1 Bibɔrb 2 - Uwumbɔr aagbaŋ

David aah nan di waakookoo aabɔr sur Solomonn na

¹ David aah nan ban u kpo na, le u yin ujapɔɔn Solomonn, ki nan di waakookoo aasurm tii u ke:

² “Maayoonn fuu ni ke m kpo. Taa li san ijawaan, ki cha aanimbil li man

³ ki ŋa Aadindaan Uwumbɔr aah bui si ke aa ŋa pu na. Li dii waakaal, ni waamɔkm mɔmɔk, baah ŋmee i pu Moses Aakaal ponn ni na, aan ki kan tinyoor saatuln mɔmɔk ni, ni nin chee mɔk aa buen na.

⁴ Aa yaa kii Uwumbɔr aamɔb kan, u ga li joo tipuur ti u puu ki tuk mi, ke n‑yaabitiib yaa di bipobil ni bisui mɔmɔk kii waah len pu na mɔmɔk, ki ŋani kina kan, bi ga li ye Israel yaab aajojoob ki cha.

⁵ “Tibɔr tibaa ki bi ki kpee. Aa teer Joab aah nan ŋa mi tiwan ni na. U nan ku Israel aajab aaninkpiib bilee: bima le ye Ner aajapɔɔn Abner, ni Jeter aajapɔɔn Amasa. Aa nyi ke u nan ku bi nsuudoon aayoonn, ke u di teen baah nan ku binib butɔb yoonn pu na. U nan ku binib bi kaa tun taani na, le min le ye waah tun taani u na aabɔr, le ki ki jin kina aafalaa.

⁶ Aa nyi saah ga ŋa pu na; aa taa cha u kpo Uwumbɔr aakun.

⁷ “Aa tee ŋa Gilead aatiŋ aanii Basilai aabim tiŋann. Buyoonn m nan san aakpel Absalom pu na, bima le nan ter mi.

⁸ “Gera aajapɔɔn Simei u nyan Bahurim aatiŋ ki bi Benjaminn aapepel ni na aabɔr sɔ: Nwiin mundaal m nan buen Mahanaim aatiŋ ni na, u nan puun pam lii m pu, tɔ, waah nan ti ki kan mi Jɔɔdann Aamɔɔl chee na, m nan puu Uwumbɔr aayimbil pu tipuukpaan tii u, ke maan cha bi ku u.

⁹ Aa mu taa tee di cha u fam. Aa nyi saah ga ŋa pu na, aa cha u kpo.”

David aah kpo pu na

¹⁰ David nan kpo, le bi di u sub uma David Aatiŋ ni.

¹¹ U nan ye Israel yaab aabɔr, ki ti saa ŋibin imonko ilee la. U nan bi Hebronn aatiŋ ni ki ye ubɔr, ki ti saa ŋibin ŋilole, le ki koo Jerusalem aatiŋ mu ni, ki ti saa ŋibin piitaa ni ŋitaa.

¹² Solomonn le nan gaa ute David aanaan, le waanaan aapɔɔn nan nyal sil kib.

Adonija aakun aabɔr

¹³ Le Adonija, u aana ye Hagif na, buen Solomonn aana Batseba chee. Le Batseba baa u ke, “Mmann mue ye kijɔtiik aamann la aa?”

¹⁴ Le u gar u ke, “Mu ye,” le ki ki len ke, “M ban m mee si tiwan nibaa la.” Le u baa u ke, “Ni ye ba?”

¹⁵ Le u gar u ke, “Aa nyi ke min le ba ga li ye ubɔr. Israel yaab mɔmɔk mu nan dak kina la. Tɔ, ni mu aa ŋa kina, le nnaal jin nnaan ngbaan, ba pu? ni ye ke Uwumbɔr aageehn le ŋa.

¹⁶ Tɔ, m kpa tiwan nibaa le m mee si. Ŋaanii ki taa yii.” Le Batseba baa u ke, “Ni ye ba?”

¹⁷ Le u gar u ke, “Ŋaanii ki tuk Ubɔr Solomonn ke u di Abisag, usapɔɔn u nyan ni Sunem aatiŋ ni na tii mi, aan m di u ŋa mpuu. M nyi ke aa yaa len kan, waan yii.”

¹⁸ Le u gar u ke, “Tɔ, m ga tuk u tii si.”

¹⁹ Le Batseba buen ubɔr chee ke u ti len tii Adonija. Ubɔr nan fii sil ke u doon una le ki soon, le ki ti kal waanaanjal pu, ki cha bi joo ni liken, le u cha una kal lima ngbaan pu, uŋangii wɔb.

²⁰ Una nan len ke, “M ban m mee si tiwan nibaa siib kina la. Ŋaanii ki taa yii.” Le u baa u ke, “Nna, ni ye ba? Maan yii.”

²¹ Le u gar u ke, “Cha aakpel Adonija di Abisag ŋa upuu.”

²² Le ubɔr baa u ke, “Ni ŋa kinye aan aa nan mee Abisag ke aa di tii u? Aa ga ŋmaa bui ke m di lijal mu tii u, ba pu? nkpel le ye u, le utotoor Abiatar ni Joab si uchaŋ ni.”

²³ Le Solomonn puu tipuukpaan Uwumbɔr aayimbil pu ke, “M yaa kaa cha Adonija lann waamɔfal tibɔr tee pu kan, Uwumbɔr faa ku mi.

²⁴ Uwumbɔr nyal mi kaan nte David aabɔrjal pu; u joo waah puu tipuur ti na ki di nnaan ngbaan tii m ni n‑yaabitiib. M puu Uwumbɔr u bi n‑yoonn mɔmɔk na ke Adonija ga kpo din wee.”

²⁵ Kina pu le Ubɔr Solomonn nan tii Benaya nsan, le u nyan ki ti ku Adonija.

Abiatar aah kaan ki li ye utotoor pu na, ni Joab aakun aabɔr

²⁶ Le Ubɔr Solomonn bui utotoor Abiatar ke, “Gir kun saakpaakon ni, Anatof aatiŋ ni. Aa ŋeer nkun, m mu aan cha bi ku si dandana, ba pu? ni ye ke sin le nan yeh Uwumbɔr Aakaal Aadakaa, nte David chee, le aa ni uma nan kpaan jin waabɔbir mɔmɔk aafalaa.”

²⁷ Le Solomonn nyan Abiatar Uwumbɔr aatotoor aatuln ni, le ki cha Uwumbɔr aah len utotoor Eli ni uyaabitiib aabɔr, Silo aatiŋ ni pu na gbiin.

²⁸ Joab nan ŋun tibɔr ti ŋa na. U nan si Adonija aachaŋ ni la, waa nan si Absalom aachaŋ ni. Waah ŋun ke bi ku Adonija na, le u san buen Uwumbɔr Aabool ni, le ki ti bub chuu kitork aabimbiln aamɔju.

²⁹ Tibɔr ngbaan aah fuu Ubɔr Solomonn chee, ke Joab san buen Uwumbɔr Aabool ni, ki ti bi kitork aabimbiln taab na, le u tun ntuun ke mu ti baa Joab, ke ba ŋa aan u san buen kitork aabimbiln taab. Joab nan gar u ke u san Solomonn le ijawaan, le ki san buen Uwumbɔr chee. Le Ubɔr Solomonn tun Benaya ke u ti ku Joab.

³⁰ U nan buen Uwumbɔr Aabool ni, le ki ti bui Joab ke, “Ubɔr bui ke aa nya ni.” Le Joab bui ke, “Aayii, m ga kpo do la.” Le Benaya gir buen ubɔr chee, ki ti bui u Joab aah len pu na.

³¹ Le Solomonn bui ke, “Ŋa Joab aah len pu na. Ku u ki sub u, aan min ni David aayaabil ubaa aan ki li yeh Joab aah nan ku binib bi kaa tun taani na aabɔr.

³² Uwumbɔr ga daa Joab aatafal, waah nan ku binib bi nte David aa nyi ti ponn ni na pu. Joab nan ku binib bilee bi kaa nan tun taani ubaa ki soor u na: u nan ku Israel aajab aaninkpel Abner, ni Juda aajab aaninkpel Amasa.

³³ Baakun aatafadaan ga lir Joab ni uyaabitiib aayil pu, ki cha n‑yoonn mu kaa kpa ndoon na. Uwumbɔr ga tii David aayaabitiib bi kal waabɔrjal pu na linyaŋ n‑yoonn mɔmɔk.”

³⁴ Le Benaya buen Uwumbɔr Aabool ni, ki ti ku Joab, le bi di u sub udo aatiŋ ni, kinanchaŋ ni.

³⁵ Ubɔr nan di bijab aaninkpir ti Joab nan joo na tii Benaya, le ki di utotoor Abiatar mu aabuul ni tii Sadok.

Simei aakun aabɔr

³⁶ Le ubɔr tun ti yin ni Simei, ki nan bui u ke, “Maa saadichal Jerusalem aatiŋ ponn ni do, ki li koo li ponn ni, ki taa ki nya kitiŋ kee ni.

³⁷ Aa yaa nyan ki ponn ni ki ti jer Kidronn aabunbik na kan, aa ga sil kpo, le ni ga li ye sin aabaa aabɔr la.”

³⁸ Le Simei gar u ke, “Tɔ, Mpɔɔndaan, m ga ŋa saah len pu na.” Kina pu le u nan koo Jerusalem ni, ki yunn pam.

³⁹ Ŋibin ŋitaa aah jer na, le Simei aanaagbiib bilee san buen Gaf aatiŋ aanii Maaka aajapɔɔn, ubɔr Akis chee. Simei aah ŋun ke bi bi Gaf aatiŋ ni na,

⁴⁰ le u buu waabon, ki buen Gaf aabɔr Akis chee, ke u ti ban waanaagbiib. U nan ti kan bi, le ki di bi giin kun ni.

⁴¹ Solomonn aah ŋun Simei aah ŋa pu na,

⁴² le u tun ti yin ni u, le ki bui u ke, “M nan cha aa puu tipuukpaan Uwumbɔr aayimbil pu, ke aa taa ki nya Jerusalem aatiŋ ni. Le m nan sak si ke aa yaa ŋa kina kan, aa ga sil kpo. Saa nan kii tii kina, ki bui ke aa ga kii maamɔb aa?

⁴³ Ba ŋa aan aa bii saah puu tipuur ti na ki yii maamɔb?

⁴⁴ Aa nyi gbin gbin saah nan tun nte David taani u mɔmɔk na. Uwumbɔr ga daa aatafal kina pu,

⁴⁵ le ki ga tee ŋa waanyoor ŋa m pu, ki cha David aanaan nyal sil ki cha n‑yoonn mɔmɔk.”

⁴⁶ Le ubɔr tii Benaya nsan, le u nyan ki ti ku Simei. Solomonn le nan gur yeh ni mɔmɔk.