1 Bibɔrb 14 - Uwumbɔr aagbaŋ

Jeroboam aajapɔɔn aakun aabɔr

¹ N‑yoonn ngbaan le Ubɔr Jeroboam aajapɔɔn Abija buŋ.

² Le Jeroboam bui upuu ke, “Jer aabaa aan ubaa taa ŋmaa bee si, ki li cha Silo aatiŋ ni, nin chee Uwumbɔr aabɔnabr Ahija koo na, uma le nan bui mi ke m ga ji nnaan Israel aatiŋ pu na.

³ Aa li joo u ŋiboroboro kpin kipiik, ni maab, ni tisiir ntuun ponn ni. Aa ti baa ki bee tiwan ni ga ŋa tijapɔɔn na, aan u bui si.”

⁴ Kina pu le u buen Ahija do Silo aatiŋ ni. Tipor nan cha Ahija jɔb.

⁵ Uwumbɔr nan bui u ke Jeroboam aapuu choo u nan baa ujapɔɔn u bun na aabɔr, u chee. Uwumbɔr nan bui Ahija waah ga nan tuk u pu na. Jeroboam aapuu aah fuu ni na, u nan ŋmann ke u ye uniyayan ubaa la.

⁶ Tɔ, Ahija aah ŋun u bi koo ni na, le u bui ke, “Koo ni, m nyi ke sin Jeroboam aapuu ye. Ba ŋa aa bi ŋmanni ke aa ye uniyayan ubaa la? Maah kpa tibɔr ti m di tii si na aa ŋan.

⁷ Li cha ki ti bui Jeroboam ke Israel yaab Aadindaan Uwumbɔr bui u ke: ‘M nan nyan si binib ponn ni le ki di si ŋa maanib Israel yaab aajojoor.

⁸ M nan gaa nnaan ngbaan David aayaabitiib chee le ki di mu tii si. Tɔ, aa mu aa bi ke maatutunn David, u nan dii mi mbamɔm, ki kii maamɔb, ki nan ŋani tiwan ni m tii u nsan u ŋa na baanja na.

⁹ Aa tun titunwanbir ki jer bijojoob bi nan puen si ki joo kitiŋ na pel pel. Aa yii mi le ki di tikur naan tiwanaankaan ni ŋiwaa ke aa li dooni ŋi, le ki fiin maaŋuul.

¹⁰ Nimina pu na, m ga cha tibɔbir pii ni saanaanjirb ki ga ku aayaabitiib bi ye bijab na mɔmɔk. M ga ku mbim ni bininkpiib mɔmɔk la. M ga kuln saadichal; m ga ŋar bi ŋŋaan ke tinaabin na la.

¹¹ Ibɔ le ga ŋmɔ saadichal ni aanib bi kpoi kitiŋ ponn ni na, le nangba tiib gbaa bi kpoi timoor ni na. Min, Uwumbɔr le len kina.’”

¹² Le Ahija ki tuk Jeroboam aapuu ke, “Tɔ, li chaa kun. N‑yoonn mu aa ti kpaan koo kitiŋ ni na, le aajapɔɔn ga kpo.

¹³ Israel aanib mɔmɔk ga wii waakpuul le ki ga sub u. Uma baanja le ga kan likpunyaan Jeroboam aadichal ni, ba pu? Israel yaab Aadindaan Uwumbɔr lik faar uma baanja la.

¹⁴ Uwumbɔr ga kaan ubɔr Israel aatiŋ mɔmɔk pu le u ga kuln Jeroboam aanaanjirb.

¹⁵ Uwumbɔr ga daa Israel aanib aatafal, le Israel aatiŋ ga deŋ ke kimɔɔmook aah deŋni nkpen ni pu na. U ga ŋɔb Israel yaab kitinyaan ki u nan di tii biyaajatiib na pu, le ki ga cha bi yaa ki puur Yufrates aamɔɔl aapuwɔb, baah naan liwaapii Asera aanaŋ ti ki fiin waaŋuul na pu.

¹⁶ Jeroboam aah tun titunwanbir ki cha Israel yaab mu tun pu na le ga cha Uwumbɔr yii Israel yaab.”

¹⁷ Jeroboam aapuu nan gir kun Tirsa. Waah ti kpaan koo waadichal ponn ni na, le ubo ngbaan kpo.

¹⁸ Uwumbɔr aah nan cha waatutunn, waabɔnabr Ahija len pu na, Israel aanib nan wii waakpuul le ki sub u.

Jeroboam aakun aabɔr

¹⁹ Jeroboam aah nan ki tun ŋitun ŋi na, waah nan jan kijaak kimɔk na, ni waah nan joo kitiŋ pu na mɔmɔk bi Israel Aabɔrb Aatun Aagbaŋ ni.

²⁰ U nan ye ubɔr ki ti saa ŋibin moninko ni ŋilee la. U nan kpo, le bi sub u, le ujapɔɔn Nadab nab waanaan pu.

Juda yaab aabɔr Rehoboam aabɔr

²¹ Solomonn aajapɔɔn Rehoboam nan ye ŋibin imonko ilee ni libaa li ki jin Juda aanaan. U nan bi Jerusalem aatiŋ ki Uwumbɔr nan nyan Israel aapepel mɔmɔk ni ke ki li ye nin chee bi ga li dooni u na, ki joo Juda aatiŋ ki ti saa ŋibin kipiik ni ŋilole. Rehoboam aana le nan ye Naama. U nan ye Amonn aatiŋ aanii la.

²² Juda aanib nan tun Uwumbɔr titunwanbir ki ŋa taani u jer biyaajatiib mɔmɔk aah nan ŋa pu na le ki fiin waaŋuul.

²³ Bi nan maa maa nin chee bi dooni ŋiwaa ŋi ye fam na, le ki maa ŋibimbifɔfɔŋ, ni liwaapii Asera aanaŋ ŋigongon paab, ni isui i kpa mboon na taab.

²⁴ Ni nan ti nyaŋ sakpen na le ye ke bipiib ni bijab nan bi idoon aabuu ŋee ni ki joo biwon kooh. Juda aanib nan tun ŋinimɔɔntun ŋi mɔmɔk binib bi Uwumbɔr nan jenn nyan bi n‑yoonn mu Israel yaab nan tur koo baatiŋ ni na nan tun na.

²⁵ Rehoboam aanaan aabiŋmuŋmur ponn ni le Ijipt Aabɔr Sisak nan tak Jerusalem.

²⁶ U nan yoor liwangol limɔk nan bi Uwumbɔr Aadichal ponn ni, ni libɔrdichal ni na, ki yoor salmaa aapen ŋi Solomonn nan ŋa na mu.

²⁷ Ubɔr Rehoboam nan ŋa tikumann aapen le di leŋ ŋima ngbaan aaleleŋ, le ki di ŋa bininkpiib bi ye bi kii libɔrdichal aabisamɔi na aaŋaal ni.

²⁸ N‑yoonn mumɔk ubɔr nan cha Uwumbɔr Aadichal ni na kan, bikikiib ngbaan nan joo ŋipen ngbaan le ki dii u, le ki nan ki giin ŋi ŋaadiik ni.

²⁹ Ubɔr Rehoboam aah nan ki tun ŋitun ŋi na mɔmɔk bi Juda Aabɔrb Aatun Aagbaŋ ni la.

³⁰ N‑yoonn mumina mɔmɔk na Rehoboam ni Jeroboam nan bi kijaak ni la.

³¹ Rehoboam nan kpo, le bi di u sub nnaan aacheek ni, David Aatiŋ ni, le ujapɔɔn Abija nab waanaan pu.