1 Bibɔrb 10 - Uwumbɔr aagbaŋ

Seba Aapiibɔr aah nan mann Solomonn pu na

¹ Seba Aapiibɔr nan ŋun Solomonn aayimbil pu, le ki buen Jerusalem aatiŋ ni ke u ti di mbaan mu pɔɔ sakpen na tɔŋ u ki lik.

² Bitutum pam le nan dii u buen, ki kpee laakumii tiib bi tu tulalee aabɔŋ aabɔŋ, ni ŋitakpanyaan na, ni salmaa u wiir sakpen na. U ni Solomonn aah nan ti kal ke bi gbaa tibɔr na, u nan baa u mbaan pɔɔl mumɔk u nan joo uyil ni na.

³ Solomonn nan tii mbaan ngbaan mɔmɔk aagarm; nibaa aa nan pɔɔ waa ŋmaa tuk u naatataa.

⁴ Seba aapiibɔr ngbaan nan kan Solomonn aah kpa nlan sakpen pu na, ni waah nan maa libɔrdichal li na.

⁵ U nan kan tijikaar ti u ji na, ni waaninkpiib aakookoo yaan chee aah bi pu na, ni waatutum aah tun baatuln pu na, ni baawanpeenkaan ni bi peeni na, ni waatutum bi si gbɔk u njim aayoonn na, ni kitork aawan ni u joo chaa ti toor Uwumbɔr Aadichal ni na. Le ni ŋa u lijinjiir aan waa ti ki nyi waah bi nin chee na.

⁶ Le u bui Ubɔr Solomonn ke, “Maah ŋun saatun ni saalan mu pu maatiŋ ni na ye mbamɔn la.

⁷ Maa nan ŋa naadii tii baah len pu na, see maah dan aan nnimbil nan kan ni mɔmɔk pu na. Maah ŋun saalan, ni saawangol pu pu na aa fuu maah nan kan pu na aageln libaa. Saalan jer binib aah joo bimɔi len pu na.

⁸ Aapuutiib kpa liyinyaan. Le saatutum bi bi aa chee n‑yoonn mɔmɔk ki kpa nsan ke bi li ŋun saaninkpeliin na mu kpa liyinyaan.

⁹ Li pak Aadindaan Uwumbɔr. U mɔk si waah gee si sakpen pu na le ki di si ŋa Israel yaab aabɔr. Waah gee Israel yaab n‑yoonn mɔmɔk pu na, le u di si ŋa ubɔr ke aa cha waakaal ni ibamɔn li bi.”

¹⁰ U nan di waah joo ni ipiin i na tii Solomonn. U nan tii u salmaa u aanyunyuun ga jer njikaabim bɔtɔ tiib nkub na, ni tulalee ni ŋitakpanyaan ŋi wiir sakpen na. Waah nan tii u tulalee u na nan jer waah kani tulalee aapiin i binib chee na.

¹¹ Hiram aaŋɔi aajab bi nan joo salmaa nyan ni Ofir aatiŋ ni na, mu nan joo ni santina nyaan ubaa aadɔ ni ŋitakpanyaan pam.

¹² Solomonn nan di idɔ ngbaan di ŋa Uwumbɔr Aadichal, ni libɔrdichal aajaatɔlk tiib, ni tibar tii biwangbaab. Idɔ ngbaan aaboln aa nan kee dan Israel yaab aatiŋ ni; le yaaboln aa ki bi linimbil kan i.

¹³ Ubɔr Solomonn nan tii Seba aapiibɔr ngbaan tiwan nimɔk u nan ban na, ki kpee na, u nan ki tii u nkaal aah ye pu na aapiin kpee. Le upiibɔr ngbaan ni waatutum ki gir kun waatiŋ Seba ni.

Ubɔr Solomonn aawankpal aabɔr

¹⁴ Libiln mɔk ni kan, Ubɔr Solomonn nan kani salmaa u aanyunyuun ga pii njikaabim bɔtɔ tiib ikui iŋmu na,

¹⁵ le ki gaal lampoo u biwantiirb nyani baanyoor ponn ni pa na, ni ubaa aatiirk aanyoor, ni Arabia aabɔrb, ni Israel aapepel aayidam aah joo baapar ti nan tii u na.

¹⁶ Solomonn nan ŋa kijaak aapen ŋi pee na ikui ilee, le ki di salmaa u aanyunyuun ga pii ndibim kuruwaa bilole na boon libaabaa.

¹⁷ U nan ki ŋa ŋiwaatiir mu ikui itaa, ki di salmaa u aanyunyuun ga pii ndibim kuruwaa bilee na boon libaabaa. U nan di ŋipen ngbaan siin libɔrdichal aanaakook ki bi yin ki ke Lebanonn Aachook Aanaakook na ni la.

¹⁸ U nan ki cha bi ŋa libɔrjal sakpeln libaa mu. Bi nan di iluub aanyin aawar le nak li lipepel libaa, le ki di salmaa bamɔnn boon lipepel li gur na.

^19-20 Libɔrjal ngbaan nan paa, kina pu le bi nan maa ŋibimbin ŋiker ŋiloob pu ki joi chaa li chee, le ki naan ichinn toŋ libimbiln libaa mɔk aamɔgben ŋilee pu. Ichinnaankee ngbaan nan ti kpaan ichinn kipiik ni ilee la. Bi nan naan unaaja aayil siin libɔrjal ngbaan aapuwɔb, le uŋaal aah paani tiwan ni pu aan bi ŋa ni dab libɔrjal ngbaan na nan kpa uchinn ŋipepel ŋilee ngbaan pu. Kina aabɔrjal aaboln aa nan ki bi nnaan mubaa ni.

²¹ Ubɔr Solomonn aayikur mɔmɔk nan ye salmaa aayikur la, le ŋisambil ŋi mɔmɔk nan bi Lebanonn Aachook Aanaakook na ponn ni na nan ye salmaa bamɔnn aawan ŋmeen. Buyoonn Solomonn nan ye ubɔr na, baa nan yin tikunabr nibaa, kina pu na, baa nan di tikunabr ŋa nibaa.

²² U nan ŋa nnyusakpem aaŋɔi, le i ni Ubɔr Hiram aaŋɔi nan chuun. Libitatar mɔk ni kan, i nan joo ni u salmaa, ni tikunabr, ni iluub aanyin, ni ŋikpal, ni ilatan la.

²³ Ubɔr Solomonn nan kpa liwankpal ni nlan ki jer dulnyaa wee ni aabɔrb mɔmɔk pel pel,

²⁴ le dulnyaa aanib mɔmɔk nan ban ke bi li choo u chee ki nan pel nlan mu Uwumbɔr di tii u na aabɔr.

²⁵ Unii umɔk nan choo na nan joo ni Solomonn ipiin: tikunabr ni salmaa aawan, ni tiwanpeenkaan, ni tijawan, ni tulalee, ni itaan, ni tiwakor ti naahn itaan ki bi ke ibon na. Libiln mɔk kan, bi nan joo ni kina le nan tii u.

²⁶ Solomonn nan ki kpa itaan aatɔroku tiib lichur ni ikui inaa, ni butɔb aataan mu ŋichur kipiik ni ŋilee. Ibaa nan bi Jerusalem ponn ni, le iken mu bi bi ntim muken na ni.

²⁷ Waayoonn, tikunabr nan wiir Jerusalem aatiŋ ni ke ŋitakpal na la, le santina mu aadɔ wiir ke sufam bu si Juda aataataab aagongon ni na.

²⁸ Waaninkpiib le nan lik itaan i nyan ni Musri, ni Silisia aatim ni na,

²⁹ ni itaan aatɔroku tiib bi nyan ni Ijipt aatiŋ ni na aatuln. Bima le nan kooh itaan ni itaan aatɔroku tiib tii Hef yaab ni Siria yaab aabɔrb. Bi nan kooh itaan aatɔroku ubaa tikunabr aamombil ikui iloob la, le ki kooh utaan ubaa mɔk tikunabr aamombil nkub ni piiŋmu.