin u ke Basemaf na, le nan yeh Naftali aapepel.

¹⁶ Husai aajapɔɔn Baana mu le nan yeh Aser aapepel, ni Bealof aatiŋ.

¹⁷ Parua aajapɔɔn Jehosafat le nan yeh Isakar aapepel.

¹⁸ Ela aajapɔɔn Simei mu le nan yeh Benjaminn aapepel.

¹⁹ Uri aajapɔɔn Geber le nan yeh Gilead aapepel li Amor Aabɔr Sihonn, ni Basann Aabɔr Og nan joo na. Uyidaan ubaa le nan bi, ki lik biyidam kipiik ni bilee bee, litingbaln ngbaan mɔmɔk pu.

Solomonn aanaan aakam yoonn

²⁰ Juda ni Israel aanib nan wiir ke litambol li dɔ nnyusakpem aagbaan na la. Bi nan ji ki nyu, le ki kpa mpopiin.

²¹ Solomonn le nan joo ŋitimbol aanib bi bi Yufrates Aamɔɔl, ni Filistia, ni Ijipt aatim aakaasisik ni na. Bi nan pa lampoo tii u, le ki ye waatutum, waamɔfal yoonn mɔmɔk.

²² Solomonn aah nan ban tiwan ni nwiin mɔmɔk na le nan ye n‑yon mu aanyunyuun ga pii nnyun ikinja moninko ni iŋmu na, ni n‑yonchak mu aanyunyuun ga pii ikinja piiŋmu na,

²³ ni inaa i bi kpiini i kinaabak ni na kipiik, ni inaa i bi kpaa i na moninko, ni ipiih nkub, kaa kahn ipeeman, ni ipeeyun, ni ikulun, ni ifeen aawan kpee.

²⁴ Solomonn le nan joo kitiŋ ki bi Yufrates Aamɔɔl liwilir wɔb na, ki nyan Tifsa aatiŋ ki bi Yufrates aagbaan na, ki ti saa Gasa aatiŋ ki bi liwilir wɔb na. Bibɔrb bi mɔmɔk nan bi Yufrates aawilir wɔb na nan ye waatutum la, le u nan kpa nsuudoon ŋitimbol ŋi mann goln u na chee.

²⁵ Waamɔfal yoonn mɔmɔk, Juda ni Israel aanib nan bi ŋŋmarm ni la, le lidichal mɔk kpa laasubil aasui aasaak.

²⁶ Solomonn nan kpa tɔroku aataan ŋichur imonko ilee, ni itaan ngbaan aah koo tidir ti ponn ni na, le ki kpa itaan i waajab diŋni i pu na ŋichur kipiik ni ŋilee.

²⁷ Waaninkpiib kipiik ni bilee na ubaa mɔk nan tii Ubɔr Solomonn waah ban tiwan ni uŋmal mɔk ni ubaa na, ni binib bi mɔmɔk ji libɔrdichal ni na la; bi nan tii u waah ban pu na mɔmɔk pel pel la.

²⁸ Nin chee bi ban njikaabim ni timokuun bi tii waatɔroku aataan, ni itaan iken na, uninkpel mɔk nan tii uyaan la.

²⁹ Uwumbɔr nan tii Solomonn nlan, ni inimbiwoln i ubaa aa nyi na, ni ichiin i unii aan ŋmaa ŋaŋ na.

³⁰ Solomonn nan kpa nlan jer liwipuul wɔb aalandam, ni Ijipt aalandam.

³¹ Uma le nan kpa nlan jer unibɔn mɔmɔk. U nan kpa nlan jer Esra aanibol ni aaja Etann, ni Mahol aajapɔtiib Hemann, ni Kalkol, ni Darda, le waayimbil nan yaa koo ŋitimbol ŋi mann goln waatiŋ na.

³² U nan naan ŋiyataŋak ŋichur ŋitaa, ki naan ilahn mu jer lichur.

³³ U nan len Lebanonn aasantina tiib, ni ikiisuk i muuni ŋigon paab na, ni tiwakor, ni inyoon, ni tiwanbaarkaan, ni ijan aabɔr.

³⁴ Dulnyaa wee mɔmɔk aabɔrb nan ŋun waalan bɔr, le ki tun ni binib ke bi nan ŋun u chee.