1 Bibɔrb 16 - Uwumbɔr aagbaŋ

¹ Uwumbɔr nan len Hanani aajapɔɔn Jehu, u nan ye waabɔnabr na chee tibɔr, le ki di inaŋ tii u ke u di tuk Baasa ke:

² “Aa nan ye aa‑mu‑ye‑ŋma, le m tee ŋa si maanib Israel yaab aasaloln. Le aa tun titunwanbir ke Jeroboam na ki cha maanib tun titunwanbir.

³ Baatunwanbir fiin maaŋuul, kina pu na, m ga kuln aa ni saadichal, ke maah ŋa Jeroboam pu na.

⁴ Ibɔ le ga ŋmɔ saadichal ni aanib bi kpoi kitiŋ ponn ni na, le nangba tiib gbaa bi kpoi timoor ni na.”

⁵ Baasa aah nan ki tun ŋitun ŋi mɔmɔk na, ni waah nan kaar pu na aabɔr bi Israel Aabɔrb Aatun Aagbaŋ ni la.

⁶ Baasa nan kpo le bi sub u Tirsa aatiŋ ni, le ujapɔɔn Ela nab waanaan pu.

⁷ Baasa aah nan tun Uwumbɔr titunwanbir ti na pu le Uwumbɔr aabɔnabr Jehu di Uwumbɔr aabɔr ti ga pii u ni waadichal na len. Naa ye waah nan tun titunwanbir ke Jeroboam u nan puen u jin nnaan na aah nan tun pu na pu baanja le nan fiin Uwumbɔr aaŋuul, waah nan ku Jeroboam aadichal mɔmɔk pu na mu nan kpee.

Israel yaab aabɔr Ela aabɔr

⁸ Ubɔr Asa aah nan ye Juda yaab aabɔr pu na aabin moninko ni ŋiloob ponn ni, le Baasa aajapɔɔn Ela nan jin Israel aanaan, ki nan bi Tirsa aatiŋ ni, ki joo waanib ki ti saa ŋibin ŋilee.

⁹ Simri, u nan ye waaninkpiib ponn ni ubaa, ki ye ubɔr aataan aatɔroku tiib ligeln aayidaan na, nan ban u pu isan i kaa ŋan na. Daalbaadaal, le Ela nan bi waaninkpel Arsa do Tirsa aatiŋ ni, ki ban u gbii ndaan. Arsa le nan ye libɔrdichal aayidaan.

¹⁰ Simri nan koo lidichal ngbaan ni le ki ti ku Ela, le ki nab waanaan pu. Juda yaab aabɔr Asa aanaan ni aabin moninko ni ŋilole ni le nan bi na.

¹¹ Simri aah nab nnaan pu na, libuul ngbaan ni le u kpaan ku Baasa aadichal aanib mɔmɔk. Uja umɔk nan ye Baasa aado yoo bee ujɔ na, bi nan ku bi mɔmɔk.

¹² Kina pu na, Uwumbɔr aah nan cha waabɔnabr Jehu len Baasa aabɔr ti na, Simri nan ku Baasa aadichal aanib mɔmɔk.

¹³ Baasa ni ujapɔɔn Ela aawaa aadiim pu, ni baah di Israel yaab koon titunwanbir aatuln ni na pu, le bi nan fiin bima Israel yaab Aadindaan Uwumbɔr aaŋuul.

¹⁴ Ela aah nan ki tun ŋitun ŋi mɔmɔk na bi Israel Aabɔrb Aatun Aagbaŋ ni la.

Israel yaab aabɔr Simri aabɔr

¹⁵ Ubɔr Asa aah nan ye Juda yaab aabɔr pu na aabin moninko ni ŋilole ni, le Simri jin Israel aatiŋ aanaan ki bi Tirsa aatiŋ ni ki joo waanib ki ti saa iwiin ilole. Israel aatɔb aajab nan bi gob Gibetonn aatiŋ ki bi Filistia aatiŋ pu na,

¹⁶ le baah ŋun ke Simri ban isan i kaa ŋan na ubɔr pu ki ku u na, libuul ngbaan ni, nima chee le bi kpaan di baaninkpel Omri kaan Israel yaab aabɔr.

¹⁷ Omri ni waajab nan siir cha Gibetonn aatiŋ, le ki buen ti gob Tirsa aatiŋ.

¹⁸ Simri aah kan ke bi nyaŋ kitiŋ ngbaan na, le u koo libɔrdichal aadifɔfɔk ki bi ponn ni na ni, le ki see libɔrdichal lii, le ki kpo mmii ngbaan ni.

¹⁹ Waah nan tun Uwumbɔr titunwanbir na pu le nimina nan ŋa. U nan tun Uwumbɔr titunwanbir ki cha Israel yaab mu tun titunwanbir ke Jeroboam u nan puen u jin nnaan na, le ki bii Uwumbɔr aasui.

²⁰ Simri aah nan ki tun ŋitun ŋi mɔmɔk na, ni waah nan lok ubɔr ibuu pu pu na mɔmɔk bi Israel Aabɔrb Aatun Aagbaŋ ni.

Israel yaab aabɔr Omri aabɔr

²¹ Israel aanib nan yakr la: bibaa nan ban ke bi di Ginaf aajapɔɔn Tibni le kaan nnaan, le biken mu nan gee Omri.

²² Kookoo na, binib bi nan gee Omri na le nan jin; Tibni nan kpo, le Omri jin nnaan.

²³ Ubɔr Asa aah nan ye Juda yaab aabɔr pu na aabin piitaa ni libaa ni, le Omri jin Israel aatiŋ aanaan, le ki ka lijal pu ki ti saa ŋibin kipiik ni ŋilee. Njan aabin ŋiloob na ni, u nan bi Tirsa aatiŋ ni la,

²⁴ le ki nin daa Samaria aagongoln aatiŋ tikunabr aamombil ŋichur ŋiloob, uja u bi nan yin u ke Semer na chee. Omri nan maa kitiŋ nima, le ki maa ŋigon gob ki, le ki di Semer, u nan yeh ligongoln ngbaan na aayimbil ki di yin ki ke Samaria.

²⁵ Omri nan tun Uwumbɔr titunwanbir ki jer binib bi nan puen u jin nnaan na.

²⁶ Waatunwanbir, ni waah nan cha Israel aanib mu tun titunwanbir ki dooni ŋiwaa ke Jeroboam u nan puen u jin nnaan na aah nan tun pu na, le nan fiin bima Israel yaab Aadindaan Uwumbɔr aaŋuul.

²⁷ Omri aah nan ki tun ŋitun ŋi na mɔmɔk, ni waah nan nyaŋ pu mɔmɔk na bi Israel Aabɔrb Aatun Aagbaŋ ni la.

²⁸ Omri nan kpo, le bi sub u Samaria aatiŋ ni, le ujapɔɔn Ahab nab waanaan pu.

Israel yaab aabɔr Ahab aabɔr

²⁹ Ubɔr Asa aah nan ye Juda yaab aabɔr pu na aabin piitaa ni ŋiniin ponn ni le Omri aajapɔɔn Ahab jin Israel aatiŋ aanaan, le ki nan bi Samaria aatiŋ ni ki joo waanib ki ti saa ŋibin moninko ni ŋilee.

³⁰ U nan tun Uwumbɔr titunwanbir ki jer bibɔrb bi mɔmɔk nan puen u ki jin nnaan ngbaan na.

³¹ Ubɔr Jeroboam aah nan tun titunwanbir pu na nan par u chee, le u nabr paan ki yoor Saidonn Aabɔr Etbaal aabisal Jesebel, le ki nan dooni liwaal Baal.

³² U nan maa Baal aawaadiik, Samaria aatiŋ ni, le ki ŋa liwaabimbiln siin ki ponn ni.

³³ U nan naan liwaapii Asera aanaŋ mu. U nan tun Israel yaab Aadindaan Uwumbɔr titunwanbir, ki jer Israel yaab aabɔrb bi mɔmɔk puen u jin nnaan na, le ki fiin waaŋuul.

³⁴ Waayoonn le Hiel u ye Betel aatiŋ aanii na nan ki gir maa Jeriko aatiŋ. Uwumbɔr aah nan puen cha Nunn aajapɔɔn Josua len Jeriko aatiŋ aabɔr pu na, Hiel aah nan ti bil Jeriko aadinyikl aatakpal doo na le ujapɔpol Abiram kpo, le waah ti ma ibisamɔi na le ujapɔɔn uwaatiir Segub mu kpo.