1 Bibɔrb 12 - Uwumbɔr aagbaŋ

Ŋŋangan wɔb aanibol aah yii Rehoboam pu na

¹ Rehoboam nan buen Sekem, nin chee Israel aanib bi mɔmɔk bi ŋŋangan wɔb na nan kuun ke bi kaan u nnaan na.

² Nebat aajapɔɔn Jeroboam, u nan san buen Ijipt aatiŋ ni Ubɔr Solomonn pu na, aah nan ŋun tibɔr ngbaan na, le u nyan ni Ijipt aatiŋ ni, ki gir kun ni.

³ Ŋŋangan wɔb aanibol ngbaan aanib nan tun yin ni u, le bi mɔmɔk dii buen Rehoboam chee ki ti bui u ke,

⁴ “Aate Solomonn nan muk timi sakpen a, ki tii timi ŋitun ŋi nyaŋ timi na. Aa yaa ga bar aate aamuk ngbaan pu aan mbimbin taa ki li pɔɔ tii timi kan, ti ga li ye saatutumbamɔm.”

⁵ Le u gar bi ke, “Gir ni man iwiin itaa aapuwɔb aan m nan tii nimi ngarm.” Le bi siir.

⁶ Ubɔr Rehoboam nan ti ŋoon bininkpiib bi nan ye ute Solomonn aasusurb na pu. U nan baa bi ke, “M ga gar binib ngbaan kinye?”

⁷ Le bi bui u ke, “Aa yaa kpa binib bee pu tiŋann ki tii bi ngarm mu ga piir bisui na kan, bi ga li dii si mbamɔm.”

⁸ Tɔ, u nan yii bininkpiib ngbaan aasurm le ki labr buen u ni binachipɔm bi nan kpaan tinachipɔnn na chee. Bima le u nan di ŋa waasusurb.

⁹ U nan baa bi ke, “Ni ga sur mi kinye? M ga bui binib bi mee mi ke m bar baamuk pu tii bi na kinye?”

¹⁰ Le bi gar u ke, “Saah ga bui bi pu na sɔ: ‘Maaŋanbiseeŋ filk jer nte aachaŋ.’

¹¹ Bui bi ke, ‘Nte nan di ŋitun ŋi nyuun na le tun nimi; le m ma ga tun nimi ŋi nyuun jer kina na. U nan joo ibanbaan le gbaa nimi; le m ma ga loe nimi ŋinaalab.’”

¹² Iwiin itaa aapuwɔb, le Jeroboam ni binib ngbaan mɔmɔk nan gir buen Ubɔr Rehoboam chee, waah nan bui bi pu na.

¹³ Ubɔr ngbaan nan yii bininkpiib na aasurm le ki len binib ngbaan chee gala gala,

¹⁴ binachipɔm na aah nan sur u ke u len pu na. U nan len ke, “Nte nan di ŋitun ŋi nyuun na le tun nimi; le m ma ga moo tun nimi ŋi nyuun jer kina na. U nan joo ibanbaan le gbaa nimi; le m ma ga loe nimi ŋinaalab.”

¹⁵ Ni nan ye Uwumbɔr aageehn le ke waah nan cha waabɔnabr u nyan ni Silo aatiŋ ni aan bi yin u ke Ahija na tuk Nebat aajapɔɔn Jeroboam ke tiwan nee ga ŋa. Nima pu le ubɔr nan yii, kaa pel binib ngbaan aah nan len pu na.

¹⁶ Binib ngbaan aah ti bee ke ubɔr aan ŋun tii bi na, le bi teen mpɔɔn pu ke, “David mu ni waadichal. Bi kee ŋa ba tii timi? Israel yaab, cha ti kun man. Cha Rehoboam joo ubaa aadichal man.” Kina le Israel aanib nan yakr

¹⁷ ki cha Rehoboam gur ye Juda aapepel aanib baanja aabɔr.

¹⁸ Le Ubɔr Rehoboam tun Adoniram, u nan ye binaagbiib aaninkpel na, ke u buen Israel yaab chee, le bi ti yur u ŋitakpal u ti kpo. Nimina pu, le Rehoboam ŋa mala ki koo waataan aatɔroku ni ki san buen Jerusalem aatiŋ ni.

¹⁹ Ki nyan liyaadaal ngbaan, Israel aanibol ŋi bi ŋŋangan wɔb na aanaan, ni ubɔr David aadichal aanaan aa nan ki ŋmaa kpaan.

²⁰ Israel aanib aah ŋun ke Jeroboam nyan ni Ijipt aatiŋ ni ki gir ni na, le bi yin u buen nkuun ni, ki di u kaan Israel yaab aabɔr. Juda aanibol baanja le nan beenin si David aayaabitiib aachaŋ ni mbamɔm.

Semaya aah nan nabr Uwumbɔr aabɔr ti na

²¹ Ubɔr Rehoboam aah ti fuu Jerusalem ni na, le u kuun Juda ni Benjaminn aanibol aatɔb aajab bi nyi butɔb aabɔr mbamɔm na ŋichur nkub ni imonko inaa. Waalandak le nan ye ke u di bi buen ti faa Israel aanibol ŋi bi ŋŋangan wɔb na butɔb, ki ki gaa nima chee ŋa uŋaal ni.

²² Le Uwumbɔr nan bui waabɔnabr Semaya,

²³ ke u ti di inaŋ imina tii Rehoboam ni Juda ni Benjaminn aanibol ngbaan ke:

²⁴ “Taa tak nido yaab Israel yaab biken man. Ni mɔmɔk li chaa kun man. Maageehn pu le tiwan ni ŋa na ŋa.” Bi mɔmɔk nan kii Uwumbɔr aah len pu na, le ki gir kun.

Jeroboam aah nyan Uwumbɔr aapuwɔb pu na

²⁵ Israel yaab aabɔr Jeroboam nan maa ŋigon kiir Sekem aatiŋ ki bi Efraim aagongon aatiŋ pu na, ki koo nima ni yunn siib, le ki nyan nima ki buen ti maa ŋigon gob Penuel aatiŋ.

^26-27 U nan bui ubaa ke, “Naah bi pu dandana na, maanib yaa ki buen Jerusalem ni, bi ti toor kitork tii Uwumbɔr, Uwumbɔr Aadichal ni kan, bi ga fenn buen Juda yaab aabɔr Rehoboam chee le ki ga ku mi.”

²⁸ Waah moo dakl ti lik na, le u di salmaa ŋa inaajabi ilee, le ki bui waanib ke, “Naah chaa Jerusalem pu ti dooni Uwumbɔr na, ni taa ki buen. Israel aanib, nimi aawaa ŋi nyan ni nimi Ijipt aatiŋ ni na sɔ.”

²⁹ U nan di unaajabo naankee ubaa siin Betel aatiŋ ni, le ki di uken na mu siin Dann aatiŋ ni.

³⁰ Le binib ngbaan nan tun titunwanbir, ki chaa Betel ni Dann aatim ni ti dooni ŋiwaa ngbaan.

³¹ Jeroboam nan ki maa tiwaadir ŋigongon paab, le ki nyan bitotoorb, imaal i kaa nan ye Liifai aamaal na ni.

Uwumbɔr aah bii Betel aatiŋ ni aawaa aadoon pu na

³² Jeroboam nan ki siin ŋiwaa aajim mubaa ŋmaniin aawiin kipiik ni iŋmu daal, ke baah ŋani Uwumbɔr aajim Juda aapepel ni pu na. Betel aatiŋ ngbaan aatork aabimbiln pu, le u nan toor kitork tii waah di salmaa naan inaajabi i na, le ki ban bitotoorb bi tun waah maa tiwaadir ti na ponn ni lituln nan kaan Betel ni, nima.

³³ Ŋmaniin aawiin kipiik ni iŋmu daal, nwiin mu u siin ubaa pu na, le u buen Betel ki ti toor kitork, kitork aabimbiln pu, ki ji njim mu u ban tii Israel aanib na.