1 Bibɔrb Aabɔr 5 - Uwumbɔr aagbaŋ

Rubenn aayaabitiib aayimbil

¹ Jakob aajapɔpol Rubenn aayaabitiib aayimbil sɔ: Rubenn aah nan gaa ute aapuu waatiir ubaa na, waa nan ki kpa nsan u ji tininkpir aafaal ute chee. Unaal Josef le nan gaa kina aasan.

² Ni mu nan tee ye Juda aanibol le nan ŋa bipɔɔndam le ki nyan bijojoob tii ŋinibol ŋiken na mɔmɔk.

³ Jakob aajapɔpol Rubenn nan ma mbijabim binaa la. Baayimbil sɔ: Hanok, ni Palu, ni Hesronn, ni Kami.

^4-6 Joel aayaabitiib ni uyaabisɔsɔk aayimbil sɔ: Semaya, ni Gog, ni Simei, ni Maika, ni Reaya, ni Baal, ni Beera. Asiria aabɔrkpaan, u bi nan yin u ke Tiglaf Pileser na, nan chuu Beera, u nan ye binib ngbaan aasaloln na, ki nyan u baatiŋ ni.

⁷ Baah nan ŋmee Rubenn aanibol ngbaan aamaal aadichadam bi aayimbil bil na sɔ: Jeyel, ni Sekaria,

⁸ ni Bela u aate nan ye Asas na. Uyaaja le nan ye Sema, u ye Joel aataŋaal ni aanii na. Ntaŋaal mue nan koo Aroer aatiŋ, ni lipepel li bi ŋŋangan wɔb ki ti saa Nebo ni Baal Meonn aatim ni na la.

⁹ Bi nan kpa tiwakor sakpen Gilead aatiŋ ni, le ki gaa kitiŋ ngbaan ki nyan nteersakpiin mu bi liwipuul wɔb ki ti saa Yufrates Aamɔɔl chee na.

¹⁰ Ubɔr Sɔɔl aayoonn na, Rubenn aanibol nan tak Hagar yaab, ki ku bi butɔb ni, le ki gaa baatiŋ ki bi Gilead aawipuul wɔb na.

Gad aayaabitiib aayimbil

¹¹ Gad aanibol nan bi Rubenn aanibol aaŋangan wɔb, Basann aatiŋ pu, le ki yoor kina ti saa liwipuul wɔb Saleka aatiŋ ni.

¹² Joel le nan naan ntaŋaal mu loln nsan na, le Safam aataŋaal paa. Janai ni Safat le nan naan itaŋaal iken Basann aatiŋ pu.

¹³ Linibol ngbaan aataŋaal ilole imina aanib sɔ: Mikael, ni Mesulam, ni Seba, ni Jorai, ni Jakann, ni Sia, ni Eber.

¹⁴ Bi nan ye Abihail, u aate ye Huri na aayaabitiib la. Biyaajatiib le nan ye Abihail, ni Huri, ni Jaroa, ni Gilead, ni Mikael, ni Jesisai, ni Jado, ni Bus.

¹⁵ Abdiel aajapɔɔn Ahi, u aayaaja nan ye Guni na, le nan ye itaŋaal imina aasaloln.

¹⁶ Bi nan koo Basann, ni Gilead aapepel ni, ni ntim mu bi nima chee na ni, ni mmoŋmɔpaan aatiŋ ki bi Saronn aafataŋ ni na la.

¹⁷ Juda Aabɔr Jotam, ni Israel Aabɔr Jeroboam uken aayoonn, le bi nan ŋmee nimina mɔmɔk bil.

Liwipuul wɔb aanibol aajab

¹⁸ Butɔb aajab ŋichur imonko ilee ni ŋinaa, ni ikui ilole ni imonko itaa le nan bi Rubenn, ni Gad aanibol, ni Manase aanibol ligeln li bi liwipuul wɔb na ni. Bijab ngbaan nan nyi kijaak aapen, ni kijaak aajum, ni itɔi aabɔr pam.

¹⁹ Bi ni Hagar aanibol ŋimina, Jetur, ni Nafis, ni Nodab yaab nan too tɔb butɔb.

²⁰ Bi nan di baanaadii tii Uwumbɔr la, le ki mee u ki ban nterm. Le Uwumbɔr nan kii baameel ki cha bi nyaŋ Hagar yaab ni bimaantɔtiib.

²¹ Bi nan gaa laakumii tiib ŋichur piiŋmu, ni ipiih ŋichur ikui ilee ni piiŋmu, ki kpee ibon ŋichur ŋilee, le ki chur butɔb aanaagbiib mu ŋichur nkub.

²² Butɔb ngbaan aah nan ye Uwumbɔr aageehn na, bi nan ku baadim pam. Bi nan gur koo lipepel ngbaan ni le ki ti saa buyoonn baadim nan nyaŋ bi, ki di bi buen kitiyayan ni.

Manase yaab bi bi liwipuul wɔb na aabɔr

²³ Manase yaab bi nan bi liwipuul wɔb na nan koo Basann aapepel ni, ki di ti saa ŋŋangan wɔb Baal Hemonn, ni Senir, ni Hemonn Aajool mɔk. Bi nan pɔr sakpen.

²⁴ Baataŋaal aasalolm sɔ: Efer, ni Isi, ni Eliel, ni Asriel, ni Jeremia, ni Hodafia, ni Jadiel. Bi mɔmɔk nan ye butɔb aajakpaam la, le ki ye baataŋaal aanikpaam.

Uwumbɔr aah nan daa liwipuul wɔb aanibol aatafal pu na

²⁵ Tɔ, binib ngbaan nan yii Uwumbɔr u biyaajatiib nan dii na, le ki dii ŋitimbol ŋi aanib Uwumbɔr jenn nyan bi baatiŋ pu na aawaa.

²⁶ Kina pu le Uwumbɔr nan cha Asiria yaab aabɔrkpaan Pul (u bi nan ki yin u ke Tiglaf Pileser na) bɔ baatingbaln ni. U nan chur Rubenn, ni Gad, ni Manase yaab bi bi liwipuul wɔb na tinaagbiir ki di bi ti kaan Hala, ni Habor, ni Hara aatim ni, ni Gosann Aamɔɔl chee.