1 Bibɔrb Aabɔr 7 - Uwumbɔr aagbaŋ

Isakar aayaabitiib aayimbil

¹ Isakar nan ma mbijabim munaa la. Baayimbil sɔ: Tola, ni Pua, ni Jasub, ni Simronn.

² Ujapɔɔn Tola nan ma mbijabim muloob la. Baayimbil sɔ: Usi, ni Refaya, ni Jeriel, ni Jamai, ni Ibsam, ni Semuel. Bima le nan ye Tola aataŋaal aadichadam, le ki nan ye butɔb aajakpaam. Ubɔr David aayoonn na, biyaabitiib nan ti saa binib ŋichur moninko ni ŋilee ni ikui iloob la.

³ Usi nan ma Israhia baanja la. Israhia nan ma mbijabim munaa la. Baayimbil sɔ: Maikel, ni Obadia, ni Joel, ni Isia. U ni bi mɔmɔk nan ye bidichadam la.

⁴ Bi nan kpa puutiib ni mbim sakpen. Biyaabitiib nan ŋmaa kan butɔb aajab ŋichur piitaa ni ŋiloob la.

⁵ Baah nan ŋmee Isakar aanibol aadichadam bi ga ŋmaa buen butɔb na, bi nan ti kpaan bijab ŋichur imonko inaa ni ŋilole la.

Benjaminn ni Dann aayaabitiib aayimbil

⁶ Benjaminn nan ma mbijabim bitaa la. Baayimbil sɔ: Bela, ni Beker, ni Jediael.

⁷ Bela nan ma mbijabim muŋmu la. Baayimbil sɔ: Esbonn, ni Usi, ni Usiel, ni Jerimof, ni Iri. Bi nan ye bidichadam le baataŋaal ni. Bi nan ki ye butɔb aajakpaam la. Biyaabitiib bi nan ye butɔb aajab na nan ye binib ŋichur moninko ni ŋilee ni bijab piitaa ni binaa la.

⁸ Beker nan ma mbijabim muwae la. Baayimbil sɔ: Semira, ni Joas, ni Elieser, ni Eliwenai, ni Omri, ni Jeremof, ni Abija, ni Anatof, ni Alemef.

⁹ Baah nan ŋmee baadichal aayimbil na, biyaabitiib nan ti saa ŋichur moninko ni ikui ilee la. Bi mɔmɔk nan ye bijab bi ŋeer butɔb na la.

¹⁰ Jediael nan ma Bilhann baanja la, le Bilhann ma nan ma mbijabim mulole. Baayimbil sɔ: Jeus, ni Benjaminn, ni Ehud, ni Kenaana, ni Setann, ni Tasis, ni Ahisahar.

¹¹ Bi mɔmɔk nan ye ntaŋaal ngbaan aadichadam, ni butɔb aajakpaam la. Biyaabitiib ŋichur kipiik ni ŋilole, ni ikui ilee le nan ye butɔb aajab.

¹² Supim ni Hupim mu nan ye linibol limina aanib la. Dann nan ma Husim baanja la, le u ye ubijabo.

Naftali aayaabitiib aayimbil

¹³ Naftali nan ma mbijabim munaa la. Baayimbil sɔ: Jasiel, ni Guni, ni Jeser, ni Salum. Bi nan ye Bilha aayaabitiib la.

Manase aayaabitiib aayimbil

¹⁴ Manase nan ma unaagbiipii u nyan ni Aram aatiŋ ni na chee mbijabim mulee la. Bima le nan ye Asriel ni Makir. Makir le nan ma Gilead.

¹⁵ Makir le nan chɔi bipiib tii Hupim ni Supim. Uninkpan aayimbil le nan ye Maaka. Makir aajapɔleler le nan ye Selofehad. Uma nan ma mpiibim ŋmeen la.

¹⁶ Makir aapuu Maaka nan ma mbijabim mulee la. Bi nan yin bi ke Peres ni Seres. Peres nan ma mbijabim mulee la. Bima le nan ye Ulam ni Rakem.

¹⁷ Ulam mu nan ma ubijabo le ki yin u ke Bedann. Manase aajapɔɔn Makir mu aajapɔɔn Gilead aayaabitiib le nan ye bi mɔmɔk.

¹⁸ Gilead aaninkpan Hamolekef nan ma mbijabim mutaa la. Baayimbil sɔ: Isod, ni Abieser, ni Mala.

¹⁹ Semida nan ma mbijabim munaa la. Baayimbil sɔ: Ahiann, ni Sekem, ni Liki, ni Aniam.

Efraim aayaabitiib aayimbil

²⁰ Efraim aayaabitiib ki ti saa uyaabisɔsɔk aayimbil sɔ: Sutela, ni Bered, ni Tahaf, ni Eleada, ni Tahaf,

²¹ ni Sabad, ni Sutela. Efraim nan ki kpa mbijabim mulee ki kpee Sutela pu. Bima le nan ye Eser ni Elead. Bi nan ban bi su Gaf yaab aawakor le bi ku bi.

²² Bite Efraim nan wii baakpuul ni ti yunn sakpen, le unaabitiib buen ti sɔŋ usui.

²³ Le u nan ki doon upuu chee, le u dek ki nan ma ubijabo. Bi nan yin u ke Beria la. Baadichal aah nan kan tibɔr ti na pu le bi nan yin u kina.

²⁴ Efraim nan ma upiibo ubaa, le ki yin u ke Seera. Uma le nan naan Bef Horonn Paacham ni Bef Horonn Taab, ni Usenn Seera aatim.

²⁵ Bi nan ki yin Efraim aajapɔɔn uken ke Refa. Refa aayaabitiib aayimbil sɔ: Resef, ni Tela, ni Tahann,

²⁶ ni Ladann, ni Amihud, ni Elisama,

²⁷ ni Nunn, ni Josua.

²⁸ Baah nan gaa lipepel li ki koo nima na le ye Betel, ni ntim mu bi maln goln ki na, ki di kina ti saa Naarann aatiŋ ki bi liwipuul wɔb na, ki nyan nima ki di toŋ liwilir wɔb, Geser, ni ntim mu maln goln ki na. Ntim mu nan ki kpee na le ye Sekem ni Aya aatim, ni ntim mu maln goln mu na.

²⁹ Manase aayaabitiib le nan yeh Bef Sann, ni Taanak, ni Megido, ni Dor aatikpaam, ni ntim mu maln goln mu na. Jakob aajapɔɔn Josef aayaabitiib aah nan koo nin chee na le bi na.

Aser aayaabitiib aayimbil

³⁰ Aser aayaabitiib sɔ: U nan ma mbijabim munaa la. Baayimbil sɔ: Imna, ni Isfa, ni Isfi, ni Beria. U nan ma upiibo ubaa mu, le ki yin u ke Sera.

³¹ Beria nan ma mbijabim mulee la. Bima le nan ye Heber, ni Malkiel. Malkiel le nan naan Birsaif aatiŋ.

³² Heber nan ma mbijabim mutaa la. Baayimbil sɔ: Jaflet, ni Somer, ni Hotam. U nan ma upiibo ubaa mu, le ki yin u ke Sua.

³³ Jaflet mu nan ma mbijabim mutaa la. Baayimbil sɔ: Pasak, ni Bimhal, ni Asfaf.

³⁴ Unaal Somer mu nan ma mbijabim mutaa la. Baayimbil sɔ: Roga, ni Jehuba, ni Aram.

³⁵ Unaal Hotam ma nan ma mbijabim munaa la. Baayimbil sɔ: Sofa, ni Imna, ni Seles, ni Amal.

³⁶ Sofa aayaabitiib aayimbil sɔ: Sua, ni Hanefer, ni Sual, ni Beri, ni Imra,

³⁷ ni Beser, ni Hod, ni Sama, ni Silsa, ni Itrann, ni Beera.

³⁸ Jeter aayaabitiib le nan ye Jefune, ni Pispa, ni Ara;

³⁹ le Ula mu aayaabitiib nan ye Ara, ni Haniel, ni Risia.

⁴⁰ Bi mɔmɔk nan ye Aser aayaabitiib la. Bi nan ye bidichadam la, le ki nyi butɔb aabɔr sakpen, le ki ye bisalolmbamɔm. Aser aayaabitiib bi nan ye butɔb aajab na, nan ti saa ŋichur moninko ni ŋiloob la.