1 Bibɔrb 11 - Uwumbɔr aagbaŋ

Solomonn aah nyan Uwumbɔr aapuwɔb pu na

¹ Solomonn nan gee biwɔwɔmpiib pam. U nan yoor Hef yaab aapiib, ni Moab, ni Amonn, ni Edom, ni Saidonn aapiib ki kpee Ijipt aabɔr aabisal na pu.

² Uwumbɔr nan bui Israel yaab ke bi taa yoor binib ngbaan aapiib, le u yii ki yoor. Budabu pu Uwumbɔr aa nan gee bi ni binib ngbaan li joo tɔb aabim na le ye ke bi cha Israel yaab fenn diir baawaa la.

³ Solomonn nan yoor bibɔrb aabisatiib ikui ilole la, le ki kpa puutiib waatiir mu ikui itaa. Bi nan cha u fenn upuwɔb tii Uwumbɔr,

⁴ le u ni u ti por na, bi cha u gur dooni ŋiwaa. Waa nan kii Udindaan Uwumbɔr aamɔb ke ute David aah nan kii pu na.

⁵ U nan dooni Saidonn aawaapii Astaate, ni Amonn yaab aawaal Molek li bir na.

⁶ U nan tun Uwumbɔr titunwanbir kaa nan tii u naadii ke ute David aah nan tii u naadii pu na.

⁷ U nan maa nin chee u ga li dooni Moab yaab aawaal Kemos li bir na, ni Amonn yaab aawaal Molek mu yaan, lijool li bi Jerusalem aawipuul wɔb na.

⁸ U nan ki maa maa nin chee upuutiib bi nan ye nwɔwɔmbim na ga li seer tulalee aayon ki toor kitork tii bido aawaa na.

^9-10 Hali Israel yaab Aadindaan Uwumbɔr aah di ubaa mɔk Solomonn nfum mulee mɔk ki bui u ke u li nyi ki taa li dooni ŋiwaa na, Solomonn aa nan kii Uwumbɔr aamɔb, le ki fenn upuwɔb tii u. Kina pu le Uwumbɔr aaŋuul nan fii Solomonn pu,

¹¹ le u bui u ke, “Saah bii tipuur ti bi m ni sin aakaasisik ni, ki yii maah tuk si pu na, m puu ke m ga gaa saanaan aa chee ki di tii saaninkpiib ponn ni ubaa.

¹² Tɔ, aate David pu na, maan ŋa kina saamɔfal yoonn, m tee ga ŋa kina aajapɔɔn aayoonn la.

¹³ Maan gaa u chee nnaan ngbaan mɔmɔk, maatutunn David pu, ni Jerusalem, kitiŋ ki m lee, ke ki li ye mbaa aatiŋ na pu, m ga gur u linibol libaa.”

Solomonn aadim aabɔr

¹⁴ Kina pu le Uwumbɔr nan cha Hadad, u nyan ni Edom aabɔrchiln ni na nyan Solomonn aapuwɔb ki pa sil u pu.

^15-16 N‑yoonn mu aan David nan nyaŋ Edom aatiŋ na, waajab aaninkpel Joab nan buen nima u ti sub ŋinikpol. U ni waajab nan gaar Edom ni ki ti saa iŋmal iloob. N‑yoonn ngbaan, u ni waajab nan ku Edom aajab mɔmɔk

¹⁷ ki ti di cha Hadad ni ute aatutum bibaa baanja la. Bitutum ngbaan nan ye Edom aatiŋ aanib la, le bi ni Hadad nan san ŋmar ki ti koo Ijipt aatiŋ ni. N‑yoonn ngbaan Hadad nan laa ye ubo la.

¹⁸ Bi nan fii Midiann aatiŋ ni le ki di buen Parann aatiŋ ni, nima chee le bijab bibaa nan ti kpee bi pu. Le bi mɔmɔk chuun buen Ijipt aatiŋ ni, ki ti buen ubɔr chee, le ubɔr ngbaan tii Hadad kitiŋ ni lidichal, ki tii u tijikaar.

¹⁹ Hadad nan ti kpaln ubɔr ngbaan aajɔ la, le ubɔr ngbaan di uchiin, Ubɔrpii Tahenes aanaal tii u, u di ŋa upuu.

²⁰ U nan ma u ubijabo, le bi yin u ke Genubaf, le ubɔrpii nan kpiin ubo ngbaan libɔrdichal ni, le u nan bi nima chee ke ubɔr aabim na.

²¹ Tibɔr ngbaan aah nan ti pii Hadad, Ijipt aatiŋ ni, ke David ni waajab aaninkpel Joab mɔmɔk kpo na, le u bui ubɔr ngbaan ke, “Cha m gir kun ndo aatiŋ pu.”

²² Le ubɔr ngbaan baa u ke, “Ba ŋa? Maa ŋman ki tii si tiwan nibaa la aa? Nima pu le aa ban aa gir kun aa?” Hadad nan giin gar u ke, “Cha m ma kun,” le ki gir kun udo aatiŋ pu. Waah nan ti ye Edom aabɔr na, Hadad nan ye Israel yaab aadin u bir sakpen na la.

²³ Uwumbɔr nan ki cha Eliada aajapɔɔn Resonn mu fenn lir Solomonn pu. Resonn nan san waaninkpel, Soba aatiŋ aabɔr Hadadeser chee la,

²⁴ le ki kpaln bitimbiib bibaa aasaloln. David aah nan nyaŋ Hadadeser ki kuln umaantɔtiib Siria yaab na aapuwɔb le na. Resonn ni waajab nan buen ti koo Damaskus aatiŋ ni la, le waajab nan ŋa u nima chee Siria aatiŋ aabɔr.

²⁵ Solomonn aamɔfal mɔmɔk ni, Resonn nan ye Israel yaab aadin la.

Uwumbɔr aah puu tipuur ti tii Jeroboam na aabɔr

²⁶ Unii uken u nan ki fenn sil Ubɔr Solomonn pu na le nan ye waaninkpiib ponn ni ubaa. Uma le nan ye Nebat u nyan ni Sereda aatiŋ ki bi Efraim aapepel ni na aajapɔɔn Jeroboam. Una le nan ye ukpopii u bi nan yin u ke Serua na.

²⁷ Jeroboam aah nan nyan Solomonn aapuwɔb pu na aabɔr sɔ: Solomonn nan bi ŋeeb Jerusalem aawipuul wɔb aatiŋ, le ki toor kitiŋ ngbaan aagon.

²⁸ Jeroboam nan ye unachipɔɔn u kpa liyabr na la, le Solomonn aah kan u tun lituln sakpen pu na, le u di u ŋa binaagbiib bi bi Manase ni Efraim aanibol aapepel ni na aayidaan.

²⁹ Daalbaadaal, Jeroboam nan nyan Jerusalem le ki cha, le Uwumbɔr aabɔnabr Ahija u nyan ni Silo aatiŋ ni na kan u ubaa nsan ni, timoor ni.

³⁰ Ahija nan chuu peer waah nan pee libɔkupɔln li na, le ki kar kar li nfum kipiik ni mulee,

³¹ le ki bui Jeroboam ke, “Nyan ŋichek kipiik ki li joo, ba pu? Israel yaab Aadindaan Uwumbɔr bui si ke, ‘M ban m gaa nnaan Solomonn chee la, le ki ga di ŋinibol kipiik tii si.

³² Solomonn ga li joo linibol libaa; ba pu? u ye maatutunn David aabo. Jerusalem mu ye kitiŋ ki m lee ki, ke ki li ye mbaa aatiŋ, Israel aatim mɔmɔk ponn ni.

³³ Solomonn aa yii mi ki dooni ŋiwaa na pu le m ga ŋa kina. U dooni Saidonn yaab aawaapii Astaate; ni Moab yaab aawaal Kemos, ni Amonn yaab aawaal Molek. Solomonn yii maamɔb; u tun mi taani, kaa joo maakaal, ni maah bui u pu na, ke ute David aah nan joo pu na.

³⁴ M mu aan tee gaa nnaan ngbaan mɔmɔk Solomonn chee, m ga cha u li beenin bi mpɔɔn ni, buyoonn u laa bi limɔfal ni na. Maatutunn David, u m nan lee u aan u kii tii maakaal, ni maah tuk u pu na pu, le m ga ŋa kina.

³⁵ M ga nan gaa nnaan ngbaan Solomonn aajapɔɔn chee la, le ki ga di ŋinibol kipiik tii si,

³⁶ le ki ga tee cha Solomonn aajapɔɔn li joo linibol libaa, aan ki li kpa maatutunn David aayaabil ubaa n‑yoonn mɔmɔk u li joo Jerusalem aatiŋ, kitiŋ ki m lee ki ke bi li dooni mi nima chee na.

³⁷ Jeroboam, m ga ŋa si Israel yaab aabɔr, le aa ga li joo lipepel limɔk aa gee na.

³⁸ Aa yaa kii maamɔb ti doo, ki dii maakaal, ki ŋani maah siin pu na ke maatutunn David aah nan bi pu na, aan nlaasaab koo aa ni kan, m ga li bi aa chee n‑yoonn mɔmɔk. M ga ŋa si Israel yaab aabɔr, ki ga cha aayaabitiib li ji nnaan aapuwɔb, ke maah ŋa pu tii David na.

³⁹ Solomonn aatunwanbir pu, m ga daa David aayaabitiib aatafal, ni mu aan li cha dik dik.’”

⁴⁰ Kina pu le Solomonn nan pɔɔn ubaa ke u ku Jeroboam, le u nan tee san ŋmar ki buen Ijipt Aabɔr Sisak chee ki ti koo nima le Solomonn ti kpo.

Solomonn aakun aabɔr

⁴¹ Solomonn aah nan ki tun ŋitun ŋi na, waatuln aah nan ye pu na, ni waalan aabɔr mɔmɔk bi Solomonn Aatuln Aagbaŋ ni la.

⁴² Solomonn nan bi Jerusalem ni, ki joo Israel aatiŋ mɔmɔk ki ti saa ŋibin imonko ilee la.

⁴³ U nan kpo, le bi di u sub ute David aatiŋ ni, le ujapɔɔn Rehoboam kal waajal pu ki ye ubɔr.