1 Bibɔrb Aabɔr 9 - Uwumbɔr aagbaŋ

Binib bi nan nyan ni tinaagbiir ni ki gir ni na

¹ Bi nan ŋmee Israel yaab mɔmɔk aayimbil ki dii baadichal, Israel Aabɔrb Aagbaŋ ni la. Juda aanib aatunwanbir pu, le Uwumbɔr nan cha bi chur bi buen Babiloŋ aatiŋ ni, ke u di daa bitafal.

² Binib bi nan loln nsan ki gir ni baatiŋ pu bido bido na nan ye bitotoorb, ni Liifai yaab, ni Uwumbɔr Aadichal ni aatutum, ni Israel yaab biken.

³ Juda, ni Benjaminn, ni Efraim, ni Manase aanib nan ti koo Jerusalem ni la.

^4-6 Juda aanibol ni yaab bi nan ti koo Jerusalem ponn ni na nan ti kpaan binib ikui iloob ni imonko inaa ni kipiik la. Juda aajapɔɔn Peres aayaabitiib aasaloln le nan ye Amihud aajapɔɔn Utai. Uyaaja le nan ye Omri. Uyaajatiib biken le nan ye Imri ni Bani. Juda aajapɔɔn Sela aayaabitiib mu aasaloln le nan ye Asaya. Uma le nan ye waadichal aayidaan. Juda aajapɔɔn Sera aayaabitiib aasaloln le nan ye Jewel.

^7-8 Benjaminn aanibol ni yaab bi nan koo Jerusalem ponn ni na sɔ: Salu, u aate nan ye Mesulam na. Mesulam mu aate le nan ye Hodafia, le uyaaja ye Hasenua; ni Jeroham aajapɔɔn Ibneya; ni Ela, u aate nan ye Usi, aan uyaaja mu ye Mikri na; ni Sefatia aajapɔɔn Mesulam, u aayaaja nan ye Rewel na. Rewel aate le nan ye Ibnija.

⁹ Linibol limina aadichal ŋi nan koo Jerusalem ponn ni na nan kpaan binib ikui iwae ni piiŋmu, ni biloob la. Bijab ngbaan mɔmɔk nan ye bidichadam la.

Bitotoorb bi nan koo Jerusalem ponn ni na

^10-12 Bitotoorb bimina le nan koo Jerusalem ponn ni: Jedaya, ni Jehoyarib, ni Jakinn, ni Hilkia aajapɔɔn Asaria, uma le nan ye Uwumbɔr Aadichal ponn ni aaninkpiib aayidaan. Uyaajatiib le nan ye Mesulam, ni Sadok, ni Merayof, ni Ahitub; ni Jeroham aajapɔɔn Adaya, u aayaajatiib nan ye Pasur ni Malkija na; ni Adiel aajapɔɔn Maasai, u aayaajatiib nan ye Jasera, ni Mesulam, ni Mesilemif, ni Imer na.

¹³ Bitotoorb bi nan ye bidichadam na, nan ti kpaan bijab lichur ni ikui ilole ni imonko itaa la. Bi nan ye binib bi nyi Uwumbɔr Aadichal ni aatuln mɔmɔk aabɔr sakpen na la.

Liifai yaab bi nan koo Jerusalem ponn ni na

^14-16 Liifai yaab bimina le nan koo Jerusalem ponn ni: Hasub aajapɔɔn Semaya, u aayaajatiib nan ye Asrikam ni Hasabia, bi nan ye Merari aataŋaal pu yaab na, ni Bakbakar, ni Heres, ni Galal aataŋaal pu yaab; ni Maika aajapɔɔn Matania, u aayaajatiib nan ye Sikri, ni Asaf na; ni Semaya aajapɔɔn Obadia, u aayaajatiib nan ye Galal ni Jedutunn na; ni Asa aajapɔɔn Berekia, u aayaaja nan ye Elkana, u nan bi lipepel li ye Netofa aatiŋ aapepel ni na.

Uwumbɔr Aadichal ni aakikiib bi nan koo Jerusalem ponn ni na

¹⁷ Uwumbɔr Aadichal aakikiib bimina le nan koo Jerusalem ponn ni; Salum, ni Akub, ni Talmonn, ni Ahimann. Salum le nan ye baasaloln.

¹⁸ Ki nyan n‑yaayoonn na, ki ti saa n‑yoonn ngbaan na, baataŋaal ni aanib nan koo mbisamɔb mu bi yin mu ke Ubɔr Aabisamɔb na aawipuul wɔb la. N‑yaayoonn na bi nan si ki kii Liifai yaab aakookoo yaan aabisamɔi la.

¹⁹ Kore aajapɔɔn Salum, u aayaaja nan ye Ebiasaf na, ni Kora aataŋaal yaab biken aatuln le nan ye ke bi li si kii Uwumbɔr Aabool aabisamɔb, ke biyaajatiib aatuln aah nan ye ke bi li kii Uwumbɔr aakookoo yaan pu na.

²⁰ Eleasar aajapɔɔn Fineas nan lik baatuln pu n‑yoonn mbaa, le Uwumbɔr nan bi u chee.

²¹ Meselemia aajapɔɔn Sekaria mu nan ye Uwumbɔr Aabool aabisamɔb aakikiir ubaa la.

²² Bijab bi bi nan nyan aan bi kii ibisamɔi ngbaan na, nan ti kpaan bijab ikui ilee ni kipiik ni bilee la. Baah nan koo koo ntimbim mu ni na le bi ŋmee baayimbil kina. Ubɔr David ni Uwumbɔr aabɔnabr Samuel le nan di biyaajatiib tii litukpaan limina.

²³ Bi ni biyaajatiib le nan beenin kii Uwumbɔr Aadichal aabisamɔi.

²⁴ Mbisamɔb nan bi lipepel mɔmɔk la. Mbisamɔb nan bi ŋŋangan, ni ŋŋangii, ni liwipuul, ni liwilir wɔb. I mɔmɔk nan kpa bikikiib aayidaan la.

²⁵ Bikikiib bimina aado yaab bi koo ntimbim ni na le nan choo nan ter bi. Kitinbik kibaa ni aanib yaa nan dan kan, bi ga nan kiir ki ti saa iwiin ilole le ki nin gir kun, le kiken mu aanib dan.

²⁶ Bikikiib aayidam binaa na nan ye Liifai yaab la. Bima le nan len, le bi gur na keei. Bima le nan lik Uwumbɔr Aadichal ni aadir, ni tijikaar, ni tiwan ni mɔmɔk bi ti ponn ni na.

²⁷ Naah nan ye baatuln ke bi li kii Uwumbɔr Aadichal ki piir laabisamɔi kichakpiik mɔmɔk ni na, bi nan koo gbɔk li chee la.

Liifai yaab biken aatuln

²⁸ Liifai yaab biken na aatuln le nan ye ŋisambil ni tiwan ni bi joo tun lituln Uwumbɔr Aadichal ni na. Bima le nan nyan ni ni buyoonn bi ga di ni tun lituln na, le ki nan ki giin ni koon.

²⁹ Biken mu le nan lik chain aawan niken na, ni n‑yon, ni ŋisubil aadaan, ni olif aakpan, ni tulalee aayon, ni tiwan nimɔk nu mɔ na.

³⁰ Tɔ, bitotoorb le nan tee joo tiwan ni nu mɔ ngbaan na ŋmalni tɔb ni.

³¹ Salum aajapɔpol, u bi nan yin u ke Matitia, ki ye Kora aataŋaal pu aanii, ki ye Liifai yaab ni ubaa na, le nan ye unii u yeh kitork ki bi ken ki na aatuln.

³² Kohaf aataŋaal pu yaab le nan ye bi ŋani Uwumbɔr aaboroboro Likpaakool mɔk daal na.

³³ Liifai yaab aadichal ŋibaa mu le nan ye Uwumbɔr Aadichal ni aalahngaab ni biwangbaab. Ŋidichal ŋimina aadichadam nan koo Uwumbɔr Aadichal aadir tibaa ni, le kaa ki tun lituln libaa kpee, ba pu? nwiin pu ni kinyeek mɔk bi nan yin bi le bi ti tun baatuln.

³⁴ Bijab bi aayimbil ŋmee paacham na nan ye Liifai aanibol aadichadam la. Baayimbil dii yaaja yaaja la. Bima le nan ye bisalolm bi koo Jerusalem ponn ni na.

Ubɔr Sɔɔl aayaajatiib ni uyaabitiib

³⁵ Jeyel le nan naan Gibeonn aatiŋ le ki koo nima. Bi nan yin upuu ke Maaka la.

³⁶ Ujapɔpol le nan ye Abdonn. Ujapɔtiib biken aayimbil sɔ: Sur, ni Kis, ni Baal, ni Ner, ni Nadab,

³⁷ ni Gedor, ni Ahio, ni Sekaria, ni Miklof.

³⁸ Miklof aajapɔɔn le nan ye Simea. Biyaabitiib nan koo Jerusalem ni, baataŋaal pu yaab chee la.

³⁹ Ner aajapɔɔn le nan ye Kis, le Kis mu ma ubɔr Sɔɔl. Sɔɔl nan ma mbijabim munaa la. Baayimbil sɔ: Jonatann, ni Malkisua, ni Abinadab, ni Esbaal.

⁴⁰ Jonatann le nan ma Meribaal, le Meribaal mu ma Maika.

⁴¹ Maika nan ma mbijabim munaa la. Baayimbil sɔ: Pitonn, ni Melek, ni Tarea, ni Ahas.

⁴² Ahas aajapɔɔn le nan ye Jara, le u mu ma mbijabim mutaa. Baayimbil sɔ: Alemef, ni Asmafef, ni Simri. Le Simri nan ma Mosa.

⁴³ Mosa mu le nan ma Binea, le Binea mu ma Rafaya. Rafaya mu le nan ma Eleasa, le Eleasa mu ma Asel.

⁴⁴ Asel nan ma mbijabim muloob la. Baayimbil sɔ: Asrikam, ni Bokeru, ni Ismael, ni Searia, ni Obadia, ni Hanann.