1 Bibɔrb 1 - Uwumbɔr aagbaŋ

Ubɔr David aaninkpir ni

¹ Ubɔr David nan por sakpen, le waatutum nan joo ŋikeken ŋi nyuun na biini u pu, ŋi mu aa nan ŋmaa lee u tiwoor.

² Kina pu le waaninkpiib nan bui u ke, “Mpɔɔndaan, cha ti ban kan upiisapɔɔn, aan u li bi aa chee ki lik si. U ga li doo dei si, aan aawon li ton.”

³ Bi nan chuun Israel aatiŋ mɔmɔk pu, ki ban usapɔɔn u ŋan na, le ki ti kan kina aasapɔɔn Sunem aatiŋ ni. Bi nan yin u ke Abisag, le bi joo ni u nan tii ubɔr.

⁴ U nan ŋan sakpen a, le ki bi ubɔr chee ki lik u; ubɔr mu aa nan tee joo u upii.

Adonija aah gaa nnaan pu na

^5-6 Tɔ, Absalom aah kpo na, David ni upuu Hagif aajapɔɔn Adonija le nan gur ye ujapɔpol ki fu. U nan ye uja u ŋan sakpen na la. David aa nan kee daa utafal tibɔr tibaa pu, le unimbil nan man ke uma le ga li ye ubɔr. U nan ban ubaa aataan aatɔroku tiib, ni itaan, ni bijab bi ga kiir u na piiŋmu.

⁷ U nan len Joab, u aana nan ye Seruya na, ni utotoor Abiatar chee, le bi kii ke bi ga sil uchaŋ ni, tibɔr ngbaan ni.

⁸ Tɔ, utotoor Sadok, ni Jehoyada aajapɔɔn Benaya, ni Uwumbɔr aabɔnabr Natann, ni Simei, ni Rei, ni bijab bi kii David na aa nan sil Adonija aachaŋ ni.

⁹ Daalbaadaal le Adonija nan di ipiih, ni inaaja, ni inaabi i bi kpiin i, aan i filk sakpen na toor kitork, “Uwaa Aatakpal” li bi Enn Rogel aayayak aanyunbun chee na. U nan chɔi Ubɔr David aajapɔtiib biken, ni ubɔr aaninkpiib bi nyan ni Juda aatiŋ ni na, ke bi dan kitork aajim ngbaan ni.

¹⁰ Waa nan chɔi ute aabo Solomonn, ni Uwumbɔr aabɔnabr Natann, ni Benaya, kaa chɔi bijab bi kii ubɔr na mu.

Baah di Solomonn kaan nnaan pu na

¹¹ Le Natann buen Solomonn aana Batseba chee, le ki ti baa u ke, “Saa ŋun ke Hagif aajapɔɔn Adonija kaan ubaa tibɔr aa? Le Ubɔr David aa nyi ti ponn ni.

¹² M ga sur si ke aa yaa ban aa ni aajapɔɔn Solomonn aamɔfal kan,

¹³ li cha libuul lee ni Ubɔr David chee, ki ti baa u ke, ‘Mpɔɔndaan, saa nan puu tipuur kpaan tii mi, ke njapɔɔn Solomonn le ga nan nab saanaan pu uu? Ni ki ŋa kinye aan Adonija gur ye ubɔr?’”

¹⁴ Le Natann ki len ke, “Le saah beenin bi len Ubɔr David chee na, m ga koo ni, ki nan bui ke saabɔr ngbaan gbii.”

¹⁵ Kina pu le Batseba nan buen ubɔr chee waadidookaan ni. Ubɔr nan por sakpen, le Sunem aatiŋ ni aasapɔɔn Abisag nan bi u chee, ki lik u.

¹⁶ Batseba nan gbaan ubɔr aanimbiin ni, le u baa u ke, “Aa ban ba?”

¹⁷ Le u gar u ke, “Mpɔɔndaan, aa nan puu tipuur kpaan tii mi, Aadindaan Uwumbɔr aayimbil pu, ke njapɔɔn Solomonn le ga nan nab saanaan pu.

¹⁸ Tɔ, Adonija kpaan kpaln ubɔr, le saa nyi ti ponn ni.

¹⁹ U di inaaja, ni ipiih, ni inaabi i bi kpiin i aan i filk sakpen na pam toor kitork, ki chɔi aajapɔtiib, ni utotoor Abiatar, ni saajab aaninkpel Joab, ke bi dan njim ngbaan ni, le kaa chɔi aajapɔɔn Solomonn ma.

²⁰ Mpɔɔndaan, Israel aanib mɔmɔk lik sin le pu, ke aa tuk bi unii u ga nab saanaan pu na.

²¹ Aa yaa kaa ŋa kina, ki yaa kpo kan, libuul ngbaan ni, le bi ga li gur ŋani m ni njapɔɔn Solomonn ke taah ye bitimbiib le na.”

²² U nan laa beenin bi len, le Natann fuu ni libɔrdichal ni.

²³ Le bi ti bui ubɔr ke Uwumbɔr aabɔnabr Natann fuu ni, le Natann koo ki ti gbaan ubɔr aanimbiin ni,

²⁴ le ki bui u ke, “Mpɔɔndaan, aa moon ke Adonija le ga nab saanaan pu uu?

²⁵ Din wee na, u buen ti di inaaja, ni ipiih, ni inaabi i bi kpiin i aan i filk sakpen na pam toor kitork. U chɔi aajapɔtiib, ni saajab aaninkpel Joab, ni utotoor Abiatar. Libuul lee ni, bi bi ji u chee njim ki tar ke, ‘Ubɔr Adonija li kpa limɔfafɔfɔŋ.’

²⁶ Uninkpel, waa chɔi m ma, kaa chɔi utotoor Sadok, kaa chɔi Benaya, ni Solomonn mu.

²⁷ Mpɔɔndaan, sin le siin nimina mɔmɔk, kaa kpaan tuk saaninkpiib unii u ga nab saanaan pu na aa?”

²⁸ Le Ubɔr David bui ke, “Bui Batseba ke u gir ni.” Le u gir ni ki nan sil unimbiin ni.

²⁹ Le u bui u ke, “M puu Uwumbɔr u bi kaa kpa ndoon ki nyan mi maabɔr mɔmɔk ni na,

³⁰ ke din wee na, m ga li joo tipuur ti m nan puu tii si, Israel yaab Aadindaan Uwumbɔr aayimbil pu, ke aajapɔɔn Solomonn le ga nab maanaan pu na.”

³¹ Le Batseba gaa timm le ki bui ke, “Cha ndindaan ubɔr li kpa limɔfal li kaa kpa ndoon na.”

³² Le Ubɔr David tun yin ni Sadok, ni Natann, ni Benaya. Baah koo ni na,

³³ le u bui bi ke, “Ni ni maaninkpiib li dii man, ki cha njapɔɔn Solomonn li dik mbaa aataan pu, ki di u buen Gihonn aayayak aanyunbun chee.

³⁴ Nima chee, Sadok, ni Natann di nkpan kpir uyil pu, ki kaan u Israel yaab aabɔr, le ki pii ukpiin ki teen mpɔɔn pu ke, ‘Ubɔr Solomonn li kpa limɔfafɔfɔŋ.’

³⁵ Gir dii ni u man, aan u nan kal maanaanjal pu. Uma le m lee ke u li ye Israel ni Juda aatim aajojoor, kina pu le u ga nab maanaan pu.”

³⁶ Le Benaya bui u ke, “Ni ga ŋa kina, aan Aadindaan Uwumbɔr cha ni gbiin kina.

³⁷ Uwumbɔr aah nan bi Mpɔɔndaan chee pu na, u li bi Solomonn mu chee kina, ki cha waanaan aayoonn li kpa nkam jer sin yoo.”

³⁸ Kina pu na, Sadok, ni Natann, ni Benaya, ni ubɔr aakikiib nan di Solomonn diŋ Ubɔr David aataan pu, le ki cheen u buen Gihonn aayayak aanyunbun chee.

³⁹ Le Sadok nan yoor olif aakpan aah bi tiwan ni ponn ni, aan u nan nyan ni Uwumbɔr aanimbiin ni, Waabool ni na, le ki di kpir Solomonn aayil pu. Bi nan pii ukpiin, le binib mɔmɔk teen mpɔɔn pu ke, “Ubɔr Solomonn li kpa limɔfafɔfɔŋ.”

⁴⁰ Le bi mɔmɔk dii ni u, ki gir ni, ki tar mpopiin pu, ki pii kulufeeŋ tiib, ki kpa kifuuk ki cha kitiŋ deŋni na.

⁴¹ Adonija ni waacham aah nan bi door baajim na, le bi ŋun kifuuk ngbaan pu. Le Joab aah ŋun ukpiin pu na, le u baa ke, “Ni ye ba aafuuk bi kitiŋ ponn ni?”

⁴² Waa kee len doo, le utotoor Abiatar aajapɔɔn Jonatann fuu ni. Le Adonija bui u ke, “Koo ni, aa ye uninyaan la, aa ga li joo ni tibɔnyaan la.”

⁴³ Le Jonatann gar u ke, “Naa ye kina. Mpɔɔndaan Ubɔr David di Solomonn kaan nnaan.

⁴⁴ U cha Sadok, ni Natann, ni Benaya, ni ubɔr aakikiib le dii u. Bi cha u diŋ ubɔr aataan pu,

⁴⁵ le Sadok ni Natann kaan u tibɔr, Gihonn aayayak aanyunbun chee. Le bi buen kitiŋ ni, ki tar mpopiin pu, le binib mɔmɔk kpa kifuuk sakpen. Naah laa ŋun kifuuk ki pu na le na.

⁴⁶ Solomonn le gur ye ubɔr.

⁴⁷ Ti ki kpee na le ye ke ubɔr aaninkpiib koo, ke bi ti di baapak tii Mpɔɔndaan Ubɔr David, le ki bui ke, ‘Saawumbɔr cha Solomonn li kpa liyimbil ki jer si, ki cha Solomonn aanaan yoonn li kpa nkam jer sin yoo.’ Le Ubɔr David timm uyil waawandookaan pu, ki doon Uwumbɔr,

⁴⁸ le ki mee limeel ke, ‘Cha ti pak Israel yaab Aadindaan Uwumbɔr, u cha maanib ponn ni ubaa gaa maanaan din wee, ki cha m bi ki nan kan kina na.’”

⁴⁹ Le ijawaan chuu Adonija aacham ngbaan, le bi mɔmɔk fii, ubaa mɔk cha waah gee nin chee na.

⁵⁰ Adonija aah san Solomonn ijawaan sakpen na, le u buen Uwumbɔr Aabool ni, ki ti bub joo kitork aabimbiln aamɔju.

⁵¹ Le bi nan tuk Ubɔr Solomonn ke Adonija san u ijawaan, ki ka bub joo kitork aabimbiln aamɔju ki len ke, “M ban Ubɔr Solomonn puen puu tii mi ke waan ku mi.”

⁵² Le Solomonn gar u ke, “U yaa si mpuwɔb mbamɔm kan, uyil pu aayikpirk kibaa aan gub; u yaa kaa si mpuwɔb kan, u ga kpo.”

⁵³ Le Ubɔr Solomonn nin tun ti yin ni Adonija, le ki cha bi nyan ni u kitork aabimbiln taab. Adonija nan buen ubɔr chee, le ki ti gbaan unimbiin ni, le ubɔr bui u ke, “Li chaa kun.”