1 Bibɔrb 17 - Uwumbɔr aagbaŋ

Elaija ni ntaaweel aabɔr

¹ Uwumbɔr aabɔnabr, u bi nan yin u ke Elaija, aan u nyan ni Tisbe aatiŋ ki bi Gilead ni na le nan bui Ubɔr Ahab ke, “M ye timi Israel yaab Aadindaan Uwumbɔr u bi na aatutunn. M tuk si waayimbil pu ke limaln bee utaal aan ki juu kitiŋ pu ki ti saa ŋibin ŋilee bee ŋitaa, see m ti bui u ke u nu.”

² Le Uwumbɔr bui Elaija ke,

³ “Nya do ki li cha liwipuul wɔb ki ti bɔr mbun mu bi yin mu ke Kerif na, Jɔɔdann aamɔɔl aawipuul wɔb na chee.

⁴ Mbun ngbaan ni le aa ga li nyu nnyun, le m ga cha ikaabɔn le joo tijikaar tii ni si nima.”

⁵ Elaija nan kii Uwumbɔr aamɔb, le ki buen ti bi Kerif, mbun ngbaan chee.

⁶ U nan nyu nnyun mbun ngbaan ni la, le ikaabɔn mu joo ni tijikaar ni tinann kichakpiik ni, ni kijook mɔk, ki tii u.

⁷ Ni nan bi cha le mbun ngbaan foor ki kuur ntaaweel na pu.

Elaija ni Sarefaf aakpopii na

⁸ Le Uwumbɔr nan bui Elaija ke,

⁹ “Tɔ, li cha Sarefaf aatiŋ ki bi duun Saidonn aatiŋ na ni, ki ti li koo nima. M bui ukpopii ubaa nima ke u li kpiini si.”

¹⁰ Kina le Elaija nan buen Sarefaf aatiŋ ni, le waah ti fuu kitiŋ ngbaan aagoln aabisamɔb chee na, le u kan ukpopii ubaa bi peei idɔ. Le u bui u ke, “M gaŋ si, tii ni mi nnyun aan m nyu.”

¹¹ Le waah cha u ti ban ni nnyun ngbaan na, le u ki teen bui u ke, “Ŋaanii ki kpaan li joo ni boroboro siib mu.”

¹² Le u gar u ke, “Aadindaan Uwumbɔr u bi na pu, m puu ke maa kpa boroboro. Maah kpa tiwan ni na le ye n‑yon pɔkaa kina lisambil ni, ni olif aakpan siib likpasambil ni. M dan do ke m nan pii idɔ ki di siib ngbaan ŋa tii m ni njapɔɔn la. Timi aakookoo aajikaar le ga li bi na, le nkon ga nin ku timi.”

¹³ Le Elaija bui u ke, “Taa cha ni muk si. Aa ma li cha ki ti ŋa saajiir. Tee puen ŋa likpiln waatiir, saah kpa siib u na ni, ki li joo ni mi, ki nin ŋa aa ni aajapɔɔn yaan.

¹⁴ Israel yaab Aadindaan Uwumbɔr bui ke: ‘N‑yon aan doo lisambil ngbaan ni, le nkpan mu aan doo likpasambil ni waahr aan min Uwumbɔr ga cha utaal nu na.’”

¹⁵ Ukpopii ngbaan nan buen le ki ti ŋa Elaija aah bui u pu na, le bi mɔmɔk nan kani ki ji ni ti yunn.

¹⁶ Uwumbɔr aah cha Elaija puu tipuur ti na, n‑yon aa nan doo lisambil ngbaan ni, le nkpan mu aa doo likpasambil ni.

¹⁷ Ni nan bi cha le ukpopii ngbaan aajapɔɔn buŋ; ni nan moo nyaŋni cha la, le u ti baan kpo.

¹⁸ Le u bui Elaija ke, “Uwumbɔr aanii, ba ŋa aa ŋa mi kina? Aa dan do ke aa nan teer Uwumbɔr maatunwanbir, le ki cha njapɔɔn kpo oo?”

¹⁹ Le Elaija bui u ke, “Di ubo ngbaan tii mi.” Elaija nan gaa ubo ngbaan uŋaal ni, le ki di u buen paacham aadiik ki ponn ni u nan koo na, le ki ti di u paan tiwandookaan pu.

²⁰ Le u mee Uwumbɔr mpɔɔn pu ke, “Ndindaan Uwumbɔr, ba ŋa aa tun ukpopii umina lituln limina aaboln? U kpa tiŋann sakpen le ki kpiini mi, le aa ku ujapɔɔn.”

²¹ Le Elaija tar doon paan ubo ngbaan pu nfum mutaa ki mee Uwumbɔr ke, “Ndindaan Uwumbɔr, giin ni ubo wee limɔfal ni.”

²² Uwumbɔr nan kii Elaija aameel; le ubo ngbaan piin ki bi fuur le ki fikr.

²³ Elaija nan di u sunn taab una chee le ki bui u ke, “Lik, saabo na aa kpo.”

²⁴ Le u gar u ke, “Dandana ma kan, m bee ke aa ye Uwumbɔr aanii la, le Uwumbɔr sil len aa chee tibɔr.”