1 Bibɔrb Aabɔr 4 - Uwumbɔr aagbaŋ

Juda aayaabitiib aayimbil

¹ Juda aayaabitiib ngem aayimbil sɔ: Peres, ni Hesronn, ni Kami, ni Hur, ni Sobal.

² Sobal le nan ma Reaya, le Reaya mu ma Jahaf. Jahaf le nan ma Ahumai ni Lahad, biyaabitiib le ye binib bi koo Sora aatiŋ ni na.

^3-4 Hur le nan ye ute Kaleb ni upuu Efraf aajapɔpol, le uyaabitiib naan Betlehem aatiŋ. Hur nan ma mbijabim mutaa la. Bima le nan ye Etam, ni Penuel, ni Eser. Etam mu nan ma mbijabim bitaa la. Baayimbil le nan ye Jesreel, ni Isma, ni Idbas. U nan kpa bisal ubaa, le bi yin u ke Haselelponi. Penuel le nan naan Gedor aatiŋ, le Eser mu naan Husa aatiŋ.

⁵ Asur u nan naan Tekoa aatiŋ na, nan joo bipiib bilee la. Bi nan yin ubaa ke Hela, le ki yin uken na ke Naara.

⁶ U ni Naara nan ma mbijabim binaa la. Baayimbil sɔ: Ahusam, ni Hefer, ni Temeni, ni Haahastari.

⁷ Asur ni Hela nan ma mbijabim bitaa la. Baayimbil sɔ: Seref, ni Isar, ni Etnann.

⁸ Kos le nan ma Anub ni Sobeba, ni itaŋaal i ye Harum aajapɔɔn Ahahel aayaabitiib na aayaaja.

⁹ Uja ubaa nan bi, bi nan yin u ke Jabes. Waamaal ni aanib mɔmɔk nan lik pak uma baanja la. Waamar nan wu sakpen, nima le una nan yin u ke Jabes.

¹⁰ Tɔ, Jabes nan mee Israel yaab Aawumbɔr ke, “Uwumbɔr, ŋa saanyoor ŋa m pu, ki tii mi kitiŋ ki wiir na. Li bi m chee, ki nyan mi kinimbɔŋ aawan nimɔk ga ŋmaa tii mi iween na ni.” Le Uwumbɔr nan tii u waah mee ki ban tiwan ni na.

Imaal iken aayimbil

¹¹ Suha aakpel Kaleb nan ma ubijabo ubaa, le ki yin u ke Mehir. Mehir le nan ma Estonn,

¹² le u mu ma mbijabim mutaa. Baayimbil sɔ: Bef‑Rafa, ni Pasea, ni Tehina. Tehina le nan ye unii u naan Nahas aatiŋ na. Bijab bimina aayaabitiib nan koo Reka aatiŋ ni la.

¹³ Kenas nan ma mbijabim bilee la. Baayimbil sɔ: Otniel ni Seraya. Otniel mu nan ma mbijabim mulee la. Bima le nan ye Hataf ni Meonotai.

¹⁴ Le Meonotai mu ma Ofra. Seraya le nan ma Joab, u nan naan Biwanŋab Aafataŋ na. Binib bi mɔmɔk nan bi nima chee na nan nyi tiwan aanaan pu sakpen.

¹⁵ Jefune aajapɔɔn Kaleb nan ma mbijabim mutaa la. Baayimbil sɔ: Iru, ni Ela, ni Naam. Le Ela mu ma Kenas.

¹⁶ Jehalelel nan ma mbijabim munaa la. Baayimbil sɔ: Sif, ni Sifa, ni Tiria, ni Asarel.

^17-18 Esra nan ma mbijabim munaa la. Baayimbil sɔ: Jeter, ni Mered, ni Efer, ni Jalonn. Mered nan yoor Ijipt aabɔr aabisal u bi nan yin u ke Bitia na, le bi nan ma upiibo, ki yin u ke Miriam. Bi nan ma mbijabim bilee mu. Baayimbil le ye Samai ni Isba. Isba le nan naan Estemoa aatiŋ. Mered mu nan yoor Juda aanibol ni aapii la, le bi ma mbijabim bitaa. Baayimbil sɔ: Jered, u nan naan Gedor aatiŋ na, ni Heber, u mu nan naan Soko aatiŋ na, ni Jekutiel, u nan naan Sanoa aatiŋ na.

¹⁹ Hodia le nan yoor Naham aaninkpan. Biyaabitiib le naan Gaam aataŋaal mu nan koo Keila aatiŋ ni na, ni Maakaf aataŋaal mu nan koo Estemoa aatiŋ ni na.

²⁰ Simonn nan ma mbijabim munaa la. Baayimbil sɔ: Amnonn, ni Rina, ni Ben‑Hanann, ni Tilonn. Isi nan ma mbijabim mulee la. Baayimbil le nan ye Sohef ni Ben‑Sohef.

Sela aayaabitiib aayimbil

²¹ Sela nan ye Juda aajapɔtiib ponn ni ubaa la. Uyaabitiib bibaa le nan ye Er, u nan naan Leka aatiŋ na; ni Laada, u nan naan Maresa aatiŋ na, ni ntaŋaal mu nan luu ŋitanyaan aakeken ki nan koo Bef Asbea aatiŋ ni na;

²² ni Jokim, ni binib bi nan koo Koseba aatiŋ ni na, ni Joas ni Saraf, bi nan yoor Moab aatiŋ aapiib ki nan ti kal Betlehem aatiŋ ni na. Ŋiyimbil ŋimina nan ŋmee ki dɔ yunn pam.

²³ Bi nan ye ubɔr aayamaab, le ki koo Netayim ni Gedera aatim ni.

Simeonn aayaabitiib aayimbil

²⁴ Simeonn nan ma mbijabim biŋmu la. Baayimbil sɔ: Nemuel, ni Jaminn, ni Jarib, ni Sera, ni Saul.

²⁵ Saul le nan ma Salum, le uyaabil nan ye Mibsam, le uyaabisɔsɔk nan ye Misma,

²⁶ le ki nyan Misma chee na, mmaal ngbaan nan dii kina le ti saa Hamuel, ni Sakur, ni Simei mɔk.

²⁷ Simei nan ma mbijabim kipiik ni biloob la, le ki ma mpiibim mu biloob. Tɔ, udo yaab biken aa nan ma sakpen. Kina pu na, Simeonn aanibol aa nan wiir ke Juda aanibol aah nan wiir pu na.

²⁸ Kina, ki nan saa Ubɔr David aayoonn na, Simeonn aayaabitiib nan koo Beerseba, ni Molada, ni Hasar Sual,

²⁹ ni Bilha, ni Esem, ni Tolad,

³⁰ ni Betuel, ni Homa, ni Siklag,

³¹ ni Bef Maakabof, ni Hasar Susim, ni Bef Biri, ni Saarayim aatim ni la.

³² Bi nan ki koo ntim muŋmu mumina; Etam, ni Ayinn, ni Rimonn, ni Tokenn, ni Asann ponn ni,

³³ ni ntimbim mu bi gob ki ti saa Baalaf aatiŋ ki bi liwilir aaŋangii wɔb na ni. Baah nan ŋmee baadichal, ni baah nan koo koo ntim mu ponn ni na aabɔr pu na sɔ:

^34-38 Bijab bi aayimbil paa na le nan ye bidichadam: Mesobab, ni Jamlek, ni Amasia aajapɔɔn Josa, ni Joel, ni Jehu, (ute le nan ye Josibia, le uyaaja ye Seraya u aate nan ye Asiel na,) ni Eliwenai, ni Jaakoba, ni Jesohaya, ni Asaya, ni Adiel, ni Jesimiel, ni Benaya, ni Sisa, (ute le nan ye Sifi, le uyaaja ye Alonn u aayaajatiib nan ye Jedaya, ni Simri, ni Semaya na). Baamaal aah nan moo kpae na,

³⁹ le bi nan yaa koo liwilir wɔb ki bi ban bi koo Gerar aatiŋ ni le baapiih ji kitiŋ ngbaan aah bi kifataŋ ki ni na aawipuul wɔb.

⁴⁰ Bi nan kan mmoŋmɔpaan nima le mu dɔ waa cha, ki bi suuna, kaa kpa tibaa. Ham aanib le nan puen koo nima chee.

⁴¹ Ubɔr Hesekia aanaan yoonn, le bijab bi aayimbil ŋmee paacham na nan buen Gerar aatiŋ ni ki ti ber Ham aanib ni Meunn aanib bi koo nima na aaboo. Ipiih aamoŋmɔpaan aah nan bi nima sakpen na, le bi nan jenn nyan binib ngbaan ki gaa nima.

⁴² Simeonn aanibol ikui iŋmu biken nan buen liwipuul wɔb, Edom aatiŋ pu. Isi aajapɔtiib, Pelatia, ni Nearia, ni Refaya, ni Usiel le nan loln bi pu nsan.

⁴³ Bi nan ku Amalek yaab bi nan gur na nima chee la, le ki gur koo nima ki nan saa din.