1 Bibɔrb 22 - Uwumbɔr aagbaŋ

Uwumbɔr aabɔnabr Mikaya aah nan sak Ahab pu na

¹ Ŋibin ŋilee ŋi nan paan na, nsuudoon nan dan Israel yaab ni Siria yaab aasisik ni,

² le libitatar ni, Juda yaab Aabɔr Jehosafat nan buen u ti mann Israel yaab aabɔr Ahab.

³ Ahab nan baa waaninkpiib ke, “Ba ŋa taa pɔɔn tibaa ke ti gaa Ramof aatiŋ ki bi Gilead aatiŋ pu na Siria aabɔr chee? Ki ye timi aatiŋ la.”

⁴ Le Ahab baa Jehosafat ke, “Aa ga cheen mi aan ti ti tak Ramof aatiŋ aa?” Le Jehosafat gar u ke, “Buyoonn aa gor na, m mu ni maatɔb aajab ni bitandam mu gor.

⁵ Tɔ, tee cha ti baa Uwumbɔr waahr.”

⁶ Kina pu le Ahab nan yin ni bibɔnabr bi aawiwiir ga nan pii ikui inaa na, le ki nan baa bi ke, “M buen ti tak Ramof aatiŋ aan m taa buen?” Bi nan gar u ke, “Ti tak ki. Tidindaan ga tii si linyaŋ.”

⁷ Le Jehosafat baa u ke, “Uwumbɔr Aabɔnabr ubaa aa ki bi ki ga ŋmaa baa Uwumbɔr tii timi ii?”

⁸ Le Ahab gar u ke, “Ubaa ki bi, Imla aajapɔɔn Mikaya. M tee nan u la, waa kee nabr tibɔnyaan tibaa tii mi; uma yaan ye tibɔbir ŋmeen la.” Jehosafat nan ki gar u ke, “Taa len kina.”

⁹ Kina pu le Ahab nan yin ni libɔrchiln ni aaninkpel ubaa ki nan bui u ke u li cha ti yin ni Mikaya mala.

¹⁰ Bibɔrb bilee ngbaan nan pee baanaan aawanpeenkaan, le ki ka baabɔrjal pu lidipoipaal li bi Samaria aatiŋ aabisamɔb chee na; bibɔnabr ngbaan mɔmɔk si binimbiin ni ki nabr tibɔr tuk bi.

¹¹ Bi ponn ni ubaa, Kenaana aajapɔɔn Sedekia nan naan tikur aayiin le ki bui Ahab ke, “Uwumbɔr aah len pu na sɔ: ‘Aa ga di nimina le jan Siria yaab kijaak ki nyaŋ bi pel pel.’”

¹² Bibɔnabr bi nan gur na mu nan len tibɔbaan ngbaan la. Bi nan bui ke, “Ti tak Ramof aatiŋ ki nyaŋ ki. Uwumbɔr ga tii si linyaŋ.”

¹³ N‑yoonn mue na, uninkpel u nan buen u ti yin ni Mikaya na nan ti bui u ke, “Bibɔnabr biken na mɔmɔk nabr ke ubɔr ga ti kan linyaŋ, ni ŋan ke aa mu ti nabr tibɔbaan ngbaan.”

¹⁴ Le Mikaya gar u ke, “Uwumbɔr u bi na pu, m puu ke m ga ti len waah tuk mi pu na la.”

¹⁵ Waah ti sil Ubɔr Ahab aanimbiin ni na, le ubɔr baa u ke, “Mikaya, m ni Ubɔr Jehosafat ga ŋmaa buen ti tak Ramof aatiŋ aan taan ŋman?” Le Mikaya nan gar u ke, “Ti tak man. Ni ga sil nyaŋ, Uwumbɔr ga tii nimi linyaŋ.”

¹⁶ Tɔ, Ahab nan ki bui u ke, “Aa yaa len m chee tibɔr Uwumbɔr aayimbil pu kan, len ibamɔn. Aa ban ke m tuk si kina nfum muŋa?”

¹⁷ Le Mikaya nan giin u ke, “M waa Israel aajab aah yaa ŋigongon paab ke ipiih i kaa kpa upihkpaal na aah bi pu na. Le Uwumbɔr bui ke, ‘Bijab bimina aa kpa usaloln; cha bi li chaa kun nsuudoon ni.’”

¹⁸ Le Ahab bui Jehosafat ke, “Maa ba puun bui si ke waa kee nabr tibɔnyaan tibaa tii mi ii? Uma yaan ye tibɔbir ŋmeen le n‑yoonn mɔmɔk.”

¹⁹ Mikaya nan ki len ke, “Tɔ, li pel man Uwumbɔr aah len pu na. M kan Uwumbɔr ka waabɔrjal pu paacham, le waatuuntiib mɔmɔk si gbɔk u.

²⁰ Le Uwumbɔr baa ke, ‘Ŋma ga ŋmann Ahab aan u buen Ramof aatiŋ ni aan bi ti ku u?’ Ntuuntiib ngbaan bibaa nan len tibaa, le biken mu len tiken,

²¹ le mubaa ti nyan sil, le ki buen Uwumbɔr chee, ki ti len ke, ‘Min le ga ŋmann u.’

²² Le Uwumbɔr baa mu ke, ‘Aa ga ŋa kinye?’ Le mu gar u ke, ‘M ga buen le ki ti cha Ahab aabɔnabr mɔmɔk mɔnn inyamɔn.’ Le Uwumbɔr bui ke, ‘Li cha ki ti ŋmann u. Aa ga ti ŋman.’”

²³ Mikaya nan ki len ke: “Naah ŋa pu na le bi na. Uwumbɔr le cha bibɔnabr bimina mɔnn si inyamɔn. Uma ubaa le siin ke aa ga ti kan tibɔbir.”

²⁴ Le ubɔnabr u bi yin u ke Sedekia na buen Mikaya chee, le ki ti faa u kitapak unimbil wɔb, ki baa u ke, “N‑yoonn mulamu aan Uwumbɔr Aafuur Nyaan nyan m chee ki ti len aa chee?”

²⁵ Le Mikaya bui u ke, “Buyoonn aa ti koo linambakol aadiik kibaa ni ke aa ti bɔr na le aa ga bee.”

²⁶ Le Ubɔr Ahab bui waaninkpiib ponn ni ubaa ke, “Chuu Mikaya ki di u buen kitiŋ kee aayidaan Amonn, ni ubɔrbo Joas chee.

²⁷ Aa ti bui bi ke bi di u ŋa kiyondiik ni, ki li tii u tikonjiir ki ti saa bundaal m ga gir ni, ni laafee na.”

²⁸ Le Mikaya teen ke, “Aa yaa gir ni ni laafee kan, kina kan, Uwumbɔr le aa len m chee tibɔr ke m di nabr si,” le ki ki len ke, “Ni mɔmɔk pel maah len pu na man.”

Ahab aakun aabɔr

²⁹ Le Israel yaab aabɔr Ahab ni Juda yaab aabɔr Jehosafat buen bi ti tak Ramof aatiŋ ki bi Gilead ni na.

³⁰ Ahab nan bui Jehosafat ke, “Taah cha butɔb ni na, maan peen tibɔrwan, si ma li pee nnaan aawanpeenkaan.” Kina pu na, Israel yaab aabɔr aa nan pee nnaan aawanpeenkaan le ki ti koo butɔb ni.

³¹ Siria aabɔr nan bui waataan aatɔroku tiib aaninkpiib piitaa ni bilee ke bi taa tak ubaa see Israel yaab aabɔr baanja.

³² Kina pu na, baah nan ti kan Ubɔr Jehosafat na, bi mɔmɔk nan dak ke Israel yaab aabɔr le na, le bi fenn ke bi ti lir u pu. Tɔ, u nan teen mpɔɔn pu,

³³ le bi bee ke Israel yaab aabɔr aa ye, le ki di cha, kaa ki san dii u.

³⁴ Tɔ, Siria aaja ubaa aa nan nyi, le ki too waapiin le mu ti yun Ubɔr Ahab aajaak aabɔkul aah nab tɔb pu nin chee na. Le u teen tuk uja u ŋaal waataan aatɔroku na ke, “M kan titotonn a. Fenn aapuwɔb ki nya butɔb ni.”

³⁵ Butɔb aah nan ton kpan kpan na, Ubɔr Ahab nan gaar ka waataan aatɔroku ni, le ki lik Siria aajab wɔb. Nsin mu nan nya lipinbuel ni na nan gbiin tɔroku ngbaan aataab; joo cha kijook na le u kpo.

³⁶ Nwiin aah ban mu lir na, le bi ŋun Israel aajab ponn ni ke: “Uja mɔk gir kun udo aatiŋ pu, ni waatiŋ ni.”

³⁷ Kina le Ubɔr Ahab nan kpo. Bi nan yoor u buen Samaria aatiŋ ni, le ki ti sub u.

³⁸ Bi nan ti finn waatɔroku, Samaria aabɔɔk ni la. Le Uwumbɔr aah nan len ke ni ga ŋa pu na, ibɔ lakr waasin; le bipiib bi joo bibaa kooh na mu finn bibaa nima chee.

³⁹ Ubɔr Ahab aah nan ki tun ŋitun ŋi mɔmɔk na, ni waabɔrdichal li bi nan di iluub aanyin nyaan li na, ni ntim mumɔk u nan maa na, bi Israel Aabɔrb Aatun Aagbaŋ ni la.

⁴⁰ Waah kpo na, le ujapɔɔn Ahasia nab waanaan pu.

Juda yaab aabɔr Jehosafat aabɔr

⁴¹ Israel yaab aabɔr Ahab aah nan ye ubɔr Israel aatiŋ ni pu na aabinanar ponn ni, le Asa aajapɔɔn Jehosafat nan jin Juda aanaan.

⁴² U nan ye ŋibin piitaa ni ŋiŋmu le ki jin nnaan, le ki ka Jerusalem aatiŋ ni, nnaan aajal pu, ki joo waanib ki ti saa ŋibin moninko ni ŋiŋmu. Una le nan ye Silhi aabisal Asuba.

⁴³ U nan bi ke ute Asa, u nan puen u jin nnaan na aah nan bi pu na la. U nan tun Uwumbɔr aageehn; waa nan tee ŋmaa kuln ŋiwaa aadoon. Binib nan beenin toor ŋi ki seer nnyɔknii ŋaawaadir ni.

⁴⁴ Jehosafat nan ŋa nsuudoon aamɔbaan Israel yaab aabɔr chee.

⁴⁵ Jehosafat aah nan ki tun ŋitun ŋi mɔmɔk na, ni waah nan kaar pu na mɔmɔk, ni butɔb aabɔr, ni mɔmɔk bi Juda Aabɔrb Aatun Aagbaŋ ni la.

⁴⁶ U nan kuln bijab ni bipiib bi mɔmɔk nan joo bibaa kooh, ŋiwaa aatork aabimbin chee, ki tun lituln nima ki nan gur ute Asa aayoonn na.

⁴⁷ Edom aatiŋ aa nan kpa ubɔr; Juda yaab aabɔr le nan ban unii kaan nima le u joo ki.

⁴⁸ Ubɔr Jehosafat nan ŋa iŋɔi i ga ŋmaa chuun nnyusakpem ni na, ke i li chaa Ofir aatiŋ ni ti joo ni salmaa; tɔ, i nan bee nnyun ni Esionn Geber aatiŋ chee, kaa chuun kpala.

⁴⁹ Le Israel yaab aabɔr Ahasia nan bui ke waajab li diir Jehosafat aajab iŋɔi ngbaan ni, le Jehosafat yii.

⁵⁰ Jehosafat nan kpo, le bi di u sub nnaan aacheek ni, David aatiŋ ni. Le ujapɔɔn Jehoram nab waanaan pu.

Israel yaab aabɔr Ahasia aabɔr

⁵¹ Jehosafat aah nan ye Juda yaab aabɔr pu na aabin kipiik ni lilolole ni, le Ahab aajapɔɔn Ahasia jin Israel aanaan, le ki nan bi Samaria aatiŋ ni ki joo waanib ki ti saa ŋibin ŋilee.

⁵² U nan dii mbiin aasan i ute Ahab, ni una Jesebel, ni Ubɔr Jeroboam, bi nan puen u jin Israel aanaan na nan dii ki tun Uwumbɔr titunwanbir, ki di titunwanbir mɔk Israel yaab na.

⁵³ U nan tun tii liwaal Baal le ki dooni li, ki fiin Israel yaab Aadindaan Uwumbɔr aaŋuul ke ute u nan puen u na aah nan ŋa pu na.