1 Bibɔrb 18 - Uwumbɔr aagbaŋ

Elaija ni Liwaal Baal aatotoorb aabɔr

¹ Ni nan bi cha ki ti saa ntaaweel ngbaan aabitatar ni, le Uwumbɔr bui Elaija ke, “Buen ki ti di aabaa mɔk Ubɔr Ahab aan m cha utaal sunn ni.”

² Le Elaija nan fii ki cha. Nkon mu nan bi Samaria aatiŋ pu na nan ti nyaŋ sakpen,

³ kina pu le Ahab yin ni libɔrdichal aayidaan Obadia. Obadia nan dii Uwumbɔr ni usui mɔmɔk la,

⁴ le n‑yoonn mu Jesebel nan bi ku Uwumbɔr aabɔnabtiib na, Obadia nan di bi ponn ni nkub ti bɔr titakpalunn tilee ponn ni. Piiŋmu piiŋmu le nan bi kitakpaluŋ ni, le u tii bi tijikaar ni nnyun.

⁵ Ahab nan bui Obadia ke, “Cha ti chuun kitiŋ kee pu aanyunbun, ni ŋimɔɔ mɔmɔk aabufan ponn ni ki lik ke ti ga kan timoor ti ga nan ŋeer itaan, ni tiwakor tiken aan ti taa kpo na, aan taan kan. Nibaakan taan ku timi aawakor.”

⁶ Bi nan kii tii tɔb unii mɔk aah ga buen kitiŋ ngbaan pu nin chee wɔb ki ti ban timoor na. Le bi mɔmɔk di toŋ baapepel.

⁷ Obadia aah nan cha na, le u ti kpaan di ton Elaija nsan ni. U nan bee u, le ki gbaan unimbiin ni, le ki baa u ke, “Sin sil ye ee?”

⁸ U nan gar u ke, “Een, min Elaija ye. Li cha ki ti bui saaninkpel ubɔr ke m bi do.”

⁹ Le Obadia gar u ke, “M ŋa ba, aan aa ban aa di mi koon linimaln ni, ki cha Ubɔr Ahab ku mi?

¹⁰ Aadindaan Uwumbɔr u bi na aayimbil pu, m puu ke ubɔr cha ti tee mban ki ban si dulnyaa wee aatingbaln mɔmɔk ni. Ujojoor umɔk ti ti bui ke saa bi waatingbaln pu na kan, see u cha ujojoor ngbaan puu ke baa sil kan si nima.

¹¹ Le aa ban ke m buen ti bui u ke aa bi do oo?

¹² M yaa siir cha aan Uwumbɔr Aafuur Nyaan yoor si di buen ubaa aah kaa nyi nin chee na kan, m ga ŋa kinye? Le m yaa ti bui Ahab ke aa bi do aan waa nan kan si kan, ni ŋeer u ku mi la. Teer ke maah nan laa ye ubo pu na le m nan di mbaa tii Uwumbɔr ki dooni u.

¹³ Saa ŋun ke Jesebel aah nan bi ku Uwumbɔr aabɔnabtiib na, m nan di bi ponn ni nkub ki yakr bi piiŋmu piiŋmu, ki bɔr titakpalunn ponn ni ki tii bi tijikaar ni nnyun aa?

¹⁴ Kina pu na, aa ga ŋa kinye ki tun mi ke m ti bui ubɔr ke aa bi do? U ga ku mi.”

¹⁵ Le Elaija gar u ke, “M puu Uwumbɔr Mpɔɔnsakpiindaan u bi aan m dii u na pu ke m ga di mbaa mɔk ubɔr din wee.”

¹⁶ Kina pu na, Obadia nan buen Ubɔr Ahab chee ki ti bui u, le Ahab fii ki cha u ti kan Elaija.

¹⁷ Ahab aah ti kan u na, le u bui u ke, “Sin le na aa? Israel yaab aabɔbankpaan.”

¹⁸ Le Elaija gar u ke, “Maa ye ubɔbann ubaa. Sin ni aate le ye bibɔbam. Aa yii Uwumbɔr aamɔb, le ki dooni liwaal Baal.

¹⁹ Tɔ, kuun Israel aanib mɔmɔk aan bi nan kan mi Kamel Aajool paab. Cha liwaal Baal aawaadam ikui inaa ni piiŋmu na, ni liwaapii Asera mu aawaadam ikui inaa bi Upiibɔr Jesebel kpiini bi na li dii ni.”

²⁰ Kina pu le Ahab kuun Israel aanib mɔmɔk ni liwaal Baal aawaadam ke bi keln tɔb Kamel Aajool paab.

²¹ Elaija nan buen binib ngbaan chee le ki ti bui ke, “Ni ga ki yunn kinye aan ni kpeln nimi aalandak? Uwumbɔr le yaa ye Nidindaan kan, ni li dooni u; liwaal Baal le yaa ye nidindaan kan, ni li dooni li.” Tɔ, binib ngbaan aa nan gar tibaa.

²² Le Elaija bui ke, “Min baanja le gur Uwumbɔr aabɔnabtiib ponn ni ki fu, le liwaal Baal aawaadam ikui inaa ni piiŋmu beenin bi.

²³ Li joo ni inaaja ilee man; ki cha liwaal Baal aawaadam li yeh ubaa, ki kɔr u ki chɔi waanann, ki di paan idɔ pu, ki taa tuur mmii. M mu ga ŋa unaaja uken na kina.

²⁴ Le ni cha liwaal Baal aawaadam mee baawaal, aan m mu mee Uwumbɔr, aan udaan u kii ki cha mmii sunn ni na, uma le ye Uwumbɔr.” Le binib ngbaan kii ni kookoo jɔk jɔk.

²⁵ Le Elaija bui liwaal Baal aawaadam ngbaan ke, “Nimi aah wiir sakpen na, nyan man unaaja ki puen ŋa u. Mee nimi aawaal man, ki taa tee di mmii see idɔ ngbaan.”

²⁶ Bi nan chuu unaaja u bi di tii bi na, ki toor u, le ki mee liwaal Baal nwiin ti kal sisik ni. Bi nan tar ke, “Liwaal Baal, kii timi aameel,” le ki waa liwaal mann kitork aabimbiln li bi maa siin na. Le nibaa aa ŋa.

²⁷ Nwiin aah kal sisik ni na, le Elaija piin ki joo bi ŋani yaansara ke: “Li mee mpɔɔn pu man. Li sil ye liwaal la. Nibaakan li ka gbaa tibɔr libaabaa la, bee li bi sɔnni la, bee li ga li buen nsan la. Nibaakan li ga li dɔ geen la, ni ga finn li la.”

²⁸ Le biwaadam ngbaan nan moo mee mpɔɔn pu ki joo njum geei bibaa baakaal aah mɔk pu na, le nsin ti gur puu.

²⁹ Bi nan beenin ŋmɔ tijar ki len yɔl yɔl le nwiin ti kpar; le nibaa aa nin ŋa, hali kifuuk kina aa nyan ni.

³⁰ Le Elaija bui binib ngbaan ke, “Foor dan m chee man.” Le bi mɔmɔk kuun mann goln u. Le u piin ki bi toor Uwumbɔr aatork aabimbiln li nan ber na.

³¹ U nan ban ŋitakpal kipiik ni ŋilee, libaa mɔk si ŋinibol kipiik ni ŋilee ŋi joo Jakob aajapɔtiib aayimbil na. Jakob ngbaan le Uwumbɔr nan yin u ke Israel na.

³² U nan di ŋitakpal ngbaan le maa kitork aabimbiln Uwumbɔr aadoon pu. U nan gbii libuul mann goln li, li nan waa, ki ga ŋmaa joo nnyun galaŋ tiib bilee,

³³ le ki di idɔ paan libimbiln ngbaan pu, le ki chɔi unaaja ngbaan ki di paan idɔ ngbaan pu, le ki bui ke, “Lu nnyun ituun inaa man ki nan di pɔl kitork ngbaan ni idɔ ngbaan mɔmɔk pu.” Bi nan ŋa kina,

³⁴ le u bui ke, “Ki ŋa kina man,” le bi ki ŋa. Le u ki bui ke, “Ki gir ŋa kpee man,” le bi ki ŋa.

³⁵ Le nnyun ngbaan nan puu sunn libimbiln ngbaan ki ti gbii libuul li u ba gbii mann goln na.

³⁶ Naah nan ŋeer nwiin pu aatork yoonn na, le Elaija buen ti sil kitork ngbaan chee ki mee ke, “Abraham, ni Aisak, ni Jakob Aadindaan Uwumbɔr, mɔk dandana ke sin le ye Israel yaab Aawumbɔr, le m ye saatutunn ki bi ŋani nimina saah tuk mi pu na pu la.

³⁷ Gar mi Uwumbɔr, gar mi, aan binib bimina bee ke sin Uwumbɔr le ye Bidindaan, le ki bi giini bi aabaa chee.”

³⁸ Le Uwumbɔr cha mmii sunn ni, ki nan wun kitork ngbaan, ni idɔ, ni ŋitakpal, ki kuur kitiŋ kpan kpan, le nnyun mu dɔ libuul na ponn ni na foor pel pel.

³⁹ Binib ngbaan aah kan kina na, le bi tar lir kitiŋ, ki len mpɔɔn pu ke, “Uwumbɔr le ye Tidindaan, Uwumbɔr baanja le ye Tidindaan.”

⁴⁰ Le Elaija bui bi ke, “Chuu liwaal Baal aawaadam man; taa cha ubaa san ŋmar man.” Le binib ngbaan nan chur bi mɔmɔk, le Elaija di bi buen Kisonn Aamɔɔl ni ki ti ku bi mɔmɔk.

Ntaaweel aah doo pu na

⁴¹ Elaija nan bui Ubɔr Ahab ke, “Tɔ, li cha ki ti ji tijikaar. M ŋun utaal aah fu choo pu na.”

⁴² Ahab aah buen u ti ji na, le Elaija jon Kamel Aajool paab le ki boon aan uyil ti koo utaŋaayil aakaasisik ni.

⁴³ U nan bui waatutunn ke, “Li cha ki ti lik nnyusakpem wɔb.” Ututunn ngbaan nan buen ki gir ni, ki nan len ke, “Maa waa nibaa.” Elaija nan cha u gir ti lik ki ti saa nfum mulole.

⁴⁴ Mulolole pu na le u gir ni ki nan len ke, “M waa ntaalangbam mu kaa filk fuu unii aaŋaal na nyan ni nnyusakpem wɔb ki choo.” Le Elaija nan bui waatutunn ngbaan ke, “Li cha ti bui Ubɔr Ahab ke u koo waataan aatɔroku ni ki li chaa kun aan utaal taa chuu u gaar do.”

⁴⁵ Naa yunn le ntaalangbam mu nyuun na biin kitaapaak mɔmɔk, le libuln piin ki bi daar, le utaasakpiin piin ki bi nu. Ahab nan koo waatɔroku ni ki gir cha Jesreel aatiŋ ni.

⁴⁶ Uwumbɔr aapɔɔn nan sunn ni Elaija pu; le u di waawanpeenkaan fin uchaŋ ni kin kin, le ki san ti jer Ahab pu kina ki ti fuu Jesreel aatiŋ ni.