1 Bibɔrb 3 - Uwumbɔr aagbaŋ

Solomonn aah mee Uwumbɔr ban nlan pu na

¹ Solomonn nan yoor Ijipt aatiŋ aabɔr aabisal, le ki cha u ni ubɔr ngbaan ŋa limaantɔl. U nan yoor ni u, le ki nan cha u koo David Aatiŋ ni, le u ti nin maa waabɔrdichal, ni Uwumbɔr Aadichal, ni ligoln li mann goln Jerusalem na doo.

² Baa nan kee maa Lidichal tii Uwumbɔr, kina pu na, binib nan toor kitork tii u, kitork aabimbin yayan pu la.

³ Solomonn nan gee Uwumbɔr, le ki dii nsurm mu ute David nan tii u na, u mu nan tee kɔr tiwakor toor kitork ŋibimbin yayan pu.

⁴ N‑yoonn mubaa le u nan buen Gibeonn u ti toor kitork, ba pu? ni ye ke kitork aabimbikpaan nan bi nima la. N‑yoonn mu jer na, u nan toor kitork ki bi joo seer mmii ni na ki jer nfum nkub nkub.

⁵ Liyaadaal ngbaan aanyeek, le Uwumbɔr nan koo u chee tidaŋ ni, ki baa u ke, “Aa gee ke m ŋa ba tii si?”

⁶ Le Solomonn gar u ke, “Aa nan gee saatutunn, nte David, n‑yoonn mɔmɔk la, le u nan ye uninyaan, ki kii saamɔb, ki bi chob aa ni uma aakaasisik ni. Le aa beenin mɔk u saageehm sakpem mu bi n‑yoonn mɔmɔk na, ki tii u japɔɔn u gaa waanaan din wee na.

⁷ Ndindaan Uwumbɔr, aa cha m kal nte aajal pu ki ye ubɔr, kaa dii ke m ye ubo kaa nyi kitiŋ aajoom.

⁸ Min le ka do, binib bi aa lee ke bi li ye saanib, aan bi wiir, ubaa aan ŋmaa kahn bi na, aakaasisik ni na.

⁹ Kina pu na, tii mi nlan mu m ga ŋmaa di joo saanib ibamɔn ni, ki li nyi ni ŋan na, ni ni kaa ŋan na. Naa ye kina kan, m ga ŋa kinye aan ki joo saanisakpem bimina?”

¹⁰ Uwumbɔr aasui nan piin ke Solomonn mee nimina,

¹¹ kina pu le u bui u ke, “Saah mee ban nlan ke aa di joo kitiŋ ibamɔn ni, kaa mee ban limɔfafɔfɔŋ, ni liwangol, bee m ku saadim na,

¹² m ga ŋa saah mee pu na. M ga tii si nlan, ni ichiin, ki jer unii umɔk nan puen si ki kpa na, ubaa mu aan ki li bi ki li kpa kina aalan ni ichiin.

¹³ M ga ki tii si saah kaa mee ban ni na: aa ga li kpa liwankpal, ni kipak, saamɔfal mɔmɔk ni, ki jer ubɔr mɔmɔk.

¹⁴ Le aa yaa kii maamɔb, ki joo maakaal, ni mmɔkm, ke aate David aah nan joo pu na kan, m ga tii si limɔfal li fɔk na.”

¹⁵ Le Solomonn nan finn, ki bee ke Uwumbɔr len u chee tibɔr tidaŋ ni. Le u buen Jerusalem aatiŋ ni, ki ti sil Uwumbɔr Aakaal Aadakaa aanimbiin ni, ki toor kitork ki bi joo seer mmii ni na, ni kimɔbaan aatork, tii Uwumbɔr. Nee aapuwɔb le u ŋa njim tii waaninkpiib mɔmɔk.

Solomonn nan jin tibɔr ti pɔɔ sakpen na

¹⁶ Daalbaadaal le pateer tiib bilee bibaa dan Ubɔr Solomonn chee.

¹⁷ Bi ponn ni ubaa nan bui ke, “Mpɔɔndaan, m ni upii wee kpaan koo lidichal libaa ni la, le m ma ubijabo linampal, unimbil ni.

¹⁸ Maah ma maabo na aawiin ilee, le u mu ma ubijabo. Timi bilee ngbaan baanja le nan bi lidichal ngbaan ni, ubaa aa nan ki bi.

¹⁹ Le kinyeek kibaa, waa nyi ki nyiŋ ku waabo.

²⁰ Le u fii kinyeek ngbaan, le ki yoor maabo, maah dɔ geen pu na, ki di u ti bil waawandookaan pu; le ki di libikpol na ti bil maawandookaan pu.

²¹ Kitaak aah woln, aan m fii ki ban m ŋaan maabo libiil na, le m kan ke u kpo a. Le m moo too lik u mbamɔm, le ki kan ke maabo aa ye.”

²² Le upii uken na bui ke, “Naa ye kina. Ubo u fu na le ye min yoo, le libikpol na ye sin yoo.” Le njan yoo na gar u ke, “Naa ye kina. Libikpol na le ye sin yoo, le u fu na ye min yoo.” Kina le bi nan si kpak ubɔr aanimbiin ni.

²³ Le Ubɔr Solomonn bui ke, “Ni mɔmɔk bilee bui ke ubo u fu na le ye u yoo le u kpo na ye uma na yoo.”

²⁴ Tɔ, u nan tun le bi ti yoor ni kijaak aajuk; le baah joo ni ki na,

²⁵ le u bui ke, “Chuu gii por ubo u fu ngbaan na nfum mulee, ki di ligeln ligeln tii bi mɔmɔk.”

²⁶ Ubodaan aasui aah nan gee waabo sakpen pu na, le u bui ubɔr ke, “Mpɔɔndaan, m gaŋ si, taa ku ubo ngbaan. Di u tii u.” Le uken na ma bui ke, “Taa di u tii ti ponn ni ubaa; cha bi gaa gii u nfum mulee.”

²⁷ Le Solomonn bui ke, “Taa ku ubo ngbaan. Di u tii njan aapii na, uma le sil ye ubo ngbaan aana.”

²⁸ Israel aanib aah ŋun Solomonn aah nan siin pu na, le bisui nan gbiin kipak u pu, ba pu? bi nan bee ke Uwumbɔr tii u nlan ke u li joo ji tibɔr ibamɔn ni.