1 Bibɔrb Aabɔr 28 - Uwumbɔr aagbaŋ

David aah mɔk ke bi maa Uwumbɔr Aadichal pu na

¹ Ubɔr David nan siin ke Israel aaninkpiib mɔmɔk kuun ni Jerusalem ni. Le ŋinibol mɔmɔk aaninkpiib, ni nnaan aatun mɔmɔk aaninkpiib, ni itaŋaal aasalolm, ni ubɔr ni ujapɔtiib aawangol ni tiwakor mɔmɔk aaninkpiib, ni libɔrdichal ni aaninkpiib, ni bijakpaam, ni binikpaam, mɔmɔk nan kuun Jerusalem ni.

² David nan sil binimbiin ni ki tuk bi tibɔr timina ke: “Ndo yaab, li pel man. M nan ban ke m maa lidichal li kaan ki lir na, ki di Nkaal Aadakaa, u ye Tidindaan Uwumbɔr aataa aajal na siin li ponn ni. M gor tiwan mɔmɔk ke m maa Uwumbɔr Aadichal ki nyuŋ u,

³ le maah ton butɔb ki ku binib sakpen pu na, waa kii ke m maa li.

⁴ Timi Israel yaab Aadindaan Uwumbɔr lee min ni n‑yaabitiib le ke ti li ye Israel aajojoob, ki ti saa n‑yoonn mu kaa kpa ndoon na. U nan lee Juda aanibol ke bi li ye bisalolm, le ki nyan nte aadichal Juda aanibol ni. Lidichal ngbaan mɔmɔk ni, ni nan ye waageehn le ke u lee mi ki di mi ŋa Israel yaab mɔmɔk aabɔr.

⁵ U cha m ma mbijabim pam, le bi mɔmɔk ponn ni u lee Solomonn ke u li joo Israel aatiŋ ki ye Uwumbɔr aanaan na.

⁶ “Uwumbɔr nan bui mi ke, ‘Aajapɔɔn Solomonn le ye u ga maa lidichal tii mi na. M lee u ke u li ye maabo, aan m mu le ye ute.

⁷ U yaa beenin joo maakaal ni maah siin u pu na mbamɔm ke waah joo pu dandana na kan, m ga cha waanaan li bi ki ti saa n‑yoonn mu kaa kpa ndoon na.’

⁸ “Maanib, kina pu na, timi Aawumbɔr aanimbiin ni, ni waanib Israel yaab mɔmɔk aakuun mue ni, m bui nimi ke ni li joo Tidindaan Uwumbɔr aah siin timi pu na mbamɔm, aan kitinyaan kimina li beenin ye nimi yaan, aan ni mu nan di ki tii niyaabitiib ki ti saa n‑yoonn mu kaa kpa ndoon na.”

⁹ Le u bui Solomonn mu ke, “Maabo, aa li nyi aate Aawumbɔr ki li dii u ni aasui mɔmɔk ni lineen. U nyi timi aalandak ni timi aageehn mɔmɔk. Aa yaa di aabaa tii u kan, u ga gaa si; tɔ, aa yaa fenn aapuwɔb tii u kan, u ga siir cha si kookoo la.

¹⁰ Aa li nyi ke Uwumbɔr lee sin le ke aa maa lidichal li bi chain na tii u. Tɔ, di lineen maa li.”

¹¹ David nan di Uwumbɔr Aadichal, ni tijikaar, ni tiwan niken aadir, ni Chain Chain Aapepel, nin chee binib kani chapinn na aagbaŋ tii Solomonn.

¹² U nan ki di waah dak ke u ki maa laachiln ni tidir ti ga li bi lichiln ngbaan ni na, ni Uwumbɔr Aadichal ni aapiin, ni tijikaar ti bi di tii Uwumbɔr na aadir aagbaŋ tii u.

¹³ David nan ki tii u ilandak i u ga di kuun bitotoorb, ni Liifai yaab, bi li tun baatun na, ki tun Uwumbɔr Aadichal ponn ni aatuln, ni baah ga joo Uwumbɔr Aadichal ponn ni aasambil ni tiyir pu na.

¹⁴ U nan mɔk u tikunabr ni salmaa u ga ŋeer ŋisambil ni tiyir ngbaan na,

¹⁵ le ki mɔk u, u ga ŋeer karyaa mɔk, ni waah tɔŋni tiwan ni pu na.

¹⁶ U nan mɔk u tikunabr ti ga ŋeer tikunabr aateebul tiib na, ni salmaa u ga ŋeer salmaa aateebul tiib bi bi joo boroboro u bi ga di tii Uwumbɔr na paani bi pu na.

¹⁷ U nan ki mɔk u baah ga di salmaa ŋmeen u ŋa tijinjiir, ni ŋisambil, ni ŋibuu; ni tikunabr ni salmaa u bi ga di ŋa ŋisambil,

¹⁸ ni salmaa ŋmeen u ga ŋeer kitork aabimbiln li paab bi seer tulalee aayon na, ni u ga ŋeer itaan aatɔroku u pu ifeen aawan ni taln naafeen biin Uwumbɔr Aakaal Aadakaa pu na ga tɔŋ na.

¹⁹ Ubɔr David nan bui ke, “Nimina mɔmɔk bi Uwumbɔr aah nan mɔk mi ke m tun pu na aagbaŋ ponn ni la.”

²⁰ Ubɔr David nan bui ujapɔɔn Solomonn ke, “Li si chob ki taa san ijawaan. Piin lituln ngbaan ki taa cha nibaa kiir si. Tidindaan Uwumbɔr u m dii na ga li bi aa chee. Waan siir cha si, see lituln li aa ban aa tun Waadichal pu na ti doo.

²¹ Bitotoorb ni Liifai yaab kpa ŋitun ŋi bi ga tun Uwumbɔr Aadichal ponn ni na. Bitutum mɔmɔk aabɔŋ bi, ki ban ke bi ter si, le binib mɔmɔk ni baasalolm bi aaŋaal ni.”