1 Bibɔrb 19 - Uwumbɔr aagbaŋ

Elaija aah nan bi Sainai aajool pu pu na

¹ Ubɔr Ahab nan tuk upuu Jesebel, Elaija aah tun pu na mɔmɔk, ni waah ku liwaal Baal aawaadam mɔmɔk pu na.

² Jesebel nan di inaŋ tun Elaija chee ke: “Fen kinakokoona, m yaa kaa fe ŋa si ke saah ŋa biwaadam ngbaan pu na kan, ŋiwaa faa ku mi.”

³ Elaija nan san ijawaan, le ki san; u nan di waatutunn buen Beerseba aatiŋ ki bi Juda aatiŋ pu na. U nan di waatutunn ngbaan lii nima,

⁴ le ki di nwimɔn chuun buen nteersakpiin ni. U nan ti sil nibaa chee le ki kal busub bubaa aaboon ni, ki ba neen ke u tee kpo. U nan mee limeel ke, “Uwumbɔr, nimina nyaŋ mi a. Gaa maawiin; m ba kpo kan, ni ŋan.”

⁵ U nan doon busub ngbaan taab le ki kpaan geen. Libuul ngbaan ni le Uwumbɔr aatuun meeh u le ki len ke, “Fii ki ji.”

⁶ U nan lik mann goln ubaa, le ki kan liboroboro kpiln, ni nnyun aatuun si uyil chee. U nan ŋman le ki nyun nnyun, le ki ki gir doon.

⁷ Uwumbɔr aatuun ngbaan nan ki gir nan finn u lelee ki len ke, “Fii kal ki ji, naa ye kina kan, lisachuln ngbaan ga tii si tibakr pam.”

⁸ Elaija nan fii kal, le ki jin ki nyun nnyun, le tijikaar ngbaan nan tii u mpɔɔn u di chuun iwiin imonko ilee ki buen Uwumbɔr Aajool Sainai na chee.

⁹ Nima chee le u nan ti koo kitakpaluŋ ni kinyeek ke u doon. Libuul ngbaan ni le Uwumbɔr len u chee ke, “Elaija, aa ŋani ba do?”

¹⁰ Le u gar u ke, “Ndindaan Uwumbɔr Mpɔɔnsakpiindaan, sin baanja le m dii n‑yoonn mɔmɔk, le Israel aanib bii aa ni bima aamɔbaan na, ki ber saatork aabimbin, ki ku saabɔnabtiib mɔmɔk. Min baanja le gur, le bi ban ke bi ku m mu.”

¹¹ Le Uwumbɔr bui u ke, “Nya ki ti sil nnimbiin ni, lijool ngbaan pu.” Le Uwumbɔr jer ki cha libupɔpɔɔl daa ki wiil ŋigongon ni ŋitakpal, Uwumbɔr mu aa nan bi libuln ngbaan ni. Libuln ngbaan nan ŋmin kaa ki daar, le kitiŋ dam ki puu, tɔ, Uwumbɔr aa nan bi kitiŋ aah puu pu na ni.

¹² Kitiŋ aah dam ki puu jer na, mmii nan nyan ni; Uwumbɔr mu aa nan bi mmii ngbaan ni. Mmii ngbaan aah jer na, le ineel nan lɔe ki len tibɔr.

¹³ Elaija aah ŋun i pu na, le u di waabɔkul biin unimbil wɔb le ki nyan ti sil kitakpaluŋ ngbaan aamɔb chee. Le nneel len u chee ke, “Elaija, aa ŋani ba do?”

¹⁴ U nan gar ke, “Ndindaan Uwumbɔr Mpɔɔnsakpiindaan, sin baanja le m dii n‑yoonn mɔmɔk. Tɔ, Israel aanib bii aa ni bima aapuur na, ki ber saatork aabimbin, ki ku saabɔnabtiib mɔmɔk. Min baanja le gur, le bi ban ke bi ku m mu.”

¹⁵ Le Uwumbɔr bui u ke, “Gir buen nteersakpiin ki bi Damaskus chee na ni, ki koo kitiŋ ngbaan ni, ki di Hasael kaan Siria aatiŋ aanaan;

¹⁶ ki di Nimsi aajapɔɔn Jehu kaan Israel aatiŋ aanaan, ki di Safat, u nyan ni Abel Mehola aatiŋ ni na aajapɔɔn Elaisa ŋa ubɔnabr aan u gaa si.

¹⁷ Unii umɔk san ŋmar Hasael chee na, Jehu ga ku udaan, u mu san ŋmar Jehu chee na, Elaisa ga ku udaan.

¹⁸ Le m ga cha binib ŋichur ŋilole ŋmar Israel aatiŋ pu, bima le ye bi mɔmɔk kii maamɔb, kaa gbaan liwaal Baal aanimbiin ni, kaa moor laanaŋ na.”

Uwumbɔr aah yin Elaisa pu na aabɔr

¹⁹ Elaija nan siir le ki ti kan Elaisa bi joo inaa ko; inaa ilelee ŋiker kipiik ni libaa loln u pu nsan le u joo kookoo yaal na ko paa. Elaija nan chuu peer libɔkul li u pee paa paacham na ki di paan Elaisa pu.

²⁰ Le Elaisa siir cha inaa na, ki san paa Elaija pu ki len ke, “Cha m ti chɔi nte ni nna, aan ki nan dii si buen.” Le Elaija gar u ke, “Li cha, maa joo si.”

²¹ Le Elaisa gir waanaa ngbaan chee, ki ti kɔr i mɔmɔk, le ki di yaadɔ i pui isil pu na ŋaa yaanann. U nan di tinann ngbaan tii binib ngbaan, le bi ŋman ti. Le u buen ti dii Elaija ki ye waateter.