1 Bibɔrb 13 - Uwumbɔr aagbaŋ

¹ Uwumbɔr nan cha waabɔnabr ubaa, u nan nyan ni Juda aatiŋ ni na, buen Betel aatiŋ ni ki ti fuu muin Jeroboam si kitork aabimbiln taab ki toor kitork.

² Uwumbɔr aah nan tuk waabɔnabr ngbaan pu na, u nan bii kitork aabimbiln ngbaan ki bui ke: “Kitork aabimbiln, kitork aabimbiln, Uwumbɔr aah len pu na sɔ: Ubo, u aayimbil ga li ye Josia na, ga nya David aadichal ni. U ga kɔr bitotoorb bi tun ŋiwaabimbin pu lituln ki toor kitork aa pu na, paan aa pu. U ga di unibɔn aakpab see mmii ni aa pu.”

³ Le Uwumbɔr aabɔnabr ngbaan ki len ke, “Kitork aabimbiln limina ga wur lir, le nfatan mu paa li pu na ga yaa. Le aa ga bee ke Uwumbɔr le cha m len.”

⁴ Ubɔr Jeroboam aah ŋun tibɔr timina na, le u di uŋaal mɔk u ki bui ke, “Chuu uja ngbaan man.” Libuul ngbaan ni le ubɔr aaŋaal ngbaan faan, le waa ki ŋmaa giin mu.

⁵ Uwumbɔr aabɔnabr ngbaan aah nan di Uwumbɔr aayimbil len pu na, libuul ngbaan ni le libimbiln ngbaan wur lir kitiŋ, le nfatan ngbaan yaa.

⁶ Ubɔr Jeroboam nan bui Uwumbɔr aabɔnabr ngbaan ke, “Ŋaanii ki mee Aadindaan Uwumbɔr tii mi, aan u cha ŋŋaal ki pɔɔk.” Uwumbɔr aabɔnabr ngbaan nan mee Uwumbɔr, le ubɔr aaŋaal pɔɔk.

⁷ Le ubɔr ngbaan nan bui Uwumbɔr aabɔnabr ngbaan ke, “Dii mi buen linampal ki ti kan nibaa ji. M ga ŋa si tiŋann saah tun pu na pu.”

⁸ Uwumbɔr aabɔnabr ngbaan nan gar u ke, “Hali aa yaa di saawangol ligeln libaa le ŋa mi tiŋann kan, maan dii si, kaan ji, kaan nyu nibaa aaŋaal ni.

⁹ Uwumbɔr bui mi ke m taa ji, ki taa nyu nibaa, ki taa gir dii nsanbaan mu m ba dii ni na.”

¹⁰ Kina pu na, waa nan gir dii nsanbaan mu u nan dii dan na, u nan dii nsayayan le ki kun.

Uwumbɔr aabɔnabkpok u nan bi Betel aatiŋ ni na aabɔr

¹¹ N‑yaayoonn ngbaan na, Uwumbɔr aabɔnabkpok ubaa nan koo Betel aatiŋ ni. Ujapɔtiib le nan dan nan tuk u Uwumbɔr aabɔnabr u nyan ni Juda aatiŋ ni na aah ŋa tiwan ni Betel ni liyaadaal ngbaan na, ni waah tuk Ubɔr Jeroboam pu na.

¹² Le u baa bi ke, “Waah siir na, u dii mulasan?” Bi nan mɔk u nsan ngbaan,

¹³ le u bui bi ke bi buu waabon tii u. Le bi nan ŋa kina, le u diŋ ki siir cha,

¹⁴ le ki nan paan Uwumbɔr aabɔnabr u nyan ni Juda aatiŋ ni na pu ki ti kan u, u ka likpaln aasub bubaa taab. Le u baa u ke, “Si le ye Uwumbɔr aabɔnabr u nyan ni Juda na aa?” Le uja ngbaan kii ke, “Min ye.”

¹⁵ Le u bui u ke, “Dii mi buen linampal ki ti kan nibaa ki ji.”

¹⁶ Le Uwumbɔr aabɔnabr u nyan ni Juda aatiŋ ni na gar u ke, “Maan ŋmaa dii si buen linampal, kaan ŋmaa gaa saachann mu, kaan ŋmaa ji ki nyu nibaa aa chee do,

¹⁷ ba pu? Uwumbɔr bui mi ke m taa ji, ki taa nyu nibaa, ki taa gir dii nsanbaan mu m ba dii ni na ki kun.”

¹⁸ Le Uwumbɔr aabɔnabkpok u nyan Betel ni na nan bui u ke, “Min mbaa mu ye Uwumbɔr aabɔnabr ke sin na la; le Uwumbɔr aatuun bui mi ke m nan di si buen linampal ki ti ŋa si tichann.” Tɔ, Uwumbɔr aabɔnabkpok ngbaan nan bi geei la.

¹⁹ Kina pu le Uwumbɔr aabɔnabr u nan nyan ni Juda aatiŋ ni na dii ubɔnabkpok na buen linampal, le u ni u ti jin tijikaar.

²⁰ Baah ka ji tijikaar na, le Uwumbɔr aabɔr fuu ni ubɔnabkpok na chee,

²¹ le u teen tuk Uwumbɔr aabɔnabr u nyan ni Juda aatiŋ ni na ke, “Uwumbɔr bui ke aa yii waamɔb kaa ŋa waah tuk si pu na.

²² Aa tee fenn le ki gir nan jin tijikaar nin chee u bui si ke aa taa ji na. Nimina pu na, aa ga kpo, le baan sub si saadichal aacheek ni.”

²³ Baah jin tijikaar doo na, le Uwumbɔr aabɔnabkpok ngbaan buu ubon tii Uwumbɔr aabɔnabr u nyan ni Juda aatiŋ ni na,

²⁴ le u siir cha. Nsan ni le uchinn keln u ki ku u. U nan kpo dɔ nsan ni, le ubon na, ni uchinn si gbɔk u.

²⁵ Bijab bibaa nan jer le ki kan u nsan ni, le uchinn ngbaan si gbɔk u. Bi nan buen Betel le ki ti len baah kan pu na.

²⁶ Uwumbɔr aabɔnabkpok ngbaan aah ŋun ti na, le u bui ke, “Uwumbɔr aabɔnabr u yii Uwumbɔr aamɔb na le na. Le Uwumbɔr cha uchinn ngbaan nan tak u ki ku u, ke waah len ke u ga ŋa pu na,”

²⁷ le ki bui ujapɔtiib ke, “Buu ubon tii mi man.” Bi nan ŋa kina,

²⁸ le u siir buen ki ti kan ubɔnabr ngbaan kpo dɔ nsan ni, le ubon ni uchinn ngbaan beenin si gbɔk u. Uchinn ngbaan aa ŋman u ki mu aa ŋa ubon na nibaa.

²⁹ Ubɔnabkpok ngbaan nan yoor u ki di paan ubon na pu, le ki di gir buen Betel u ti wii waakpuul ki sub u.

³⁰ U nan di u sub ubaa aadichal aacheek ni la, le u ni ujapɔtiib wii likpuul, ki wii ke, “Nna aabo, nna aabo.”

³¹ Baah sub u doo na, le ubɔnabkpok ngbaan bui ujapɔtiib ke, “M yaa nan kpo kan, ni di mi sub likaakubaan limina ponn ni, ki di mi bil tam u.

³² Waah nan di Uwumbɔr aamɔbon len bii kitork aabimbiln li bi Betel ni na, ni tiwaadir timɔk bi Samaria aatim ni na ga sil gbiin kina.”

Jeroboam aatunwanbir ti ti nyaŋ sakpen na aabɔr

³³ Israel yaab aabɔr Jeroboam aa nan di cha waatunwanbir aatuln, le ki tee beenin nyani bitotoorb imaal i kaa ye bitotoorb aamaal na ponn ni, ke bi li tun ŋitun waah maa ŋibimbin ŋi na pu. Unii umɔk nan len ke u ban u ŋa utotoor na kan, u nan kaani udaan la.

³⁴ Titunwanbir timina le nan joo ni libiil, ni kookoo aakuln, waanaan aadichal pu.