1 Bibɔrb 15 - Uwumbɔr aagbaŋ

Juda yaab aabɔr Abija aabɔr

¹ Ubɔr Jeroboam aah nan ye Israel yaab aabɔr pu na aabin kipiik ni lininiin ni, le Abija jin Juda aanaan.

² U nan bi Jerusalem ni ki joo waanib ki ti saa ŋibin ŋitaa. Una aayimbil le nan ye Maaka. Maaka aate le nan ye Absalom.

³ U nan tun titunwanbir baan ti ute nan tun na, le kaa nan di ubaa tii Udindaan Uwumbɔr kookoo, ke uyaaja David aah nan di tii pu na.

⁴ Tɔ, David pu na, Udindaan Uwumbɔr nan tii Abija ubijabo ke u nan nab waanaan pu Jerusalem aatiŋ ni, ki li joo ki mbamɔm, nibaa taa ŋa ki.

⁵ David aah nan tun ŋitun ŋi piin Uwumbɔr aasui, kaa yii waah tuk u pu na pu, le u nan ŋa kina. David aataani ubaa u, u nan tun na le ye Hef aanii Uria aabɔr na baanja.

⁶ Butɔb bu nan fii Rehoboam ni Jeroboam aasisik ni na, nan beenin bi kina le Abija ti kpo.

⁷ Abija aah nan ki tun ŋitun ŋi mɔmɔk na bi Juda Aabɔrb Aatun Aagbaŋ ni la.

⁸ Abija nan kpo, le bi sub u David Aatiŋ ni, le ujapɔɔn Asa nab waanaan pu.

Juda yaab aabɔr Asa aabɔr

⁹ Ubɔr Jeroboam aah nan ye Israel yaab aabɔr pu na aabin moninko ni, le Asa jin Juda aatiŋ aanaan,

¹⁰ le ki bi Jerusalem aatiŋ ni ki joo waanib ti saa ŋibin imonko ilee ni libaa. Uyaa le nan ye Absalom aabisal Maaka.

¹¹ Asa nan tun Uwumbɔr aah gee pu na, ke uyaaja David aah nan tun pu na.

¹² U nan jenn nyan bipiib ni bijab bi mɔmɔk nan joo biwon kooh nin chee bi nan dooni ŋiwaa na kitiŋ ngbaan pu, le ki nyan ŋiwaa ŋi mɔmɔk uyaajatiib nan naan naan na.

¹³ Uyaa Maaka aah nan naan timar aawaapii Asera aanaŋ pu na, le u nan nyan u upiibɔr aanaan ni. Asa nan chɔi chɔi liwaal ngbaan ki ti see li mmii Kidronn Aafataŋ ni.

¹⁴ Asa aa nan ŋmaa nyan biwaadam aawaadir mɔmɔk kitiŋ ngbaan pu, u mu nan tee dii Uwumbɔr ni usui mɔmɔk le ki ti kpo.

¹⁵ U nan di tiwan ni mɔmɔk ute nan di tii Uwumbɔr na, ni uma ubaa aah nan di ni tii u na giin Uwumbɔr Aadichal ni.

¹⁶ Buyoonn Juda yaab aabɔr Asa, ni Israel yaab aabɔr Baasa nan bi mpɔɔn ni na, bi nan joo tɔb kijaak la.

¹⁷ Baasa nan koo Juda yaab aatiŋ ni le ki piin ki maa ŋigon gob Rama aatiŋ ke ubaa taa ki ŋmaa koo, bee u nya Juda aatiŋ ni.

¹⁸ Kina pu le Ubɔr Asa nyan tikunabr ni salmaa u mɔmɔk nan gur Uwumbɔr Aadichal, ni libɔrdichal ni na, ki di tun waaninkpiib bibaa Damaskus aatiŋ ni, Siria Aabɔr Ben‑Hadad chee. Ben‑Hadad aate le nan ye Tab‑rimonn, le uyaaja ye Hesionn. Inaŋ imina le u nan di tii bi:

¹⁹ “Cha ti li ye maantɔtiib ke titetiib aah nan bi pu na. Tikunabr timina ni salmaa wee ye ipiin le m joo tii si. Kina pu na, yii Israel yaab Aabɔr Baasa aamaantɔl ki cha u nyan waajab maapepel ni.”

²⁰ Ben‑Hadad nan kii Asa aalandak ngbaan, le ki cha waajab aaninkpiib ni baajab buen ti tak Israel yaab aatim. Bi nan nyaŋ Ijonn, ni Dann, ni Abel Bef Maaka aatim, ni lipepel li bi Galilee Aanyusakpem chee na, ni Naftali aapepel mɔmɔk.

²¹ Ubɔr Baasa aah ŋun tibɔr ti bi ŋani na, le u siir cha Rama aatiŋ aagon aamaam, ki buen Tirsa aatiŋ ni.

²² Le Ubɔr Asa tun ti tuk Juda aatim mɔmɔk aanib, kaa gann ubaa, ke bi ti yoor ŋitakpal, ni idɔ ni Baasa nan joo maa ligoln Rama aatiŋ ni na. Asa nan di tiwan ngbaan le maa gob Mispa aatiŋ, ni Geba aatiŋ ki bi Benjaminn aapepel ni na.

²³ Ubɔr Asa aah nan ki ŋa tiwan ni mɔmɔk na, ni waah nan kaar pu na, ni waah nan pɔɔk ntim mu na aabɔr bi Juda Aabɔrb Aatun Aagbaŋ ni la. Waah nan nan por pu na le kitaafaak aaween ibaa nan wɔb u.

²⁴ Asa nan kpo, le bi sub u nnaan aacheek ni, David Aatiŋ ni, le ujapɔɔn Jehosafat nab waanaan pu.

Israel yaab Aabɔr Nadab aabɔr

²⁵ Ubɔr Asa aah nan ye Juda yaab aabɔr pu na aabileler ponn ni, le Ubɔr Jeroboam aajapɔɔn Nadab jin Israel aanaan, le ki joo waanib ki ti saa ŋibin ŋilee.

²⁶ Ute u nan puen jin nnaan aan u nan nab na aah nan bi pu na, u mu nan tun Uwumbɔr titunwanbir ki cha Israel yaab mu tun kina la.

²⁷ Ahija aajapɔɔn Baasa u ye Isakar aanibol ni aanii na nan ban isan i kaa ŋan na Nadab pu le ki ku u. Nadab ni waajab nan gob Gibetonn aatiŋ ki bi Filistia aatiŋ pu na, le u ti ku u.

²⁸ Juda yaab aabɔr Asa aanaan aabitatar ni le nan bi na. Kina pu na, Baasa le nan nab Nadab aanaan pu Israel aatiŋ pu.

²⁹ Libuul ngbaan ni le u kpaan piin ki ku Jeroboam aadichal aanib. Uwumbɔr aah nan cha waatutunn, waabɔnabr Ahija, u nyan ni Silo aatiŋ ni na len pu na, bi nan ku Jeroboam aadichal aanib mɔmɔk; ubaa kina aa nan ŋmar.

³⁰ Jeroboam aah nan tun titunwanbir ki cha Israel yaab mu tun, ki fiin bima Israel yaab Aadindaan Uwumbɔr aaŋuul na le nimina nan ŋa.

³¹ Nadab aah nan ki tun ŋitun ŋi mɔmɔk na bi Israel Aabɔrb Aatun Aagbaŋ ni la.

³² Juda yaab aabɔr Asa ni Israel yaab aabɔr Baasa mɔmɔk aah nan bi mpɔɔn ni buyoonn na, bi nan bi kijaak ŋmeen ni la.

Israel yaab aabɔr Baasa aabɔr

³³ Ubɔr Asa aah nan ye Juda yaab aabɔr pu na aabitatar ponn ni le Ahija aajapɔɔn Baasa jin Israel aanaan, le ki nan bi Tirsa aatiŋ ni ki joo waanib ki ti saa ŋibin moninko ni ŋinaa.

³⁴ U nan tun Uwumbɔr titunwanbir ke Jeroboam u nan puen u jin nnaan na aah nan tun pu na la, le ki cha Israel yaab mu tun titunwanbir.