1 Bibɔrb 20 - Uwumbɔr aagbaŋ

Samaria yaab ni Siria yaab aatɔb aabɔr

¹ Siria Aabɔr Ben‑Hadad nan kuun waatɔb aajab, le bijojoob piitaa ni bilee biken sil uchaŋ ni, ki joo baataan ni yaatɔroku tiib ki buen ti gob Samaria aatiŋ le ki tak ki.

² U nan tun ituun kitiŋ ngbaan ni ke bi ti tuk Israel yaab aabɔr Ahab ke, “Ubɔr Ben‑Hadad bui ke

³ aa nyan saakunabr, ni salmaa, ni saapiib, ni saabim bi kpa mpɔɔn na tii ni u.”

⁴ Ahab nan gar u ke, “Tuk maaninkpel Ubɔr Ben‑Hadad ke m kii; u ga ŋmaa yoor m ni maah kpa tiwan ni mɔmɔk na ki li joo.”

⁵ Puwɔb le ituun nan ki gir ni Ahab chee ke Ben‑Hadad ki ban ke: “M tun ni ke aa di saakunabr, ni salmaa, ni saapiib, ni saabim tii ni mi.

⁶ Dandana wee na, m ban m tun ni maajab le bi nan beln saabɔrdichal ni, ni saaninkpiib aadichal, ki yoor tiwan ni mɔmɔk bi dak ke ni ye tiwanbankaan na. Bi ga fe li bi nima fen kinakokoona.”

⁷ Ubɔr Ahab nan yin ni bisalolm bi mɔmɔk bi kitiŋ ngbaan mɔmɔk pu na ki nan bui bi ke, “Ni kan ke uja wee ban u kuln timi la. U tun ni ke m tii ni mpuutiib, ni maabim, ni maakunabr ni salmaa, le m kii.”

⁸ Bisalolm ni binib ngbaan nan gar u ke, “Taa gar u; taa kii.”

⁹ Kina pu le Ahab nan gar Ben‑Hadad aatuun ngbaan ke, “Ti bui maaninkpel ubɔr ke m kii tii waajan aatuun, tɔ, lelee aatuun na ma kan, maa kii mu.” Ituun ngbaan nan gir buen le ki ki gir ni ki joo ni inaŋ iken ki nyan ni Ben‑Hadad chee ke:

¹⁰ “M ga tun ni bijab bi wiir na aan bi nan kuln saatiŋ ngbaan ki faa kaah ber pu na ŋum ni biŋaal ni. M yaa kaa ŋa kina kan, ŋiwaa faa ku mi.”

¹¹ Ubɔr Ahab nan gar bi ke, “Ti bui Ubɔr Ben‑Hadad ke butɔb aajabamɔnn kpa kipupuk butɔb aapuwɔb la, naa ye butɔb aah laa choo pu na.”

¹² Buyoonn Ben‑Hadad ni umaantɔtiib, bijojoob biken na, nan ka baakeken aaboo ni ki nyu ndaan na le ituun na nan di Ahab aagarm ngbaan tii bi. U nan bui waajab ke bi gor ki ti tak kitiŋ ngbaan, kina pu na, bi nan lul sil.

¹³ N‑yoonn ngbaan na, Uwumbɔr aabɔnabr ubaa nan buen Ubɔr Ahab chee ki ti bui u ke, “Uwumbɔr bui ke, ‘Taa san butɔb sakpem ngbaan ijawaan. M ga tii si linyaŋ bi pu din wee, le aa ga bee ke min le ye Uwumbɔr.’”

¹⁴ Le Ahab baa u ke, “Ŋma ga loln bijab nsan?” Le Uwumbɔr aabɔnabr bui u ke, “Uwumbɔr bui ke bijab bi laa ye ŋinachipɔmbil ki bi ŋipepel aayidam taab na le ga loln nsan.” Le ubɔr ki baa u ke, “Ŋma ga li ye bijab bi sil ye butɔb aajab na aasaloln?” Le ubɔnabr ngbaan bui u ke, “Sin.”

¹⁵ Le ubɔr yin ni bijab bi laa ye ŋinachipɔmbil ki ye bijab ikui ilee ni piitaa ni bilee ki bi ŋipepel aayidam aataab na mɔmɔk, le ki nin yin Israel aatɔb aajab. Bi mu nan ye bijab ŋichur ŋilole.

¹⁶ Butɔb ngbaan nan piin nwiin pu la, buyoonn Ben‑Hadad ni umaantɔtiib piitaa ni bilee na nan bi gbii ndaan baakeken aaboo ponn ni na.

¹⁷ Bijab bi nan laa ye ŋinachipɔmbil na le nan puen buen. Ben‑Hadad aah nan di binib bi tun ke bi lik ke ni bi kinye na, nan ti tuk u ke bi kan bijab nyan ni Samaria aatiŋ ni ki choo.

¹⁸ U nan bui bi ke, “Di niŋaal chur bi man, bi yaa choo ke bi nan tak timi bee bi yaa ban nsuudoon aabɔr pu le kan, chuu bi man.”

¹⁹ Ŋinachipɔmbil ngbaan le nan loln nsan butɔb ngbaan ni, le Israel aatɔb aajab di paan,

²⁰ le unii mɔk nan ku uja u ni uma jaa na. Siria aajab nan san, le Israel yaab san dii bi ni linimaln, tɔ, Ben‑Hadad nan di utaan san ŋmar, le waajab bi dik itaan pu na bibaa dii u.

²¹ Ubɔr Ahab nan ti koo timoor ni le ki chur itaan ni yaatɔroku tiib, le ki nyaŋ Siria yaab ngbaan pel pel.

²² Le Uwumbɔr aabɔnabr na buen Ubɔr Ahab chee ki ti bui u ke, “Gir ki moo ban saajab ki kpokl bi mbamɔm, ba pu? Siria yaab ngbaan ga nan ki tak nimi unaalan u choo na.”

Siria yaab aah ki gir tak Israel yaab pu na aabɔr

²³ Ubɔr Ben‑Hadad aaninkpiib nan bui u ke, “Israel aatiŋ aawaa ye ŋijoo paab aawaa la. Nima le nan cha Israel yaab nyaŋ timi. Tɔ, timi ni bima yaa pii tɔb ŋijoo aah kaa bi nin chee na kan, ti ga nyaŋ bi.

²⁴ Tɔ, nyan bijojoob piitaa ni bilee na baaninkpir ni, ki di butɔb aajab aaninkpiib siin baasisii.

²⁵ Aa yaa ŋa kina kan, aa ki ban butɔb aajab bi li wiir ke bijab bi nan san cha si na, ki cha itaan ni yaatɔroku tiib mu li beenin wiir ke baah nan wiir pu na. Timi ni Israel yaab ga ti pii tɔb ŋijoo aah kaa bi nin chee na, le n‑yoonn mue ma kan, ti ga nyaŋ bi.” Ubɔr Ben‑Hadad nan kii baasurm ngbaan.

²⁶ Unaalan aah nan fuu na le u ban waajab le u ni bima di buen Afek aatiŋ ni ke bi ti tak Israel yaab.

²⁷ Israel yaab nan nyan ni ki gor mbamɔm, le ki yakr ŋiker ŋilee pu ki buen ti sil toŋ Siria yaab ngbaan. Siria yaab ngbaan aah nan wiir sakpen ki gaa nima kookoo pu na, Israel yaab nan naahn iŋoob siib ibaa le aah yakr ŋiker ŋilee pu ki si na.

²⁸ Uwumbɔr aabɔnabr ubaa nan buen Ubɔr Ahab chee le ki ti bui u ke, “Uwumbɔr aah len pu na sɔ: ‘Siria yaab aah bui ke m ye ŋigongon pu aawaal, kaa ye ŋigongon aah kaa bi nin chee na yaal na, m ga cha aa nyaŋ baajab bi wiir sakpen na, le sin ni saanib ga bee ke min le ye Uwumbɔr.’”

²⁹ Siria yaab ni Israel yaab nan ka baakakaa ni le ki lik tɔb ki ti saa iwiin ilole. Winlole daal le bi nan di mur gbin tɔb, le Israel yaab nan ku Siria aajab ŋichur nkub.

³⁰ Bijab bi nan san ŋmar na nan san ti koo Afek aatiŋ ni, nima chee le kitiŋ ngbaan aagon lir ki ku bi ponn ni ŋichur moninko ni ŋilole. Ben‑Hadad nan san ŋmar ki ti bɔr kitiŋ ngbaan ni, lidichal libaa aadiik ki bi linambakol na ponn ni.

³¹ Waaninkpiib nan buen u chee le ki ti bui u ke, “Ti ŋun ke Israel yaab aabɔrb san kinimbaak. Tii timi nsan aan ti ti gbab tiwan ni saak kuub na tichaŋ ni, ki di iŋmin fin tisil, ki buen Israel yaab aabɔr chee ki ti gaŋ u saamɔfal pu.”

³² Le bi nan di tiwan ni saak kuub na gbab ki di iŋmin fin bisil, le ki buen Ahab chee ki ti bui u ke, “Saatutunn Ben‑Hadad gaŋni si waamɔfal pu.” Le Ahab gar bi ke, “U beenin fu uu? Ni ŋan. U bi ke nna aabo na le m chee.”

³³ Ben‑Hadad aaninkpiib nan si ban limɔkl la, le Ahab aah bui ke, “Nna aabo” na, le bi kpaan daa gaa, ki bui ke, “Ni ye saah len pu na, Ben‑Hadad ye aana aabo la.” Le Ahab bui bi ke, “Ti li joo ni u m chee man.” Ben‑Hadad aah nan fuu ni na, le Ahab bui u ke u koo ni u chee itaan aatɔroku ponn ni.

³⁴ Le Ben‑Hadad bui u ke, “M ga giin ntim mu nte nan gaa aate chee na tii si, le aa ga ŋmaa ŋa saanyaŋ Damaskus aatiŋ ni ke nte aah nan ŋa kinyaŋ Samaria aatiŋ ni pu na.” Ahab nan gar u ke, “Tipuur tee pu le m ga di si lii.” U ni uma nan ŋa kimɔbaan, le u di u lii.

Uwumbɔr aabɔnabr aah bii Ahab pu na

³⁵ Uwumbɔr aamɔboln pu le waabɔnabr ubaa nan bui uŋeen aatɔtiib ponn ni uken ke u faa u. Le uma ngbaan yii,

³⁶ le u bui u ke, “Saah yii Uwumbɔr aamɔb pu na, aa yaa siir cha mi do kan, libuul ngbaan ni le uchinn ga dan nan ku si.” Le waah siir na, libuul ngbaan ni le uchinn dan ki nan ku u.

³⁷ Ubɔnabr baan ngbaan nan ki buen uja uken chee ki ti bui u ke, “Faa mi.” Le uja ngbaan ŋa kina; u nan faa u mpɔɔn pu le ki tii u titotonn.

³⁸ Le ubɔnabr ngbaan ban litaln poo biin unimbil pu, ki ŋa ubaa ke bi taa bee u, le ki buen ti sil lisakakpil, ke Israel yaab aabɔr nan jer.

³⁹ Ubɔr ngbaan aah nan bi jer na, le Uwumbɔr aabɔnabr ngbaan teen bui u ke, “Maaninkpel, m ba bi butɔb ni, le butɔb aaja ubaa joo ni baah chur bidim bi na ubaa nan tii mi ki bui ke, ‘Li kii uja wee; u yaa san kan, aa ga di saamɔfal le pa, naa ye kina kan, aa ga pa tikunabr aamombil ŋichur ŋitaa.’

⁴⁰ Tɔ, ŋitun ŋiken aabɔr nan muk mi, le uja ngbaan san.” Le ubɔr ngbaan gar u ke, “Sin le jin aabaa tibɔr, le ki ga pa kina.”

⁴¹ Le Uwumbɔr aabɔnabr ngbaan chuu daa poor litaln na unimbil wɔb, le ubɔr kpaan bee u ke u ye Uwumbɔr aabɔnabr ubaa la.

⁴² Le ubɔnabr ngbaan nin bui ubɔr ngbaan ke, “Uwumbɔr aamɔboln sɔ: ‘Saah cha uja u m bui si ke aa ku u na san ŋmar na, aa ga lann aabaa aamɔfal, le saatɔb aajab ga kuln, baah cha baadim san ŋmar pu na pu.’”

⁴³ Ubɔr nan di ilandak ni nsuubiin le gir kun Samaria aatiŋ ni.